بسم الله الرحمن الرحيم
السلام عليكم ورحمة الله وبركاتة
تحياتي للجميع
نظراً لكثرة الطلب علي الطريقه الأصليه للبسبوسه المصريه علي أصولها جبتلكم الطريقه من مصدرها الرئيسي
اللي بتحب البسبوسة المصري الدمياطي تجرب طريقتي دي وتدعيلي نفس الطعم بالظبط
يلا بينا علي المقادير والأسرار:
( البسبوسه الأصليه بالطريقة المصرية )
3 كوب سميد أنا استخدمت الخشن
1/2 كوب زيت
1/2 كوب حليب سائل
معلقة صغيره بيكنج بودر
2 معلقة كبيرة عسل نحل
نص كوب سكر
مقادير الشيرة:
1/2 1 كوب سكر
3/4 1 كوب ماء
عصير نصف ليمونة
معلقة كبيره سمن بلدي لإعطاء نكهه للبسبوسه
علي النار تغلي لخمس دقائق فقط
الطريقة :
1-في وعاء نضيف السميد والزيت ونفرك جيداً حتي تتغلف كل حبات السميد بالزيت ودي نقطه مهمه جداً
2- نضيف السكر والبيكنج بودر ونقلب ثم نضيف الحليب والعسل ونخلط
3- يجب أن يكون الخليط رملي كما هو واضح في الصور
4- ندهن الصينيه طحينة سائله ونسكب الخليط ونضغط عليه كويس باليد
5- تقطع البسبوسه قبل دخولها الفرن ويجب ان نتركها ترتاح المفروض ساعه أو أكتر أنا خليتها نصف ساعه
6- ندخلها في فرن مسبق التشغيل من أسفل فقط حتي تأخذ لون ذهبي من تحت نشغل الشوايه حتي يحمر الوجه
7- نسقيها بالشيره فور خروجها من الفرن مع مراعاة ان تكون الشيرة ساخنه والبسبوسه كمان ساخنه ونتركها حتي تتشرب الشيره
من الأفضل وضعها في الثلاجه قبل التقديم كي تتشرب الشيره وتتماسك
أنا جربت طرق كتير للبسبوسه وعندي كمان طريقتي اللي سبق ونزلتها هنا وفي المنتدي هي صح حلوه وعن نفسي بحبها لأنها خفيفه ولكن دي البسبوسه المصريه الصح نفس طعم اللي بنشتريها بالظبط مستحيل تفرقي بينهم
وبرجع تاني اكتب الملاحظات البسيطه والمهمه وهي اللي بتفرق في الطعم لكل طبخه تكنيك معين يجب الإلتزام به عشان تدينا نتيجه صح
1- يجب فرك السميد مع الزيت حتي تتغلف كل حبات السميد بالزيت
2- يجب أن يكون الخليط رملي وليس سائل
3- يجب تركها ترتاح نصف ساعه أو ساعه قبل دخولها الفرن
4- يجب أن تكون البسبوسه ساخنه والشيره ساخنه
5- بإمكانك إضافة سمن بدل الزيت ولكن أنا بفضلها بالزيت أخف وألذ وعشان يبان فيها طعم السمن اكتفيت بإضافة معلقة للشيره
أنا كتبت نفس المقادير اللي عملتها بالظبط لأن جربت قبل كده وعدلت وغيرت من عندي لغاية ماتوصلت للنتيجه دي وكمان الشيره بتختلف مقاديرها علي حسب الحلو ودي أفضل مقادير للشيره الخاصه بالبسبوسه والكمية مناسبه جداً لمعيار البسبوسه يعني التزمي بكل المقادير لأنها مظبوطه بإذن الله
جربتها قبل كده بمقدار أقل ف الشيره وطلعت ناشفه شويه
ورجعت زودت طلعت زياده والبسبوسه مش شربتها كلها
دي معيار ميزان بمعني حطي كل مقدار الشيره
معلهش طولت عليكم ولكن حبيت أوضح لكم كل حاجه بالتفصيل مع الأسرار البسيطه وحبيت أوضح كمان تجاربي السابقه لأني اتأخرت علي اللي طلبوها مني ولكن حبيت اكتب المقادير الصح والمظبوطه بعد تجارب كتير
اللي تجربها تبعتلي تطبيقها
#حلويات_ريم_بحب_بلدي
ولاتنسوني من دعواتكم
في أمان الله
والحمد لله الذي أطعمنا وسقانا وكفانا وآوانا فكم ممن لاكافي له ولا مأوي
تسلمي ع الخطوات الواضحه والشغل المرتب