sosita__ :

بالنسبة لأكشن ولادتي بحاول اكتبه ويارب مخي يجمع وافتكر الي حصل لاني للان احس اني مو مستوعبه وتراني وحده تحححب التفاصيل ف الله يعينكم عليا 😆☺️ يوم الجمعه بالليل كالعاده زوجي يروح دوامه ويحطني عند اهلي وانا طبعاً كان عندي احساس عالي بولد السبت مثل ماتمنيت المهم انسدحت على الساعه 3 ع اساس انام شويه قبل الفجر وغفيت شويه الا وفجأه يضربني الم نفضني نفض مو زي الام دايماً على الساعه 4 الا تقريباً كان الم مثل الدوره بس أقوى بكثييييير وكان مستمر فظهري ماينقطع ابداً لكن مغص بطني يروح ويجي جلست احسب ببرنامج عندي كانت مدة الطلقه الوحده حول العشره دقايق اول طلقه كان بينها وبين الثانيه نص ساعه تقريبا وعلى طول ثالث طلقه جات بعد ربع ساعه والي بعدها عشره دقايق وكذا كل مالها الام تزيد والوقت يقرب بسرعه وقتها صرت امشي بالغرفه مو عارفه ايش اسوي ناديت اختي تجي تساعدني تلبسني لاني فجاه مت بررررررد حتى نسيت اني كنت مقرره اخذ دش دافي وشافتني اختي قالت خلاص روحي ع المستشفى ايش منتظره وانا اقول لسى خليني اتاكد ان ذي ولاده مو زي دايماً كذب بس هي ماتحملت وراحت خبرت ماما وجاتني مفجوعه ياعمري عليها بس قلت لها بروح بعد الصلاه مو دحين واعطيت بابا خبر يرجع من الصلاه بسرعه وشويه ماعاد قدرت اتحمل كلمت زوجي يجي على طول وجاني على خمسه ونص يمكن ووصلت سته على بال مريت اختي الثانيه اخدتها معايا ورحت للطوارئ على طول وكشفت عليا قالت مفتوح 3 ونص داخله ع الاربعه وعملت سونار تطمن وخلاص تنويم على بال سويت اوراققي عملت تخطيط وكان كلو تمام بس الدكتوره قالتلي انتي بطنك كبيره ليش ماتفكري بالعمليه وخصوصا ان حملك جا متاخر بعد سنين وتقول لان طالع عندي ان حجم الجنين كبير داخل ع الاربعه كيلو بس انا وقتها قلتلها انا حابه اجرب الطبيعي ف البدايه وكان من هنا اول التوتر وطلعت ع الكشك برجولي لسى متحمله واحتاج امشي لان انا مالحقت أمشي كثير بسبب ان عندي التهاب ف الحوض واتعب مرررره من المشي والوقفه وحركتي مؤلمممه جدا وذا كمان سبب ان ولدي مانزل للحوض ابدا المهم ف الكشك جات دكتوره وكشفت قالت امورك تمام مفتوح اربعه وعنق الرحم كويس ولين وامورك تمام وراحت وجات بعدها بساعه يمكن الدكتوره المناوبه قبل تمشي وكشفت ونفس الشي اربعه بس رجعت عادت لي نفس الكلام بطنك كبيره والراس بعيد والواضح ان حجم البيبي كبير ليش ماتفكري بالعمليه وانا يزيد توتري لكني مصره ع الطبيعي ورغم انو الطلق ذابحني كل ماله يزيد وبعدها ماعرف بكم جات الدكتوره الي حتكون ماسكه حالتي وبتولدني وياعمري عليها حنونه وتدعم الطبيعي اكثر المهم رجعت عادت لي نفس الشي وجلست تقيس البيبي بيدها ف بطني وقالت كبير وخطر عليك وعليه ممكن يتولد ويصير له خلع او كسر بعظمة الكتف وانا هنا خلاص نفسيتي تعبت كثير بس قالت انا بحولك تعملي اشعه ونتاكد اول ان كان كبير او بس بطنك كبيره قبل نقرر ورحت سويت سونار وطلع ان حجمه 3300 يعني مو مثل ماطلع لهم قريب الاربعه ف رجعت قالت خلاص باذن الله طبيعي ولا تشيلي هم بنساعدك وكدا بس انا خلاص وصلت مرحله عاليه من التوتر والتفكير لدرجة ان ضغطي ارتفع وصرت افكر انو انا اساسا حوضي فيه التهاب اخاف انه يأثر عليا وقت الولاده وعضلات حوضي ضعيفه عندي مشاكل ثانيه وكدا وصار الضغط كل ماله يعلى والدكتوره رايحه جايه عليا تهدي فيني وتحاول تخفف عني لا تفكري ربي حيسهل لك وكدا وانا خلاص اصلا مو متحمله الالم نافضني نفض وكل ماله يززززيد مره المهم هما يحاولو فيني بالادويه يخفضو ضغطي وانا مااستجيب وعلق