البنات الي ماتزجو او خواتهم ادخلو شي مهم مررره وخطير

السلام عليكم
:26::26::26:
اخباركم عساكم بخير
طبعا هالموضوع لي فتره جاء في بالي وابي انزله بس ماادري وش يصير وانسى

المهم يااااااابنات والله يعلم اني احبكم واحب للجميع الخير

طبعا الحين في بنات كثيره تبي الزواج والي تقول ابي اتزوج وافتك

بقولكم انتبهو ترى احيانا الوحده في بيت اهلها احسن

بقولكم السالفه وخاصة عقب ماشفت موضوع هنا حمسني زود انزل الموضوع

يابنات انا لي صديقه اعرفها بنت قبايل بس لها اخو الله يستر عليه<<<<<<<ترى يوم قلت بنت قبايل اقصد فيها انهم من القبائل المتشدده او المتعصبه الي ماتتزوج من خارج القبيله سواء رجال او بنت

هذي نقطه لو جاكم احد ومعروف بتعصبهم ومايأخذون من خارج قبيلتهم او الفخذ حقهم اكيد يكون في إن واخواتها بعد يعني ابحثو وتمحصو زين عنه

اخوها هذا سكير وراعي مخدرات يبيع وكذا وطبعا انمسك بقضيه وانسجن

المهم قالت لي يافتو ابيك تشوفوين لي من صديقاتك عروسه لاخوي وتكون بنت قبايل:09:<<<<<<وهنا نقطه انتبهو ممكن وحده تجيب لك واحد عشان تخدم صديقتها لو ماكان عندها ضمير بتمدحه لك
يعني لو جاكم واحد عن طريقه صديقه تقول صديقتي وصتني وكذا نحرو زين مو تقولون صديقتي اكيد تحب لي الخير واكيد كويس ممكن يكون البنت بينهم مصلحه وتبي تخدمها بس على حساب بنات الناس

حتى لو مدحته اسألووووووووووووووووووووووو


المهم قلت ان شاءالله طبعا يابنات كل جماعتهم عارفين بالسالفه ورافضين يزوجه محد بيرمي بنته

وبعدين قلت لها ماحلصت احد كلهم مخطوبين او مايتزوجو من خارج القبيله حقتهم

طبعا يابنات الحقيقه ماشفت ولاشي لان حرااااااااام وخاصة قالت لي لو سالتك امدحي فيه ولاتقولين لها شي
يعني اغش بنت الناس وعشان صديقتي ويعني اني بخدمه واخلي اهلها يفرحون باخوهم على حساب بنت الناس
لا والله ماارضها


وطبعا ماقلت شوفي احد يقرب لك لاني عارفه بالسالفه


بقولكم وش مبداها تقول يمكن لو تزوج حس بالمسؤوليه ويمكن ينصلح على يد زوجته <<<واتوقع هذا تفكير اغلب الي عندهم كذا الله لايبلانا

الوحده لاصار اخوها قريبه ربي مبتليه لاتبلي معاها بنت الناس هم همهم يفرحون فيه وبس


ورحت قلت لها لو الناس سؤال عنه بيعرفون سالفته قالت لا كل الحاره بتوقف مع اخوي عشان يفرحون فيه

والعمل حقه بس بعد القضيه فركش تقول عادي خوياه بيفزعون له ويمدحون فيه<<<<<<<الدعوه غش


طبعا انا الشي الي ماارضه علي ولاعلى الي احبهم ماارضه على بنات الناس ولاابي دعوه من وحده مسكينه بتفرح بعريس وتنصدم وتدعي علي فكنسلت الموضوع







اقولكم السالفه الثانيه هذي كمان لوحده صديقتنا اعرفه عز المعرفه

هالبنت امها قاسيه وظروفها صعبه المهم بنت جيرانهم خطبت لها اخوها وقالت انه عسكري وكذا<<<<<نقطه كمان ممكن صديقتك بنت جيرانك تمدح اخوها ولدهم لاتصدقو العالم ماهي مثل قبل

المهم صديقتي فرحت عشان تبي تفتك من هم اهلها وامه واخوانها

بنت جيرانهم هذي اخوها في محافظه بعيده عن الرياض وسالو عنه وقالو كويس وهو جاء للنظره الشرعيه<<<<<<<مين سالو خوياه واكتفو بكذا

بلبس العسكر وصديقتنا وافقت وفرحانه وتركت الدراسه وتخيلو ملكت

ولما راحت لديرة زوجها تنصدم اه زوجها له 4اشهر مطرود من العمل يعني ماعنده وظيفه:09:

وصديقتنا تحملت وصبرت وشوي شوي اكتشفت زوجها راعي خرابيط مخدرات وحشيش وتخيلو يضربهااحيانا

