البيوت أسرار..

السلام عليكم ورحمة الله وبركاته..
كيف حالكم عضوات حواء الغاليات 💕

أنا عضوة جديدة في المنتدى لكن متابعة قديمة جدا من عام ٢٠٠٤ تقريبا وانا متابعة للمواضيع من فترة لفترة لكن بدون عضوية..


بس لاحظت هالقسم من وقت ما سجلت في المنتدى وتكثر فيه المواضيع اللي تكون أقرب للفضفضة اللي مالها داعي طبعا كل وحدة لها هموم مشاكل اكيد والله يعين الجميع..
لكن في مواضيع عادية ما هي عبارة عن مشورة ولا شي يحتاج استشارة مجرد طرح مشاكل زوجية بدون فائدة يعني بعض العضوات لدرجة أنها كل يوم والثاني منزلة موضوع عن زوجها زوجي سوا لي وزوجي ضربني وزوجي ما ادري ايش مسوي فيني!!!
طيب عزيزتي والمطلوب من العضوات؟!
ترى كلنا نمر بمشاكل من فترة للثانية مافي وحدة عايشة حياة وردية هذا بس في الأفلام..
إذا واجهتك مشكلة كبيرة جدا ممكن تاخدي فيها رأي ومشورة بس مو كل تفاصيل حياتكم تكون بالمنتدى من مشاكل صغيرة واشياء موجودة بكل بيت وتعتبر من أسراره حتى لو ما دخلت باسمك الصريح لكن عرض حياتك بهذا الشكل بمكان مثل الإنترنت يؤثر عليك انت بالذات مو على أي أحد ثاني،،
لذلك ما يحتاج انك تخلي حياتك كتاب مفتوح بالمنتدى لدرجة انه البنات صاروا يعرفون كل مشاكلك مع زوجك وتذكري انهم مو كلهم عندهم آراء موفقة، كثير منهم ممكن تكون سبب خراب بيتك بأراءها الشديدة وتكرهك في زوجك بدال ما تحل المشكلة ممكن هي خربت بيتها وتتمنى يكون الكل مثلها..


عزيزاتي الكلام حقي عام مو لأي شخص معين، ونصحية مني لكل وحدة فينا حاولي تخلي حياتك كتاب مغلق عن الجميع حتى اقرب الناس لك، وإذا صار شي لاقدر الله يحتاج مشورة اذهبي لأهل الاختصاص لأن عامة الناس أراهم غير سديدة في الغالب خاصة النساء كل وحدة تحب تطبق فيكي طريقتها مع زوجها، لكن لكل زوج شخصية مختلفة وردة فعل تختلف عن الثاني، فلا تسمعي من فلانة وعلانة ابد.. شوفي أهل الاختصاص لأنهم ادري بمشكلتك..
تحياتي للجميع
💕💕💕💕