اهلين فيك ياعمري00
0(طهرت)بعد استفسارات وتدقيق لي اسبوع
بس مافييييييييييييه 000000الين مااتزبط واتكشخ 00


يوم الاحد الجاي اخلص اربعين يوم

اسعد فتاه ان شاالله وانتي طيبه لاتستعجلي ع رزقك مثلي قبل 000الله ع ذيك الايام محلاها وان معكم يوم بيوم كأنها حلم

ناريمان
الشر مايجيك ان شاء الله
عتوبة
ماشاء الله والله الايام تجري امس تشتكين من الحمل واليوم تصبغين شعرك ماشاء الله عقبالنا يارب

ليلوسا هلا ياقلبي ايه والله خلصت التاسع الحمدلله لي اسبوع ادعي لي ربي يفرجها قريب

وجده الحمدلله احسن

عتيبيه اخبارك والعتبان ياحبهم للاشقر بعد الولاده >>>بنت عمك تعرف ^-*

ام بسوم اخبارك

مساؤكم ورد ياحلوات ,,,

أنا وحده رشيقة تسلم عليكم <<<< ماتقهركم أبد ...

إذا ودكم بقول لكم أكشن الولادة .. << بالقوة ..


أول شي ..
كل الأسبوع اللي فات (قبل الولادة) .. كان بطني يتحجر 3 مرات في اليوم تقريباً ..
يوم الخميس من الصباح كنت عند أهلي .. وقاعده أرتب معهم غرفة النفاس حقتي ..
وشيل وحط .. وأنا مجتهدة أبغى أووووووووووولد هالويكند ..

(طبعاً كل هذاك الأسبوع وأنا أدعي بكل صلاة إني أولد هالويكند .. عشان ألحق على الإجازة .. والظاهر هذا الشيء الوحيد اللي نفعني)

المهم .. على إني بنام عند أهلي هالليلة .. دق على زوجي قال أنا جاي .. لأنه يمكن يروح للطايف .. وخايف إني أولد وهو مو موجود .. وكان وراي كم مشوار أبغى أقضيها ....
قمت الجمعة الساعة 11 على ألم ظهري .. وقومت أبو الشباب ورجعت نمت .. ماقمت إلا عالساعة 1 .. ورحت أتروش .. قلت كانه طلق بيحمى .. وإذا مو طلق بتهدأ الأمور ..
طلعت من الحمام على دخلة أبو الشباب .. قال وش رايك نتغدى برا ؟؟
قلت والله ماعندي مانع .. بس إني مشتهية تشيليز .. قال خلاص .. عندك مشوار ثاني تبغينه ؟ .. قلت أبغى أغراض من الصيدلية ..
واتفقنا نروح للمطعم والصيدلية وبعدين عند أهلي .. عشانه بيمشي الليله ..
وحنا في الطريق .. ساعة كاملة وأنا يجيني طلق كل 5 دقايق .. وبعدها برد .. وحنا في المطعم نفس الحالة .. قال زوجي تبين نروح المستشفى ؟؟
قلت أول نمر الصيدلية .. ومرينا يمكن 4 صيدليات وخذت اللي أبغى منها .. وبعدها على المستشفى .. طبعاً ما كنت متوقعتها ولادة .. بس كان ودددددددي أولد ...

رحنا للطوارئ بمستشفى دله .. وأرسلونا لطوارئ الولادة .. كشفت علي الدكتورة المناوبة (سودانية) .. قالت لي : 3 سانتي .. بداية ولادة .. ويقعدوني على الكرسي العربية .. "هنا طقتني أم الركب .. جتني روعه .. ماتوقعت الدعوة بسرعة كذا.. بغيت أنحاش" ..

