بس سمعت ان بخور المره ماهو زين لأن الفحم فيه مواد مضرة وتدخل الرحم مايصلح.... بس الحين كيف ابدا استخدم غسول المره ؟ لأني ماني متأكده أن الخيوط طاحت تماما أخاف ماهيه زينه

السلام عليكم ورحمة الله


هلا وغلا يا بنات كيفكم. اعذروني ع الانقطاع
ولكل اللي باركوا لي ودعو. الله يبارك فيكم ويسهل عليكم. ويتم لكم العافية والنعمة


واللي ولدوا الف مبروك والحمد لله ع سلامتكم
للحين بالمشفى. بغيت اطلع امس ع مسؤوليتي رفضوا
صاير معي صداع شديد بعد البنج. يجي خاصة اذا قمت من النوم. وضايق صدري مرة ع عيالي تاخرت عليهم. لدرجة ما اقدر أكلمهم بس اصيح. كود اطلع اليوم ويفرجها ربي. ويتم لنا العافية


اللي صلحو قيصري. هل عانيتم من الصداع وهل يطول
احس المشفى متوترين ويعطون مسكان وما يخف الصداع.

مثل ما وعدت بأحداث الولادة. الله يرحم ضعفنا. والله كتبتها ودي تستفيدون منها. خاصة ان الطلق يوم بدا الفترة قصيرة. والحمد. لله الوقت اخر الليل عشان زحمة السيارات ستر ربي بفضله