الرحم على سته سانتي واتوقع الساعه صارت عشره الصباح انا هنا انهرت مو راضي ولدي ينزل ابداً والطلق يزيد والضغط يرتفع اخر شي قلت لها انا قررت اولد بعمليه وقتها قالت لي قرري عشان لو تبي طبيعي بفك لك المويا رغم انها نزلت عليا طشه كبيره وانا على اربعه سانتي بس انا خلاص قررت عمليه قلت مارح اجازف بحياة ولدي وحياتي كمان وطبعا اضطريت انتظر لحد الساعه 1 عشان اكمل صيام 8 ساعات لاني قبل اطلع من البيت اخدت تمر وملعقه عسل والدكتوره يا عمري كل شويه تجي تقيس لان الطلق ناااااار مره وقالت لو وصل عشره قبل تطلعي عمليه بولدك طبيعي لكن زي ماقلت علق على سته ولا رضي ينزل للحوض مره متكي فوووق وكمان قاعد يرفس فيني ويلعب احسه كان مروق وقتها 😂 وطبعا ركبولي قسطره اخ يا ألمها بس الحمد لله اتحملته وحات الدكتوره تكشف قبل يطلعوني عشان تتاكد انو ماوصل لعشره ونزل وكدا وشكلو القسطره مركبه غلط 😢 هزأت الممرضات وعلمتهم ايش يسوو ورجعو ركبوها تاني مزبوط 💔 وبعدين اعطوني ابره عضل وقالو مسكن عشان خلاص بيطلعوني للعمليات طبعا انا صرت اغفى كل شويه واصحى من الالم ادعي باعلى صوتي من قوته وارجع تاني انام مررره دايخه كنت طبعا دا كلو مع محاولاتهم لخفض الضغط وكل شويه دوا وقياس ومحاوله تهدأه وانا ما استجيب طلعوني فوق الساعه وحده ونص عاد هنا اول شي حطوني على حنب وسحبو عليا لسى مافي غرفه او انو عشان كان وقت بريكهم قريب ويسحبو عليا من وحده ونص لحد اذان العصر وانا الطلق كان كل ماله يززززيد واناددي فيهم اقول ياناس ارحموني خلاص انا تعبت ومحد حوولي اببببداً اخ كان اظن يغمى علي واقوم مع كل طلقه اصرخ عليهم او ادعي باعلى صوتي حتى التنفس معد صار يجيب معايا نتيجه وجهاز الضغط مركب عليا يقيس كل كم دقيقه خلاص انا احس كنت منهاااااره ع الاخر واخيييرا جوو اخذوني ع غرفة العمليات مع اذان العصر بالضضضبط وجهزوني وانا مازلت اطلق طلق نااااااري فضيع بالقوه تهدأ الطلقه ويجي يجهزني لابرة الظهر وركب شي وراح يجيب الباقي وتجي طلقه ثانيه وصرت اصرخ عليهم اقول طلقه طلقه وهوا يقول لا تتحركككي الحمد لله مسكت نفسي ولا هزيت مني شعره والحمد لله تخدرت وارتحت وعاد برضو كنت كل شويه اغفى واقوم مو مستوعبه شي وفجأه رجعت لي جالة الاستفراغ طبعا انا قبل استفرغت مرتين وانا تحت ف الكشك وهنا كنت كل شويه اغص عليهم لاني مسدوحة على ظهري وصار كل واحد يجري عليا من جهة يحاولو يلفو راسي عشان ما انكتم واغص وفجأه كدا اسمع الدكتوره تقول يلا يابابا ابكي يا حبيبي ااخ صرت اقول لا اراديا ياعمري انا ياروح ماما بس طلع صوت بسسسيط ربع بكيه كدا اااخ صرت ادمع واناديه يس شالوه قالو ننظفه ونجيبو ورجعت لي حالة الاستفراغ وفجاه افتح عيوني اشوفه قدامي مالحقت ابوسو وشالوه عشان كنت اغص كل شويه وانا مابين واعيه ومو واعيه كنت اسمع الدكتورات يتكلمو انو الحمد لله لحقناها طلقها كان حار مررره وقووي وباقي الكلام ماسمعته مدري ليش كانت تقول كدا وبس خلصت من العمليه بالضبط الساعه 4 العصر وماطلعوني غرفتي الا 11 بالليل لحد ماتأكدو ان ضغطي صار طبيعي وان كل اموري الحمد لله تمام ولا شفت ولدي الا اليوم الثاني الساعه 11 الصباح والحمد لله انا وهوا بصحة وعافيه حبيب قلب ماما وللان انا ماطلعت احتمال بكره او بعده مو واضح للان وكل مالي اصير احسن صح الم وتعب بس كلو يهون لعيون حبيبي الصغير واكتشفت اني مانسيت شي من الي صار لي 😂 واعذروني ع الاطاله معرف اختصر 😅

بالنسبة لأكشن ولادتي بحاول اكتبه ويارب مخي يجمع وافتكر الي حصل لاني للان احس اني مو مستوعبه...