مشمشة جيزان :

وهذا الاكشن يوم ١/١ كان عندي موعد متابعه كالعادة قبله بيوم نزلت مني افرازات بيضا ناعمة وغريبة وسالتكم هنا عن الافرازات ماكنت ادري انها بداية ولادة صباح اليوم الثاني بعد ماخلصت صلاة الفجر انفكت الموية فجأة 😭 وخفت ومت من الرعب لان الكمية كثيرة وبعدين رحت موعدي في المستشفى والمفروض اروح الطوارىء وقلت للدكتور عن المويات انها نزلت وجا بيفحصني ورفضت طلبت دكتورة وفحصتني وطلع الرحم مقفل بس قالت خلاص انتي ولادة يلا نادي زوجك عشان يسوي اوراق الدخول والتنويم 😭😭 جاني خوف مو طبيعي وهما يودوني على جناح الولادة وقرروا ان يعطوني طلق صناعي على شكل شراب مخفف على جرعات ١٢ جرعه لمدة ٢٤ ساعة وبعد ٣ جرعه بدا الرحم يفتح شوي شوي بس طولت مرة لان الطلق مخفف مرة وقعدت يومين على ٣ سم بعدها اعطوني ابرة ترخي عضلة الرحم والحقنة الشرجية وبعدها زاد الالم على فجر امس السبت وصل الرحم ٤ سم وعلى طول ودوني غرفة الولادة قلت للدكتورة بدري لسا انا ٤ قالت لا انتي ولادة خلاص وكل الموية نزلت لازم نراقب الجنين لان حركته قلت والنبض بدا يخف قلت خلاص اجل سويلي عملية رفضت قالت وضعك يسمح طبيعي وجلست في غرفة الولادة من الفجر الين ١ ونص الظهر وجبت اجمل نعمة ربي اعطاني اياها والحمدلله اني ولدت طبيعي بالنسبة للدفع كنت ادفع تمام في البداية بس بعدين مدري ايش صار طاقتي راحت ودفعي صار غلط وجووني الممرضات ضغطوا على بطني وجلست ادفع وادفع الين طلعت بنتي وماكنت مصدقة كانو حلم سبحان الله واقولهم خلاص انا ولدت قالوا ايوا ماما خلاص انت شوف بنت ماكنت مصدقة وارتحت راحه عجيبة بعد طلوع الراس الحمدلله الحمدلله وفي الحمام الله يكرمكم طحت طيحه قوية شكلي كنت دايخه مع اني لمن قوموني على الحمام حسيت نفسي تمام وجووني الممرضات جري على الحمام وماخلوني اقوم قالوا اجلسي شوي وجابولي عصير وشربت وقوموني والحمدلله على كل حال شوفوا يابنات على قد ما الولادة تعب الا انها تساهيل من الله وكنت مع كل طلقة امسك نفسي وادعي يارب هون الولادة وسهلها عليا والحمدلله تيسرت معايا فلا تسمعون اي كلام يغثكم ويحبطكم ومو لازم صراخ ترا الصراخ هوا الي يعسر الولادة ويخليكي تبذلي مجهود فوق مجهود الولادة وتتعبي انتي والجنين وكل ماجات الطلقه اذكروا الله وبتشوفون كيف تتسهل وعقبال ان شاء الله كل الي في التجمع يقومون بالسلامة وتفرحون بشوفة عيالكم 💜💙

وهذا الاكشن يوم ١/١ كان عندي موعد متابعه كالعادة قبله بيوم نزلت مني افرازات بيضا ناعمة وغريبة...