البنات اللي فالثلاثين وماتزوجوا ماتجيكم هالأفكار؟

سؤالي للبنات اللي في الثلاثين وماتزوجوا حبيت افضفض لكم ونتشارك ماتجيكم هالأفكار اللي فبالي؟ أنا هالأيام ابتديت افكر اقول نحن اصلا في الثلاثين وفرص الزواج قليله وصعبة بس شو لو فكر الريال ان يقول هاي في الثلاثين ويمكن ماتقدر تجيب عيال وايد او تكون خصوبتها قليله وماتنجب الا بصعوبة، انا لاحظت ان هالفكرة منتشرة في شباب العايله يوم يخطبون يطلبون بنت في العشرينات حتى لو كانوا هم في الثلاثين لازم يختارون وحدة في العشرين وهالشي اللي مخلني خايفة ومكسورة يوم افكر ان ممكن اي شخص يرفضني بسبب العمر..خاصة هالأيام تشوفين الكل يتزوج وينخطب من فترة بسيطة لاحظت ماشاء الله زادت اعدادد الخطب والملكات في شهر او شهرين، او هالشي مسبب لي رعب ان يفوت وقتي وماحصل فرصة، ماعرف شو صاير فيني عندي حالة قلق، هذا غير عن الأفكار اللي تيني يوم اشوف بنات مب ملتزمات بسهولة يتزوجون عن طريق التعارف والسوق واستغرب، واستغفر الله اقول اذا هم حصلوا بهاي الطريقة ليش انا ما اسوي نفس الشي، وارجع استغفر واطرد هالأفكار، المشكلة نحن في البيت مافي حد يشوفنا رغم اني موظفة بس ماشفت فرص لين الحين، احيانا اقول يمكن حسد واقرا البقرة والرقية وانقطع عنها، ماعرف الغلط ووين تغبت من الأفكار السلبية.من فترة تركت الدعاء بهاالموضوع لان قلت يمكن الله مب رايده لي او ان يمكن يكون الزواج شر لي واوقف عن التفكير والدعاء بالزواج واقول الحمدالله عالأقل انا مرتاحة من المسؤولية، لكن انا ابغي الزواج لان الفتن زادت وابي احصن نفسي قمت اضعف وافكر في ا لتعارف بشكل مب طبيعي وادخل مواقع زواج عربية واجنبية واقرا معلومات عن الحياة الخاصة بين الأزواج وعن الثقافة الجنسية والحمل ومنعه او تنشيطه وتجديد الحب بين المتزوجين صاير عندي فضول اعرف عن كل شيء في المواضيع الخاصة،،تعبت نفسيا واقول متى بقدر اعيش مثل باقي الحريم اللي في العالم يقدرون يمارسون حياتهم بكل طبيعية لا في شي اسمه انتظار ولا خطبة ولا هالكلام والتعقيدات اللي مسوينها نحن اصل وفصل ومهر، الوحدة منهم لو عاجبها شخص تقدر تروح له وتعرض عليه الزواج، ماعرف تلخبطت وماعرف الصح من الغلط والله خايفة اضعف واغلط بسبب النقص العاطفي اللي أعاني منه اقول بطلع اي مكان او مركز يمكن احصل شخص يشوفني وينعجب فيني يتقدملي بس ارجع واقول لا لاني ماتحمل ار ارخص بنفسي، شو المفروض اني اسوي والله ضعت واخاف اضيع نفسي بهاي الافكا، الله المستعان.ر