اخيرا اذا ركاكة في الكتابة اعذروني اكتب في المشفى ومن جوالي. والله يفرجها بحول

مراحب يا حلوات
والله يهون ع الكروشات
ويتم العافية للي ولدوا ولبيبياتهم
مثل ما وعدتكم باكشن الولادة
يوم الجمعة بغينا نطلع للبر بس الجو كان مغبر فرجعنا البيت وأحس اني تعبانة معي ضغط لتحت. بس عادي يتحمل يعني فصلحت العشاء وتعشينا وها الضغط يجي ويروح.
نمنا بالليل ولما جاء الفجر اعلم زوجي يقول يمكن ولادة اقول لا انام ولا هو كهرب الطلق
اليوم السبت عوضنا طلعتنا امس وجلست ارتب الاغراض وأحس بالالم وأقول في نفسي اهون عن الطلعة احس بالضغط. بس قلت احنا قريبين كلها ربع ساعة وأصير بالبيت لو صار شي
اعلم زوجي بالطريق يقول نرجع اقول لا
هذا الالم يجي ويروح لدرجه اذا جاء ما ودي السيارة تلف
نزلنا بالبر ومشيت وها الالم معي بعد صلاة المغرب رجعنا قلت نزلني عند اهلي فيه أغراض ودي أجيبها منهم
وكان زوجي معزوم ع العشاء
فجلست عند اهلي المغرب وتقهويت زييييين مع تمرية ومعمول لان غدا البر ما عجبني😅
لما حطوا العشا خفت من الحرقان ورفضت. اكلت شي خفيف
والالم صار يزود. ع تسع ونص راسلت زوجي تعال تعبانه
بس ما بين طلق
حطني بالبيت وراح يجيب عشا لصغار
الساعة عشر ونص او ربع
بديت احس بالطلق دخلت بسرعة اجهز شنطة عيالي
واضيف الناقص لشنطتي
يوم جاء زوجي قلت بدا الجد. تعشوا الصغار والبسهم بجايم وأروح أخذ دش حار كانت الساعة ١١ ونص
جيت انام ع ١٢
الا يمسكني الطلق الحار قلت خلاص الصغار ماناموا
وانا تعبانة ودهم اهلي. وصحي الشغالة
واستحلفهم ما ابي امي تدري اخاف تشيل هم وهي تعبانة.
جاء معي شوي إسهال وأنتم بكرامة.
يا حبيلك يا ام سلطان في ها الوقت أغلي المويه واحط الخلطة لفتح الرحم ناويه أشربها بالطريق
بعد ما حط الصغار عند اهلي يجي زوجي يمكن قبل وحده ونطلع للرياض
والطلق يزود يوم مرينا حريملاء يقول تنزلين اخاف ما تكملين. قلت قدام.
جاء معي استفراغ وأنتم بكرامة. وهذا الالم والتقلصات تتقارب
ونجي الرياض قال نروح الحبيب العليا قلت ملفي بالريان ابي خالدة
ونمشي يا بنات نزل الالم ع فخوذي وكل الوقت اقول لا اله الا الله. وإذا زاد الالم رفعت صوتي هبلت زوجي
الله يرحم ضعفنا
المهم يوم دخلت قال فيه رجال استتري. وانا وين وانت وين
دخلت الطوارئ وطوالي وقفت من الطلقة بس ما سكة لساني☹️
وتجي الممرضة بالعربة وواتمسك فيها وانا واقفة تقول اجلس اجلس وانا سافهتها من الالم
الا يجي رجال ويحط يديه ع العربية ويطمن وش فيك تسمم والا والله ما ادري وش يقول. اقول ولادة
قال طيب اجلسي
خفت الطلقة أقوله لو سمحت ابعد 😂😂
واجلس.
ويدخلوني كشك الكشف وانزل واتمسك بالعربة
من الالم وأقول عطوني مسكّن. الا فيه طبيبة سودانية قهرتني تقول اجلسي اجلسي تبي تولدي واقفة
اللي يضحك الممرضة واقفة عند الوزن والطول تبي توزن الشيخة
واسفهها انا وين وانت وين
يوم شافوا الوضع جد واصارخ ابي مسكّن ابي مسكّن
قالت السودانية اصبري لما زوجك يدفع الحساب يخافوا ما تدفعوا الفلوس
حقدت عليهم لحظتها بجد
لما كشفت قالت ولادة مفتوح تسعة
طلبت الطبيبة خالدة. قالوا بيتها بعيد وانت خلاص واصلة. ليش ما جيتي بدري. قلت انا برى الرياض.
نجي عند الولادة. بسرعة يدخلوني فيه طبيبة باكستانية شكلها حبوبة بس بسرعة دفي دفي ويطبون كل الممرضات يثبتوني. بسرعة النبض ضعف والجنين متبرز
وأحاول. يهاوشون دفي اقول عطوني مسكّن ما في حيل
يقول البيبي تعبان. الى هم يقولون عملية ليه
عشان ما نتأخر ع البيبي
اسمع ان المخدر نصفي. اقول ابي كلي. خلاص ودي ارتاح تعبت. قالت متى اخر مرة اكلت والله يا بنات ماعاد اذكر شي
قالوا عشان كذا نعطيك نصفي
المهم صراع معهم جتني طلقة وهم يثبتوني بغيت انهبل اصبروا شوي تخف الطلقة بعدين عطون المخدر.
وبعدين خفت الآلام. يا الله ما احقر الدنيا. اقول كيف سكرات الموت
وشكلي غفيت شوي. ودا وقته. فتحت عيوني لبنتي حاطينها ع الطاولة عندها طبيب يكشف عليها وأتذكر كلامكم متوترين عشان النصفي انا من التعب تبلد الإحساس
وأطنشهم وناظر ببنتي واسال الممرضة ولد ولا بنت. قالت بنت
واحسهم يضغطون قوة ع بطني واحرك أطراف أصابعي تتحرك. وكنت اشوف الساعة يمكن اربع ونص
سبحان الله الفترة مرة قصيرة دخلت قبل ثلاث الفجر والحين اربع وثلث والبنت طالعة
ما ادري وش ها العجلة اصبروا شوي يمكن يكون طبيعي. لكن لا اعتراض ع قدر الله
المهم. قالت الممرضة خلاص قيصري والحين خياطة تحت
وشوي الا يغيرون السرير ويطلعوني غرفة الإفاقة
والممرضة تعطين الجوال تقول زوجك بيكلمك. واكلمه وأقول بشر امي. يقول اصبري شوي
شغالتي راحت تنام عند شغالة اهلي ولما قامت امي الفجر جت شغالتهم تعلمها. صدق انقهرت أخبئ عنها وتطلع من الشغالات 😤
لما كلمها زوجي فرحت مرة يا حياتي وتقول علمتني الشغالة وانا ادعي لها
ما درت اني كنت مخلصة. بس الحمد لله. جزا الأمهات الجنة
وطلعت غرفتي بعد ساعة تقريبا والحمد لله ع كل حال
وانتهت الحتوته. ابي أنافس نجمة في طول الأكشن بس ما ضبط اكشن نجمة تحفة😘

ما شاء الله عليك بثينه
الحمدلله اكشنك مريح
و الحمدلله ع سلامتك مره ثانيه و الف مبروك
و الله يحفظ لك بنتك و تشوفينها عروس يا رب