ممتاز مشروع السوبرماركت .. انا انصحك فيه بشرط المكان
وغيره من التفاصيل مره بسيطه ما تتخيلين .. اذا تبين اساعدك علمين وش تبين
وانا ارد لك هنا

وينك يشيخه فاضيه لك ابي اسولف لك عن المشروع !!

طيب ما علينا اذا انتي بالرياض اول شي تسوينه كالتالي :

اهم خطوات بداية مشروع سوبر ماركت ( الموقع الي بيقام فيه المشروع) واي شي بعده مو مهم
بقدر اهمية الموقع

وحاولي بقدر المستطاع انك تستأجرين من فتحتين وفوق ويكون الموقع للداخل مو للطالع وراعي المواقف ( للداخل يعني بطريق الناس وهي رايحه لبيوتها مو وهي طالعه منه ) وكل ما كان بزاوية كل ما كان احسن.

ولنفترض ان الموقع موجود وانتي محددتع مسبقاً

اول هام تكلمين صاحب العقار بحيث انه يأجل لك الاجار 6شهور اذا فيه امكان.

نجي للتصريح وهو بسيط : تمرين للبلدية الي تابعه لها المنطقه

معك صورة صك العقار وصورة عقد الاجار وصورة للمحل واللوحه مركبه فيه( افضل انك تراجعين اقرب فرع للبلدية وتسئلين عن شروط استخراج رخصة سوبر ماركت)
الانهم دايم يغيرون شروطهم

بالنسبة للوحه لازم تكون على قد مساحة المحل كبيره وواضحه وبإسم سهل ينحفظ وعلى التكاليف بسيطه المتر من 250 يزيد وينقص على حسب النوع(وتقدرين تأخذين اللوحه بسعر رمزي اذا
ركبتها لك شركة بيبسي او مياه الهدا او كوكاكولا وغيرهم وبكذا ما تكلفك شي)

بالنسبة للديكور السوبر ماركت مافيه ديكور رفوف وامرها سهل ما تكلفك شي وكثير اماكن تبيعها
واذا انتي بالرياض (الحراج مليان رخيص ومستعمل خفيف)

بالنسبة للثلاجات لا تشيلين هم كل شركة تجي تنزل عندك بضاعه تجيب ثلاجتها معها من شركة ابو الجدايل سيزر للمراعي نادك الصافي نجدية البيبسي كوكاكولا الربيع وغيرهم ( الثلاجات مال الاجبان
منتي ملزومه فيها يعني مو لازم تبيعين جبن وزيتون وغيره ولو مصره اسعارها مو غاليه بس ما انصحك فيها)

خلصتي من الرخصه ومن الرفوق والتكيف بسيط صحراوي على 600 ريال وخلصتي من اللوحه
وجت الشركات حطة ثلاجاتها في ضرف اسبوعين وخلال هالفتره بيجونك مندوبين الاغلب المنتجات
ينزلون عندك بضايع على التصريف يعني مو كاش تشترينها والي ماله مندوب تروحين تشترينه
من سوق الجملة وامره سهل(يعني مو كل يوم تروحين) ولو عندك سواق يروح يشتريها ويجيب لك الفواتير برضه احسن


اذا انتي عندك التالي :
1 محل مؤجر او مؤجل الدفع

2 لوحة المحل ما تكلف 3000 ( وتقدرين تاخذينها من احد الشركات بسعر رمزي)


3 رخصه محل من البلدية وتترتب عليها رسوم واشتراكات مثل مصلحة الزكاة والدخل
ورسوم الدفاع المدني من طفاية حريق وغيره ورسوم والباقي ما يحضرني مثل رسوم اللوحه

4 ديكور المحل من رفوف ما تكلف 2000 الى 4000 ولو مستعمل احسن, وتكييف صحراوي
وثلاجات من الشركات , كاشير وطاوله ( يعتمد على حسب الكاشير وانا انصحك بالكاشيرات الالكترونية
زي بنده وغيرها الي تحسب كل صغيره تطلع وتدخلها ببرنامج جاهز يطلع لك فواتير يوميه
ويسوي لك جرد على بضاعتك بدون وجع راسي وتضمنين ان العامل ما يقدر يغشك
بشرط انك تجردين الداخل ناقص الفواتير المباعه الي تطلع من الكاشير زائد الباقي بالمحل
واذا حبيتي تشوفين مثال على الطبيعه وانتي بالرياض ارسلك لبقاله فتحه وحده بالعليا عن مستشفى
سليمان الحبيب يستخدم هالنظام.

6 البظائع: كل شركة بيجيك لها مندوب الا ما ندر وهذا تقدرين تعوظينه اذا مريتي على سوق الجمله
وما تكلفك بظاعة كثير يعني فتحتين الا ثلاثة مو شي الي تدفعينه كاش

7 العامل والتوصيل : العامل خيتو انقلي كفالة اي واحد تحسينه جيد وخلي سالفة السرقه بعدين
الانك بتعتمدين نظام الي في الحساب فما فيه مشكله( ولا كان السوبرماركتات الكبيره فلست من زمان)
وبالنسبة للتوصيل ما اشوفه مهم مره ولو مصره دباب بالف ريال يكفي للحاره الي ورا المحل :)

هذا الي يحضرني اللحين خلاص تعبت موفقه خيتو

حلووو موضوعك للمهتمين بمثل هالمشاريع

فاايده كبيره هالمعلمومات



تحياااتي

للرفع بس ما قلتوا كم يكلف المشروع

أحلى شيء ياعسل إنك متفائلة عندي لك سالفة وحدة في السكن إللي في العزيزية المهم الحرمة عقليتها تجارية و صارت تبيع منتجات البقالة يعني بسكوت الشاي والدريم ويب والكريم كرميل والذي منه المهم الجارات واثقين منها ويأخذون وطبعا على الحساب وكل الحريم مستانسن ولا تتعب الوحدة رأسها وتدق على زوجها وتقول جيب وجيب وفي نهاية الشهر وقت التسديد أقل وحدة كان عليها ديون بمقدار300ريال
حبيت أذكر لك القصة لكي:
1- تكون لديك عقلية تجارية
2- شخصية قوية
3-المطالبه بحقك
4-محنكة سياسية

الله يوفقك ولازم إذا بتفتحين بقالة لازم سجل تجارية وتكفلين عميل