تدق وهي تصيح تشتكي من زوجها وافعله وحتى علاقتها فيه ماش بسبب هالخرابيط احيانا يصير كويس واحيانا لا

طبعا عندها عيال وصابره عشانه يعني على قولتهم جت الحزينه تفرح مالقت لها مطرح

وبين فتره وفتره تفكر تتطلق وتذكر كيف اهلها لما تزورهم يعاملونها شين هي وعيالها وتقول اتحمل وزوجها مفرط بالصلاه


طبعا هي من قبيله وهو من قبيله بس تقول ندمت اني ماخليت اخوي يسأل عنه زين واستعجلت


وهذي هي الله يهدي لها زوجها رغم لقى وظيفه وراتبها قليل على قدهم احيانا ماتحصل اكل لعياله الحين احسن وضعها شوي

بس اقولكم لاتستعجلو



تحرو زين عن العريس ترى العالم صارت تغش بعضها اهم شي عندهم اخوها يتزوج وبنت الناس بحريقه

اهم شي يفرحون فيه وبنت الناس تندب حظها وتدعي على من دلها عليهم



ترى الرجال يعرفون بعض ابوي ماشاءالله عليه يعرف ناس وله خوياه بالمباحث

ابوي يعرف الشخص من جلسته وكلامه ومسكته للبيالة الشاي اذا هو يشرب خمر ولا يحشش او يشم

ماشاءالله عليه خوياه علموه وصار عنده خبره وحتى ابوي مره شاف زوج صديقتنا وقالنا وكنا مانعرف وهي ماقالت لنا شي

يوم تكلمت تذكرت كلام ابوي الله يطول بعمره


وترى في بعض الرجال لهم نظره بالرجال امممممممم يعني لاتقولي بتزوج وافتك لو اي شي


والله هذي البنت ندمت وهي اهلها مورينها الويل
تقول ليتني صرت بنت وهمي لوحدي رغم ظلم اهلها ومعاملتهم القاسيه ولا شايله همها وهم عيالها
تخيلو ماتقدر تقول لاهلها شي لانها هي الي تبيه واصرت عليه



ادري في بنات يقولون العمر يركض فينا ولا الي تقول اهلي معاملتهم شينه شوف هالبنت كيف كلامها
العمر لاتخافي لك رزق عند ربي ماحد بيأخذه بس اجتهدو بالدعاء

انت عايشه بعز اهلك ليش تروحي وتذلي نفسك وتتزوجي حي الله زواجه عشان المجتمع الناس والمجتمع
ماراح يحلون لك مشكلتك وبكل الاحوال يتكلمون من متى الناس تسكت يعني اهم شي راحتك انت ماعليك

الكلام يروح ويجي ولايزيد ولاينقص فيك وتقدري تردي عليهم قولي بيت اهلي وعزهم احسن من واحد راعي خراب وانذل

مشكلة البنات صايره عندهم حساسيه لاصار موقف ولاااحد تكلم تتحسس وماتعرف ترد حكمو عقولك وليس المشاعر والاحاسيس


واقولكم شي من كان مع الله كان الله معه <<<<<<<الي بيفهم العباره صح ماراح يتضايق ويخاف من شي




وترى لازم تتحرون زين اسألو عنه بالشرطه له قضايا سوابق وكذا واذا فيه وش نوعها

لاتكتفو بالسؤال اهل حارته او اصحابه لان في البعض مسوي يعني اني بيفزعون لخويهم





وبالاخير يابنات اقولكم اصبرو بإذن الله الفرج قريب للجميع واقولكم شي يهون عليكم


شوفو المرضى وخاصة بامراض مثل الكانسر الله يشفيهم يااااااااااااارب بعضهم يكون بنات حلمها بس تطيب

وترجع لها صحتها ترى مدام الانسان بصحه وعافيه هذااهم شي والحمدالله الناس المرضى اكبر همهم ترجع لهم صحتهم

انامااقول لاتفكرو عادي بس مو تحزنو وتخربو حياتكم واللحظات الحلوه صحيح لابد يمر على الانسان لحظه حزن بس لاتيأسو واطردو الحزن والوسوسه بذكر الله

بتذكر الناس الي مريضه وكل مااصبحتو احمدو واشكرو ربكم على الصحه والعافيه ولالن شكرتم لازيدنكم <<<سبحان الله يمكن الزياده هذي تكون بالصحه او بالرزق والزواج

ترى كل شي يروح ويجي لو راح خاطب يجي غيره لكن لو راحت الصحه ماترجع غير بقدرة ربي كل شي يروح ويرجع وكل شي تقدرو تشترونه الالصحه والعافيه

اعرف ناس والله يقولون ربي معطينا كل شي تعرفون كل شي بس ماعندهم الصحه وراحة البال والله يقولون هذي هي فلوسنا ماشرت لنا الصحه ولا راحة البال الله يشفيهم ويرفع عنهم يااااااااااارب
ويلبسهم لبس العافيه

