من فترة طويلة وانا ادور على طريقة للبيتزا الاصيلة وكل مالقيت طريقة جربتها وبالنهاية اكتشف انها فطاير بحشوة البيتزا لين لقيت هذي الطريقة من كم سنة في موقع ثاني واعتمدتها وماافكر اغيرها ..
ميزة هالعجينة ان الكرست فكرته يكون سميك نوعا ما وفيه نفس الوقت هش وطري ومافيه طعم عجين او اي نكهة غير مستساغة ...
الطريقة سهلة جدا بس يبيلها رواقة لانها تحتاج لمدة عجن وتخمير اطول من غيرها من العجاين
وهذي صورتها ..
هنا شكل العجينة بعد التخمير
وهنا البيتزا صارت جاهزة
المقادير :
اول شي انا استخدم لها الاكواب المعيارية .. اما الملاعق هنا استخدمت ملاعق الاكل
6 اكواب دقيق
4 ملاعق حليب بودرة
4 ملاعق سكر
ملعقة واحدة خميرة فورية
نصف ملعقة صغيرة ملح
فنجان قهوة زيت
بيضة + نقط من الخل
تخلط المقادير سوى ويضاف لها الماء حسب الحاجة انا تقريبا احط كاس ونص او اكثر شوي وتعجن وكل مازادت مدة العجن صارت النتيجة افضل
وبعد ماتنتهين من العجن امسحي العجينة بزيت الزيتون وغطيها وخليها تتخمر
والخطوة الثانية وهي اهم شي ان العجينة يعاد عجنها كل نص ساعة تقريبا او اقل .. وخليها تتخمر حوالي ساعتين
وبعدها افرديها واتركيها بعد الفرد حوالي الساعة وبعدها دخليها الفرن
* المقدار هذا يكفي لثلاث صواني متوسطة
