35rasa :

مساء الخير بكتب لكم اكشني بالتفصيل الممل لاني مستحيل انسى هالولادةالميسرة طول عمري الحمدلله ❤️ الثلاثاء نزلت لخالتي ام زوجي وقعدت معهم وانا احس باوجاع خفيفه تروح وتجي ماستغربتها قلت الطلق الكاذب وامزح معهم اقول بكره الاربعا يوم مميز التاريخ حلو ليتني اولد فيه 😂 جت الساعه 12 بديت احس بالاوجاع تزيد شوي بس متباعده مره رقيت لشقتي وقعدت ارتب الملابس وأعطي بنتي عشاء وانا احس بخفة ببطني والاوجاع اللي احس فيها راحت قمت ومشيت ساعه كاملة⏳ وبدا يرجع الوجع لدرجة ما اقدر اقعد احس كأني إذا قعدت فيه شي بيطيح قلت اكيد بسبب اني طولت واناامشي واهرول بسرعه 🤭رحت نومت بنتي قبل صلاة الفجر وانسدحت غفيت معها ربع ساعه واذن الفجر قمت على طول اقوم زوجي فجأة حسيت بشي حار ينزل بكمية كبيرة ارتبكت رحت اركض للحمام والموية تنزل مني وانا امشي صرت انتفض من الخوف والتوتر قلت لزوجي يعطيني ملابس لبستهم وطلعت والموية ماوقفت تنزل بدفعات اكبر سبحان الله كانت اول مره اشوف فيها المويات وكميتها الكبيرة😫 علمت زوجي ارتبك يبيني اروح المستشفى على طول ورفضت لان مامعي طلق توكلت على الله وبديت اهدأ شوي ودخلت اتروش بموية اقرب للحار واتوضى واصلي ودهنت بطني وظهري وفخوذي بزيت زيتون حار مع حبة البركة كملت ساعه تقريبا من نزول الموية وبدا الطلق ينتظم معي حسبت الوقت كل ثلاث دقايق بعدين صار كل دقيقتين😍 قلت لزوجي يالله بروح المستشفى الحين قال اجل بنمر اهلي ننزل بنتي عندهم ورفضت قلت توها نايمه ماعليها شر ان شاءالله والمستشفى ثلاث دقايق عن بيتي وحنا واصلين نزلني وارجع لها وحلفته مايعلم امي ولا يعلم خالتي مابيهم يتوترون ويشيلون همي وهم نايمين دخلت المستشفى قلت لهم معي مويات وطلق منتظم كتبو لي تنويم على طول قاسو الرحم كان فاتح 2 سم والالم محتمل جدا اخذومني مسحة كورونا ودخلوني للاشعه يتطمنون على الجنين والموية تنزل طول ما انا امشي معهم قاس الرحم قال فاتح 4 سم وكانت الساعه 7 والالم الى الحين خفيف صار ينزل معي دم وموية قالو بنركب التخطيط ورفضت قلت بمشي اشتد الوجع الساعه 9 وكان معي وحدة بالغرفة الله يسعدها ويسخر لها جنود السموات والارض مسكتني وقامت تمشي معي وتقرأ علي وانا اقرأ قرآن معها وادعي بالتيسير جت الساعه 10 ونص قاسو الرحم قال فاتح 6 ونص بندخلك غرفة الولادة ولازم نحط لك التخطيط عشان البيبي عطتني الله يسعدها حلتيته وصتني أشمها وأخبيها عن الدكاترة عشان ماياخذونها مني وحطتها لي بمنديل وحطيتها بجيب ملابس المستشفى كأني أهرّب ممنوعات😂 اذا جا الدكتور والممرضات خبيته واذا راحو طلعته أشمّه 😭🤣كانو الطاقم كلهم مسخرين لي الحمدلله الحمدلله❤️ كانت وقتها امي ترسل لي تقول وينك مادخلتي الواتس ابطيتي وانا ودي اكلم امي اقول تعالي انا بالمستشفى بس ماودي اخوفها وأوترها معي مسكت نفسي بالقوة مارديت عليها 😭😭 الساعه 11 طلبت من الدكتور يكشف كم فاتح قال لسا 6 ونص بنعطيك طلق صناعي ورفضت طلعو مني رجعت اشم الحلتيته واستنشقها بقوه كان بجنبي بغرفة الولادة الثانيه وحدة مع اذان الظهر ولدَت ماشاءالله قمت اصيح وأدعي ربي ماتجي الساعه 1 الا وانا والدة ناديتهم يكشفون قال 8 سم قربتي بنحط لك طلق صناعي وحطو بالمغذي شي قطرات خفيفه توقعت انه الطلق الصناعي بعدها بوقت بسيط صرت احس بدفع كأني بتبرز قلت لهم ابي الحمام ورفض قال لا سوي اللي تبين هنا🤭😂 قاس الرحم قال 9 سم وانا احس بدفع قوي مره صار يقولي ادفعي اذا قلت لك صرت اصرخ بقوة وادفع ووسع لي ودفعت اربع دفعات وطلعت بنتي 😭❤️ ماشفتها ولا سمعتها تصيح لاني انتفض يديني ورجليني كلها تنفض وانا اصيح ماصدقت ان الفرج جا ماتخيلت ولادتي بهالسهولة والسرعه الحمدلله لدرجة ان الوقت يمشي معي بسرعه 😭 ناظرت الوقت الساعه 1 و3 دقايق ربي استجاب دعوتي وولدت بنفس الساعه اللي دعيت فيها❤️❤️ اتصلت على امي سمعت صوتي قالت أنتي تنومتي قلت لا أنا ولدت 🤣🤣كانت مرتاعه سمعت صوتي وانا اقول ولدت ارتاعت اكثر ياعمري 😂❤️ اخذ نصف ساعه الخياطة وطلعوني بعدها للتنويم لقيت امي تنتظرني بالغرفة وبعدها جابو مولودتي ترف❤️❤️ وبس والله هذا اكشني

مساء الخير بكتب لكم اكشني بالتفصيل الممل لاني مستحيل انسى هالولادةالميسرة طول عمري الحمدلله ❤️...