يا زينكم ويازين مشاعركم ولله احلى خوات
كانت رحله حمل حلوه معاكم وان شاءلله ما اقطعكم الين تولد اخر وحده بالسلاامه ♥️♥️♥️
بكتب لكم اكشني دامني فالمستشفى قبل ما اطلع البيت وانشغل مع بنتي والنونو 🥳♥️
طبعا اكشني نصه عارفينه بس بالمفرق ههههه ، اول شي قبل ولادتي بيوم كنت كل ما امشي ينزل على فخوذي ماي والملابس الداخليه دايما مبلله ونزل ماي ع الارض مره وحده الساعه ١٠ فالليل تقريبا بس قلت مو رايحه طواريء بروح العيادات الصباح ع خير توقعته شي عادي .. صحيت ٧ وجهزت ورحت وقلت للدكتوره سوت لي سونار وقالت انا شايفه ان ماي البيبي قلييل بس سوي سونار تفصيلي نتأكد اكثر افضل وسويته ورجعت لها راحت جابت عود ابيض ودخلته تحت وطلع اسود قالت خلاص هذا ماي الجنين ولازم توقعين دخول على تحريض ولاده طبيعيه او ولاده قيصريه اذا لزم الامر، طبعا انا من الناس الخوافه وامشي ع كلام الدكاتره ماجازفت وطلعت وقعت ع الاوراق وتوكلت على الله يجعلها برد وسلام، كملت اجراء التنويم كامله ومثل ماقلت لكم بدلوا لي وعطوني مضاد فالوريد عشان المويه وهزأوني اني ماجيت من امس اول مانزلت يعني نصيحه ولاوحده تهمل اي عارض فالتاسع مهما كان سخيف بنظرها لا يضيع تعب التسع شهور اسم الله عليكم، بعدها بدوا معاي بتحميله طلق صناعي الساعه ٢ الظهر تقريبا بدا الالم الخفيف مثل الدوره ويروح ويجي وكان فاتح من ٢ ل ٣ سانتي الين ٨ فالليل بدا يشتد ويصير بين كل طلقه والثانيه خمس دقايق، حتى كل من يشوفه يقول مسكينه الطلق مره حاممي 😢 وكشفت طلع فاتح ٤ سانتي بس والالم قوي ومتواصل فالبدايه كنت متحمله وبس دموع بس بعدها ولله قمت اصيح بصوت وامي تهمز فيني الله يجعلها بالجنه .. عاد الي منه الخوف صار ان مع كل طلقه نبض الجنين ينزل 😓 وخافوا وزادوني طلق بالوريد الله يعظم الاجرر عشان لازم اولد فاسرع وقت حبيبي تعب من الطلق 🥺 ، بعدها صار الالم هستيري صراحه ماقدرت اتحمل غير اني مربطه بجهاز الطلق ونبضات الجنين والاكسجين و قسطرة و جهاز الضغط 🥴! طلبت ابره ظهر الساعه ٩ ورفعوا للتأمين ورفض وقلت لهم بادفعها كاش بس جيبوها وكان سعرها ١٢٠٠ وشي وركبتها لي الحمدلله خف الالم بنسبه ٧٠٪ بس كنت احس صراحه فبنتي اختفى الالم نهائي بس هالمره مقللين الجرعه خايفين الطلق يبرد والجنين بدا يتعب بس يلا اهون كان مع الطلقات القويه احس بالم بجهة وحده من بطني من تحت .. لما جات الساعه ١٠ ونص كذا فتح ٧ سانتي وقالت يلا بنبدا ندف عشان الراس بعيد شويه ساعدينا ومع الالم دفيت كم مره ونزل راسه الحمدلله بعدها قالت ريحي شوي واخذي نفس ويلا نكمل لان الجنين تعب ، ولله مدري شجاني قمت استهبل عليهم واقول زيدوا لي جرعه المسكن احسس بالم مو قادره ادف وهم يقولون لازم تحسين تحملي 😫، وادف وادف ع الفاضي لاني اتعب واوقف عرقت وصار جسمي حار واقولهم مابي ادف خلاص قالت لي بنساعدك يلا ورقوا ثنتين ع السرير يضغطون ع بطني وانا ادف طلعت روحي من هالحركه وطلع نص راسه بس ووقفت اقولهم مو قادره اكمل قالت حرام عليك راسه نصه برا ونصه داخل بنشفطه قلت شفطيه سوي اي شي وهم يحمسوني يلاا يلاا شوي بعد ومدري ايش وقبل ماتشفطه الا جات طلقه قويه ودفيت وطلععع وسحبت باقي جسمه ياعمري عليه عوروا كتفه شوي من طلع وهو يصيح وبكره الصبح بيسوون له اشعه يتطمنون ع كتفه اذا انخلع ولا حبيب قلبي😢💔 لانها بعد ماقصت لي بس راسه شقني شوي غرزتين تقريبا طبعا كميه الراحه بالولاده بدون خياطه شي مو طبيعي الحمدلله .. المهم بعد ماطلع حطوه ع صدري بعدين شالوه نظفوه وكذا وخذوه الحضانه ماشفته للحين لين بكره الصبح يكشفون ع كتفه اول 😔، وانا بعدها خلوني ٣ ساعات فغرفه الولاده الين جات دكتوره التخدير شالت الابره وخلوني اكل وادخل الحمام وشيكت علي الدكتوره ومعاي الم فبطني مثل الطلق قالت طبيعي الله يعين ، المهم بعدها رقوني التنويم تو وللحمدلله انتهت رحله وهن على وهن بتعبها وكل شي فيها وسبحان من ينسيك التعب والالم بعد ماتشوفين ضناك 🙏🏻♥️♥️
الله يطمن قلبي عليه بكره يارب وعقبال ما افرح فيككم وبقومتكم بالسلامه ياربي
يا زينكم ويازين مشاعركم ولله احلى خوات
كانت رحله حمل حلوه معاكم وان شاءلله ما اقطعكم الين تولد...
ويجعل هل الم اجر وعافية
اي صح بعد الولادة الطبيعيه
راحه ماتنوصف بس اذا خياطه
يقولون توجع ماجربت القص ولا مره