نونه روحي يا قلبي كذابيين والله بس يقولون كذا روحي مع واحد لسانه طويل وملعلع والله يدخلونك بالقوه ويحطون لك غرفه خاصه لو تبغين لا تجلسين تنتظرين روحي

👍
كل الحكومي كذا كريهين
تعالي لهم بالقوة او جيبي واسطة يطلعون لك غرفة كاملة مو بس سرير

نونه لاتكتفي بالاتصال روحي المستشفى بنفسك ممكن مافيهم حيل لاحد ولايبو يولدوا يقولوا مافي بس لو جيتي المستشفى بنفسك غير وكمان خبريهم ان معك سكر وكم لك اسبوع عشان يهتموا
الي مايهتم ويروح بنفسه هما كمان مايهتموا ويقولوا مافي
روحي احسن وشوفي

كيفكم بنااات
لكم وحشة والله
الف مبروووك للي ولدو وحمدلله على سلامتهم
و الله يسهل للباقيين
الله يرزقكم الولادة السهلة الميسرة و يسخرالدكاترة و الممرضات اللي يخافون الله فيكم 👐
جد يا بنات الولادة تساهيل من رب العالمين
و المستشفيات و الدكاترة مجرد اسباب
من بعد اللي صارلي في ولادتي اقتنعت بذا الشي
و ماصرت اهتم على اسم المستشفى اذا معروف او لا
الحمد لله على كل حال
شويات و اكتب لكم اكشني
و الهجوولة اللي صارت لي 😭😭

بسم الله نبدأ 😅
بدأ معاي الطلق صباح يوم الثلاثاء تقريبا عالساعة 10
و قبله نزلت مني مويات خفيفة و افرازات لزجة و فيها خيوط دم
بدأ الطلق منتظم يتكرر كل 3 دقايق بس الالم خفيف و محتمل
طلعت الحوش و مشيت تقريبا 20 دقيقة عشان يستمر الطلق خفت يروح زي كل مرة
و سويت حليب دافي بالعسل و الحمدلله الطلق مستمر
قبل الظهر ارسلت لزوجي لايروح مشواير بعيدة عشان اذا احتجت المستشفى لايتأخر علي
المهم جا الظهر و الطلق صار بارد و بين كل طلقة والثانية 5 دقايق و مرات 10 دقايق جاني احباط و قمت امشي و بعده اخذت دش دافي و ركزت الموية على ظهري و شربت اشيا دافية و الطلق مازال بارد
تعبت و نمت شوي و صحيت العصر و الطلق اختفى 😭 ماصرت احس شي
دقت علي امي وقالت تعالي عندنا اذا انتي تعبانة
قلت لها الطلق راح شكله مافي ولادة
المهم قلت بروح لهم اغير جو ومنها احط عندها العيال وامر المستشفى اكشف عالرحم اشوف وضعه لاني مخلصة شهري من يومين
المهم نروح ونتقهوى عند اهلي و نسولف ويجهزون العشا و انا الطلق رجع مرة ثانية و بينهم 3 دقايق
وصبرت ما استعجلت عالمستشفى عشان لا يدخلوني عالعمليات بما انه بكري كان قيصرية بس الثاني طبيعي
و اختي عنلت لي كاسة يانسون و بعدها عالحمام الله يكرمكم اسهاال و بعدها خلاص زاد الالم ماقدرت استحمل و اكلم زوجي و نطلع انا وياه على مستشفى بخش بس قال زوجي خلينا نمر عالحديقة اللي جنبها تمشين شوي احسن و نروح و يادوب ربع ساعة و ماقدرت اكمل مشي و ادخل المستشفى عالطورائ و تكشف تقولي مفتوح 3 سانتي
قلت لهم طيب خلاص اصبر و ارجع لكم يكون فتح اكثر
قالت لا بالاول نكلم الاستشاري المناوب و نسأله اذا يقبل انك تولدي طبيعي او عملية!
قلت لها عمليتي صار لها 6 سنوات
و اصلا ولادتي السابقة من 4 سنوات كانت طبيعي وبدون اي مضاعفات
و الولادتين كانت عندكم فالمستشفى و ملفي موجود
قالت الاستشاري رافض نعطيكي فرصة للولادة الطبيعية ، لانك تعتبري تحت مسؤوليته وهو ماكشف عليكي و مايعرف حالتك
طبعا انا رفضت العملية بتاتا لاني فعلا ما احتاجها
الرحم مفتوح و الطلق منتظم و الجنين فالحوض
طلعت من عندهم عالساعة 2 و نص فالليل
و ابدأ الف عالمستشفيات ابغى أي مستشفى يقبلني أولد بس و اتخارج
رحت على مستشفى خالد ادريس و رفضوني
رحت مستشفى المستقبل و كمان رفضو يستقبلوني
رحت مستشفى جامعة الملك عبدالعزيز القسم الخاص كمان رفضو يستقبلوني 😣
طبعا حجتهم انه ماعندي ملف عندهم او انه مافي سرير متوفر
و انا خلاص حاسة اني راح أولد فالسيارة من الالم و مرتفع ضغطي من المستشفيات الخاصة الله حسيبهم بس
و طول الطريق ادعي ربي يسخر الخير وين ماكان و يسهل ولادتي و يحفظلي بنتي و اردد ربي اسألك هون الطلق و حسن الخلق
و يقول زوجي شكله مافي غير مستشفى جدة الاهلي
لاني سبق ورحت لهم فالسابع عملت تحاليل و اشعة و فعلآ
ادخل عالطوارئ و الحمد لله اخيرا انسدحت على سرير 😅
عالساعة 3 تقريبا و تكشف عالرحم ويحطولي التخطيط و يروحون ويخلوني تقريبا ساعة اتألم و ماطلعوني للولادة لسى مدري وش منتظرين يقولو مفتوح 2 سانتي بس انا احس بالم واحس تقلصات فمنطقة العانة و حاسة انه الولادة قربت
المهم يطلعوني عالملاحظة و يقولو غيري ملابسك و فعلا حسيت البيبب راح يطلع وانا فالحمام و اغير ملابسي و ارجع بسرعة عالسرير من خوفي
و تجي تكشف الدكتورة واشوف عيونها طايرين انفجعت طلع الرحم مفتوح كله و تخرج من عندي تجري تنادي الممرضات و بسرعة يسحبوني على سرير ثاني و يقفلو رجولي و يقولو لا تتدفعي ابددا و خذي نفس عميق
و يطلعوني غرفة الولادة و اول ما اجي اتحرك ابغى انقل عالسرير الثاني تنفتح موية الراس و انا من خوفي انقزز على السرير الثاني مدري كيف جاتني الطاقة 😅
و الحمدلله دفعت دفعتين و طلعت بنوتتي و سمعت صوتها وخلاص نسيت كل اللي مريت فيه و احمد الله و الممرضات و القابلة فرحانين عشاني لاني قلت لهم عندي اثنين اولاد وهذي اول بنوتة
و الدكتورة وهي تخيط تقولي السنة الجاية تجي و تولدي البنت الثانية اقولها بعد عشر سنين ان شالله 😂
الحمدلله كانت ولادة ميسرة و سريعة من الهجوولة اللي صارت
دخلت الساعة 3 و الساعة 5 ولدت وخلصت 💟
ياربي لك الحمد آولا و آخرا
معليش كثرت حكي 😅