البنات هجوا من عالم حوا بسبب الكوارث اللي فيه شوفوهم بعينكم!!

السلام عليكم ورحمة الله وبركاته

تبغون تعرفون السبب اللي غير المنتدى والبنات هجوا منه؟؟




كيد ان الكل ملاحظ اللي قاعد يصير في المجلس او بالاصح الموقع كله لكن قلت المجلس لانه الغالب فيه كذا··


اول شي تلاقي اللي تزكي نفسها وتتهم غيرها في دينها انتي شيعية انتي من الخوارج انتي ماعرف ايش وهذا كله عشان قالت كلمة او ردت بشيء ماعجبها طيب كل وحدة حرة برأيها مادام هي انسانة وواعية وبتشوف ان اللي بتقوله صح وحاطة في بالها مراقبة الله لها مين انتي عشان تتهمي غيرك في دينه؟؟

الشي الثاني السب والشتايم اللي يخجل ان الوحدة عندها اولاد كيف بتربينهم انتي نفسي افهم ادا انتي كذا اسلوبك مع الناس لاتقولي غير لانه الشخصية وحدة اللي بتسب في المواقع هي نفسها اللي برى المواقع اللي خلاك تتجرأين انك تسبي وحدة داخل موقع يخليك تتجرأي تعلمي اولادك الالفاظ نفسها ··

نجي لفئة الله يعافينا منهم يظنون انهم شعب الله المختار تفاجأت بكذا وحدة تقول بقايا حجاج ماكنت اعرف ايش القصد لحد ماتفاجات انهم يقصدوا بغير القبلي ليش لانه كان جاي يؤدي شريعة فرضها الله عليه ومارجع بلده تخيلوا قمة الجهل اللي خلاهم يسمون ناس بهذا الاسم اذا حابين احللكم الكلمة | بقايا عارفين ايش المعنى ايش نقصد احنا ببقايا لمن ننطقها وصل الكلام ؟؟
حجاج زي ماقلت ناس جات تؤدي فريضة وركن من اركان الاسلام وفي الاخير يلاقوا ناس يستهزئوا فيهم شفتوا كمية جهل وقلة معرفة وعدم وعي زي كذا ··
للتذكير ابو لهب كان من اشراف قريش لكنه سيصلى نارا ذات لهب وبلال عبد حبشي سمع الرسول صلى الله عليه وسلم خشخشة نعله في الجنة اكيد عارفين السبب·· لمن تستهرئين بنسب احد تذكري انه مو اختياره لكن اختياره كيف كانت اخلاقه مع الناس وكيف يحترم الغير ويكون من احسن الناس اخلاقا ··

وحكاية اخيرة اللي هي المعرفات كل وحدة عندها معرف احتياط عشان تطلع بمثالية بالمعرف اللي البنات يعرفونه والثاني تخليه للسب والشتم اذا انتي تخبيتي عنا وماعرفناك كيف انتي بالنسبة لربك يعلم خائنة الاعين وماتخفي الصدور!!

بصراحة شفت كوارث هنا قذف في الاعراض اتهام في العقيدة اساءة ظن سب شتايم مادري احنا فين عايشين كانه في غابة او بيئة يحيطها الجهل تعامل بهمجية كنت بقول انه كانهم ناس ماتقرأ ولاتكتب وتذكرت انه حبيبنا محمد صلى الله عليه وسلم كان امي لكنه معلم البشرية ··

قال عليه الصلاة والسلام ( انما بعثت لاتم مكارم الاخلاق)

لاتأخذكم العزة بالاثم بيجي يوم وتسيبي كل شي وراك وقتها ماتقدري تحذفي او تستسمحي من احد او تعتذري عن اللي كتبتيه كل شيء مسجل في صحيفة اعمالك واتذكري ان كل كلمة تكتبينها الله مطلع عليك وتذكري دائما انه مراقبك واذا اليوم تكلمتي على احد وقذفتيه بكرة يجيك الدور لحد عندك لان الدنيا دوارة واللي شتمتيه اليوم بكرة الله بيعافيه وترجع عليك وبتلاقين اللي بيشتمتك ويتهمك ··
وتذكري انك مجرد عبدة فقيرة الى الله في رمشة عين يقلب الانسان من حال الى حال ··
لاتغتروا بنسبكم ومالكم وجاهكم لان كله من الله ولا تسيئي لشخص ماتعرفين يمكن عند الله افضل منك ولاتقذفين احد لانك بكرة بتلاقين كل شي عندك كل اللي قلتيه بيوصلك لحد عندك كما تدين تدان ··

قال تعالى ( ان اكرمكم عند الله اتقاكم )


اكيد بيجيني كلام طالع نازل بس مابيهمني برأت نفسي من اللي تسوونه وذكرتكم وكل وحدة واعية وناضجة والمصيبة انهم امهات، واللهم بلغت اللهم فاشهد··

المشرفات اذا حذفتوا الموضوع ماراح اسامحكم واقتص منكم عند العزيز الجبار··

واسأل الله لي ولكم العفو والمغفرة
اللهم صل وسلم على سيدنا وحبيبنا محمد وعلى آله وصحبه أجمعين


سبحانك اللهم وبحمدك اشهد ان لا اله الا انت استغفرك واتوب إليك