البنت اللي تجي في قناة المجد سببت مأساة لأولادي

السلام عليكم ورحمة الله وبركاته

اللي عندهم قناة المجد فيها إعلان للجمعية السعودية لمكافحة مرض السرطان الله يحمينا منه

تطلع في الإعلان بنيه الله يخليها لأهلها تمثل إنها مصابة بالسرطان وإن أبوها فقير مو قادر يوفر لها الدواء
و المشهد يبدأ لمن البنت كانت متعافية وتلعب بعدين تمرض وتروح المستشفى يجي الطبيب ويقول لأبوها أن عندها السرطان

والبنت تقول لأبوها لا تحزن إن ماعندك فلوس تجيب لي الدواء مع المؤثرات الصوتيه اللي تعور القلب إلى اخر الإعلان

المهم ولدي الصغير شاف الإعلان وتأثر كثيييير حتى ما أفطر معنا وقاعد يسألني عنها

هي شفيها؟؟
إيش مرضها؟؟
ليش هي تبكي ؟
ليش أبوها يبكي؟؟

ليش ما يعالجونها؟؟

المهم أنا في البداية ما أهتميت للموضوع بس الولد تعبت نفسيته وصار كل ما شاف أحد يسأله عنها

المهم شرحت له الموضوع هو وإخوانه

وقرروا يتبرعون بمبلغ العيدية حقتهم للجمعية السعودية لمكافحة السرطان ومركز الأورام للأطفال بالرياض وكان كل واحد معه 100 ريال ( حقت طراطيع العيد)

المهم الصغير اللي متأثر مرة تبرع بالمية كلها واخوانه تبرعوا بنصف المبلغ بس

وياليت المسألة إنتهت هنا,,,, هي بالواقع بدأت

قاعد الصغير يقول ماما لازم نروح الرياض عشان نودي لهم الفلوس قلت له لا خلاص بالصراف توصل لهم

وبعدين يقول شلون توصل لها وهل فعلا إذا تبرعنا بيعطونا لها الدواء؟؟
قلت له أكيد إذا تبرعنا راح يعالجونها

المهم الطامة الكبيرة ................

الولد قاعد قبل الفطور ينتظر الإعلان وهو على نااااار تدرون ليش؟؟؟؟؟؟؟؟؟؟

يقول بشوفهم وهم يقدمون لها الدواء؟؟؟؟

ولما جت الدعاية وتكررت المأساة .......... عصب الولد وقال والله لأروح للرياض وأهجم على الطبيب و أقوله حرام عليك عطها الدواء من الفلوس اللي تبرعنا فيها؟؟؟!!!!

تصدقون قاعد يفكر فيها كل وقت ويسولف فيها
وكل يوم يسأل ماما تتوقعين ماتت البنت؟؟
ماما يمكن البنك ماوصل الفلوس؟؟
ماما طيب ليش تأخروا ما عطوها للحين؟؟!!

الولد تعبت نفسيته من ها الإعلان لأنه يجي في كل القنوات و في كل وقت

صار إذا سمع إنشودة الإعلان بالتلفزيون يجي يركض من بعيد عشان يشوفها ولاتخلص إلا وهو يبكي

صرت إذا جاء الإعلان أقفل التلفزيون بسرعة وأقومه عنه لو بالقوة

وش أسوي؟؟؟