البطاقه النسائية

.


.

.


السلام عليكم لكل السهرانات اللهم اغفر لنا ووالدينا وجميع المسلمين

اللهم فرج همومنا وكروبنا وأزل أحزاننا وأجعل لنا في الدنيا حسنه وفي الآخرة حسنه واقنا عذاب النار

اللهم اشف مرضانا وارحم موتانا . اللهم آمين



يا بنات فيه موضوع في بالي ما اقتنعت فيه وهو البطاقه النسائية اللي يطلبون إبرازها في المناسبات وكنت أتناقش مع بعض الزميلات في الواتس وهي بدوية ومو مقتنعه بالبطاقه أبد وتعرفون البدو اللي يسوي العرس هو الرجال مو أهل البنت وأنا أحس هذي أحسن شيء فيهم


هي تقول أمي وأبوي في جميع أعراس أخواني وأحفادهم يرفضون البطاقه النسائية إلا للمرأة اللي ما يعزمون رجالها يعني تصير بعيده هذي يتصلون عليها أو يسوون بطاقات معدوده بس للصديقات و... يعني اللي زوجها موب معزوم يقلون شلون نعزم الناس ونبي نكرمهم ثم نوقفهم على الباب يبرزون البطايق !!!


طبعا أبي رايكم في موضوع الابراز وفي كلامها

تقول احنا نتكلف في الزواجات أحيانا تصل 20 ذبيحه وإذا كان بوفيه يسوون 10 ذبايح للرجال ، وللحريم بوفيه ل300 شخص غير التقديمات والقهوة يدبلونها وما يهتمون بتزيين القاعه أهم شيء الطعام ويفتحون الدعوة بدون إبراز بطاقه وكذا وتقول يجون ناس فقراء وقت العشاء آخر الليل ويأكلون ويشيلون معاهم بعد المعازيم وغالبًا ما يبقي شيء كثير نأخذه إلا الحلويات أما العشاء والفواكه كثييير تروح


طبعا أنا قلت لها طيب شلون تأمنون ذولا اللي يجون ما يسرقون الحريم

قالت هم غالبا يجون اخر الليل وقت العشاء يفتحون الباب بعد الناس ما تعشى - تعرفون فيه وقت فرق بين عشاء الرجال وعشاء الحريم - ويدخلون قاعة العشاء وأكثرهم اصلا رجال موب حريم وإذا حريم ممكن خمس وأو ست وما سبق في زواجات أخواني الثلاثة سرقه

هي ساكنه بالرياض هي زواجات اخوانها كانت حوالي قبل 8 سنوات وأنا حضرت هذا العرس الأخير بالفعل شفت ناس آخر الليل بعبايات يشيلون أكل


اش رايكم في الموضوع وهل فيه مثل كذا بالرياض

وهل فعلا الفقراء يتتبعون قاعات الأفراح

بصراحه أعجبتني الفكرة إن اهل العرس إذا تعشوا الناس يفتحون قاعة العشاء للناس من برى ويكون لها باب خارجي ! عشان السرقات


وشكراا