كثرة التفكير الحزن الهم تجيب لكم الامراض لاتصيرو مثلي عن جد اني هبله توني الحين اصحى بس بعد فوات الاوان


والله يابنات كنت وحده عاديه مافيني شي مااشيل هم شي فجأه صرت اشيل هموم ودنيا وشوفو وش جاني القولون العصبي والله اتمنى ارجع مثل قبل الحمدالله على كل حال

تدرون الان صرت مااهتم الي ربي كاتبه بيصر حزنت ولا بكيت ولاايش ماسويت كل الي اعمله بحالي مابيرد شي

غير الدعاء

صرت كذا بس بعد ايش بعد ماتعبت وصرت لو تضايقت اتعب اكثر من القولون وقاعده على ادويه

فصار شعاري اتوكل على ربي واحسن الظن وادعي<<<<<<<وذكرت قبل فترة قصتي عن حسن الظن بالله ادخلو البروفايل وشوفو الموضوع

والي كاتبه بيصير


والله ماكتبت الموضوع غير اني احبكم في الله ولاابي غير الدعاء

حبيت انصحكم هالمواقف صارت معي شخصيا وليس من احد سمعتها ونقلتها


:26::)


همسه لصبايا حواء حبيباتي

اي تذكرت ترى يابنات في موضوع عندي يعتبر معجزه في بوادر حلوه لو تم وصار ابشرو بنزله لكم

بس هالبوادر تخلين اقولكم لاتيئسو ابدابد لو صار هالموضوع مستحيل تعرفو المستحيل اكيد كلنا نقول في امور مستحيل تصير
بس تدرون انا اقولكم انسو المستحيل دام معاك رب اكيد راح تحدث المعجزات دامك تعرف من هو الله وايش قادر يسوي
ومحسن الظن فيه لاتقولي مستحيل لو وسوس لك الشيطان قولي صعب على البشر بس مو صعب على رب البشر:)

افرحو عيشو اللحظه بحلوها ومرها وساعة امر الله بالفرج بيجيك وتفرحون

لو طول رزقك ماجاك ماعليه اكيد خيره وش افضل لك فكري فيها تتزوجي وبعيد الشر يطلع راعي خرابيط يوريك النجوم بعز الظهر
وتكوني حامل ولاشي وتتحملي عشان الطفل او ترجعي مطلقه بعد الذل الي شفتيه ولاتعيش معززه مكرمه ملكه في بيت اهلك
حتى لو اهلك قالو لك شي يضلو اهلك اي شي يقولونه يرجع عليهم

يمكن يطول رزقك بس يجيك واحد زين وتصير زواجت العمر ولا واحد كل البلا والجلا فيه وتتزوجي وتتطلقي



ادري الشيطان يوسوس للوحده والله مجربه كل الشعور بس تعوذي من ابليس ولو قال لك مستحيل تذكري ان الله يحي العظام وهي رميم
يعني يعيد خلقها بعد العدم مايقدر يسوي شي تافه الي هو زواجك او اي امر لاوالله مو على ربي المستحيل

وسعو صدوركم لاتضيعو لحظات حلوه بسبب شي عند ربي وقت ماارد قال كون فيكون ويصير لاتعكر مزاجك بسبب وحده سذاجه
ماتعرف شي وتجرح احساسك الايام دواره عادي طنشيها لاتصيرو حساسين وتشيلو هم وتفسرو هي وش قصدها وماادري وش
هي بتأخذ اثمك وانت تاخذي حسنات افرحي احد يكره يجيه حسنات وهو قاعد احسنو الظن في الناس وحتى لو قصدها تحرجك او تجرحك
يدل على بيئتها وعلى عقلها ترى انت لو انقهرتي محد درى عنك وهي تنبسط وبكذا خربتي على نفسك ويرجع هالشي على صحتك
وجمالك


عدلت بالموضوع عشان هالهمسه وبس يتم الموضوع الي قلت لكم عليه بجي ركض وابشركم واعرفكم
انه مافي شي مستحيل

ادري كثرة هذره والموضوع طويل شوي بس ابيكم تنتبهون وتحرصو ماابي احد يغشكم ولاالفرحه تنسيكم او تغفلكم عن امور مهمه
وطولة الموضوع عشانكم ابي لكم الاستفاده ويصير عند الكل وعي وتصح وتعرف الزمن تغير ولازم السؤال زين ولاتقولو صعبه نسأل
عنه بالشرطه عادي هذا زواج مو لعبه من حقك وحق اهلك يطمنو


بنات ارفعو الموضوع بذكر بدعوه اي شي عشان اغلب البنات يشوفونه