المهم دفتني الممرضة ومرينا على أبو الشباب .. وأنا ما أقوى أتكلم من الروعه .. خانقتني العبرة .. قالت له الممرضه رح خلص الأوراق بعدين تعال عندنا بالدور الثالث ..
ويرقوني فوق .. وقالوا غيري ملابسك .. وعطينا تحليل بول "الله يكرم القارئات" .. وأنفذ المطلوب ويسدحوني عالسرير .. ويحطون علي جهاز الطلق والنبض .. وش حليلهم الفلبينيتين اللي كانوا عندي .. يسألوني أول بيبي .. ويبتسمون .. وكل شي بالطيب "أهم شي" ..
جت كشفت علي المناوبة اللي فوق "شكلها سعودية" .. قالت 1 ونص .. قلت شكراً .. اللي تحت تقول3 .. قالت : يمكن قاسته وقت الطلق .. وانسدحت وعطتني الإبرة الشرجية وركبت لي إبرة المغذي .. جتني عقب 7 دقايق .. وفكت الجهاز .. وأنا رحت لدورة المياه وصليت المغرب .. ورجعت لمكاني .. وحطت الأجهزة .. ودقيت على أبو الشباب .. قلت وينك .. قال وصلت عندك وقالوا كمل الأوراق أول ...
المهم كمل الورق وجاء عندي .. قال وش أسوي "ياحليله ضايعه علومه" .. وأنا الطلق مابعد اشتد مره .. قعدت أسولف شوي .. قال أدق على أمك ؟؟ .. قلت ولا تدري .. وش تجي تسوي عندي .. تتفرج ويضيق صدرها وبس !!
وجت الممرضة عطتني محفز للطلق .. في المغذي .. وبدأ يشتد الألم .. قلت لزوجي إقرأ علي سورة يس .. قعد يقرأ الله يجزاه بالجنه .. ويمسح على راسي .. بعدها جت المناوبة السعودية .. وقالت بفتح لك موية الراس عشان يحمى الطلق .. وتفتح لي إياها وقت الطلقه .. بغى يغمى علي .. وزوجي قال أطلع .. قلت اقعد وانت رجال .. شف اللي تبي بس لا تخليني ..
طبعاً زاد الطلق .. بس ما انفتح الرحم إلا 2 سم .. قالت الدكتورة زودي الطلق وعطيها مسكن .. وتزود الطلق وتعطيني أكسجين .. هنا بدأ الألم .. أتألم ودمووووع .. وزوجي يقرأ علي راحمني ..
أذن العشاء .. وكان وقت استراحة بين الطلقتين .. قلت لزوجي رح صل وجب معك تمر وحلتيته .. قال طيب ..
طلع الرجال .. وأنا اللي أطلق لحالي .. جت الممرضة وزادت الطلق وعطتني مسكن في العضل .. صرت أدوووخ وإذا جت الطلقة طرررت من الألم .. المشكلة لو يخلوني أنزل من السرير وأمشي أرحم لي من النوم عليه .. وأخاف أتحرك بقوة ويحرك جهاز الطلق والنبض .. جت وأنا دايخه قاست .. قالت 5 سم .. بعدها أنا بين الوعي واللاوعي .. بس الألم شاااااد حيله .. جت ثانية شافت قالت 8 سم .. قالت لي الممرضة إذا حسيتي كأنك بتتبرزين "الله يكرمكم .. بس لا حياء في الدين :) " اضغطي الجهاز .. ما أمداها تطلع إلا وأنا ضاغطته .. قالت : يله ولااااااااااااااااادااااااه .. إذا حسيتي بالدفع إدفعي .. وهم يطلعوني من الغرفة لغرفة الولادة .. وتقول لي الممرضة دقي على زوجك .. هو قال دقوا علي قبل الولادة .. وأنا اللي أدق وأقول له : خلاص بولـــ..... ماعاد طلع الكلام .. قال خلاص خلاص جاي ..

وهناك نزلو السرير من تحت وأنا أدفع مع الطلقة .. تقول لي الممرضة تعدلي "أنا نايمه على جنبي" .. وأنا ما أقدر أتحرك ... مانيب في وعيي .. وأحاول شوي شوي .. وتساعدني ووصلت نص السرير وصرت على ظهري .. ورفعت رجليني .. وتقول لي الدكتورة السعودية إذا جاك الألم إدفعي .. وأنا اللي أطبق اللي تقول .. وكل ما جيت أصرخ تقول لي لا تنفسي .. وأنا أقول لها معليش معليش .. وأحاول ومااااسكه نفسي عن الصراخ .. والحمدلله بعد الدفع طلعت الطفلة القميلة .. ودخلوها في وجهي وبعدها ماصاحت .. وينظفون فمها وخشمها وهي في وجهي .. وأنا أقول ليش ماتصيح .. يوم دريت وتصرخ صرخة الحياة .. هنا نسيييييييت كل شي وقعدت بس أناظرها .. سبحان الله العظيم والله شي عجيب .. شعور لا يوصف من الفرحة والراحة والإمتنان لله سبحانه .. في هاللحظة دخل زوجي .. وبغى يرجع .. قلت له : تعال .. وأنا بين الحمدلله وياربي لك الحمد .. جاء وسلم علي .. قلت له رح شف البنوته .. طل عليها وتأملها .. وحبها ..
وأنا قاعده الدكتورة تخيطني .. طبعاً عطتني إبرة مسكن .. دقيت على الماما وبشرتها .. وهي اللي طاااارت من الفرحه "الله يخليها لي يارب" ... والأخ الفاضل قام يبشر أمة محمد .. وأنا توني بغرفة الولادة ..
خلصت الخياطة ومسحتني الممرضة وغسلتني .. وطلعوني على جنب .. عشان تشيك الدكتورة بعد ساعة .....


والحمدلله .. تمت القصة بسلام .. النهاية ..



بس الشعور ذيك اللحظة لا يوصف .. الله لا يحرم مسلم من هالشعور يارب .. ويرزق كل محروم بالذرية الصالحة ..
الله يهون عليكم جميعاً .. ويرزقكم الولادة السهلة الميسرة ...

نصيييييييحة ....
أنا من دخلت السادس .. وأنا كل صلاة فجر وعصر .. بالسجود .. أستودع الله نفسي وزوجي وجنيني .. وأدعي الله بالولادة الطبيعية السهلة الميسرة ..
والحمدلله .. منّ الله علي بالصحة والسلامة وكل شي تمنيته ...
لاتغفلون عن الدعاااااااااااااااااااااااااء ..


أشوفكم بعد قراءتكم للقصة .. وأنتظر التعليق ..

(ملاحظة: أنا ما استخدمت ولا محرض ولا حتى مشيت .. بس الحمدلله تسهلت من الله)

bead ماشاءالله اكشن من جد تساهيل الله يخليها لكم يارب