بقولكم اكشن ولادتي بولدي الثاني😁
من اول ماحملت وعرفنا ان ولادتي في رمضان وزوجي يتريق عليا يقول لا تولدين وقت الفطور خلي نتهنى 😒
المهم من شعبان وانا شنطة المستشفى في السياره كنت متأمله اولد بدري و جاء رمضان وانا لسى على حالي مافيه اي بوادر ولاده الين الاثنين٢٠ رمضان رحت مراجعتي في الحكومي قالي الدكتور اتوقع ولادتك بعد اسبوعين ممكن عالعيد انا وقتها تحطمتتت واخرج من عنده وهااااتك ي بكاء وانهيار قلت لزوجي وديني الخاص اللي ولدت بولدي الاول عنده ( على اساس بيولدوني هما وهو التسهيل من ربي ) المهم رحت للدكتوره وكشفت عليا قالت لسى عنق الرحم سميك ومفتوح ٢ سم علما انه كان اخر يوم في التاسع المهم وصتني وصيتين لي ولزوجي 🌚 وخرجت من عندها ..
مر الثلاثاء مافيه اي بوادر ولاده الين العشاء طبقنا نصائح الدكتوره بذمه وضمير عسى تفيد🙈 ومر الوقت ومافيه شي يذكر قمت قلت مافيه ولاده اكيد وطبخت السحور وتسحرنا الساعه ٣ الفجر واذكر ان كان فيني كسل عجييب لدرجة انسدحت عالكنبه ماقدرت اشيل السفره المهم اذن الفجر وصليت وخلصت شغلي زي كل يوم مستنيه لللولاده عاد كانت عندي طقوس كل يوم اطلع الزباله الله يكرمكم واقفل عالغسيل واغطي الغساله واظفر شعري في حال جاتني ولاده يكون مرتب متأمله مايطير 😂
المهم جات الساعه ٦ الفجر وانا احس بالم غريب يمسكني من ظهري ومن الحوض ورى كأنه شي يدف جسمي لتحت ويعصر العمود الفقري وانا ماقد جربت الطلق الطبيعي بولدي الاول ولدت بطلق صناعي حار ورى بعض.. جلست الين ٨ يمكن في الصاله مستغربه الالم وماجاء في بالي ولاده ابداا المهم خرج زوجي لقاني برا قال اش فيك قلت ماادري الم غريب فيني يمسكني ويروح قال اوديك المستشفى قلت لا استنى مااتوقع ولاده دخلت الغرفه حاولت انام ماقدرت كل مانمت صحيت على الم اقوى وكان يجيني كل نص ساعه تقريبا الى الساعه١١ زوجي غصبني الا نروح المستشفى الحكومي اللي جنبنا نشوف ورحت اول ماكشف قالي واحد ونص 😓 ومافيه اي بوادر ولاده والله انه لما خرج يده كلها دم تكرمون و لا ومن قوة الثقه نادى زوجي يأكدله قال لا تجي الا بعد يومين على اساس يعلم الغيب والله وصدقته ورجعنا البيت وانا لسى تعبانه ومريت على خالتي ام زوجي تحت ي عمري قلقت مره وسوت لي شوربه قلت لها صايمه قالت عادي افطري انتي تعبانه ويمكن وراك ولاده مابتقدرين وانتي مااكلتي المهم ذقت منها لقمه ماقدرت اكل شي يومها حتى تمر ماقدرت ماله نفس جلست اتقلب عالسرير كل ماغفيت صحتني طلقه واجلس اطبق التنفس والله يا بنات مفعوله عجييب يخفف الالم ويشغلك عن التفكير فيه وزوجي ينام ويصحى على شفطي للهواء 😂😂
الين قبل العصر دق على امي قالها شوفي بنتك تعبانه شكلها بتولد ومعنده ماتبغى تروح المستشفى وكلمتني امي واقنعتني قلت اصبروا طيب نصلي العصر ونروح استنيت الاذان ودخلت تروشت بمويه دااافيه شبه ساخنه وسويت تمارين القرفصاء واشوف الافرازات المخلوطه بدم تزيد وخرجت صليت العصر وانا اصلي جاتني طلقه قويه جلست اعصر نفسي ماادري كيف خلصت وعاد نزلت ولدي لام زوجي وخرجت مريت على امي ورحنا المستشفى الخاص اللي رحته قبل يومين وهو يبعد عن بيتي ٥٠ د وطول الطريق يجيني طلق منتظم كل ٥ د وبعدها كل ٣ د وانا بس اتنفس اشم ورده واطفي شمعه والالم يزززيد وخايفه اولد في الطريق وماابغى اخوف امي معايا واول ما وصلت على طول دخلت الكشف قالت النيرس ٨ سم خلاص ولاده وركبوني العربيه وطلعوني فوق قسم الولاده وسووا استدعاء للدكتوره وقتها اول مادخلت على طول استسلمت شلت ملابسي بنفسي 😂😂عكس اول ولاده حرب صارت
والحمدلله يمكن ساعه وربع جلست ادف وتورطت ماعرفت نفس ولادتي الاولى مارضي ولدي يخرج مع ان وزنه كيلوين و ٨٠٠ غرام الين ساعدوني النيرسات وسبحان الله طلع ولدي على اذان المغرب زي ماكان يضحك عليه زوجي 😂😂
تقول امي بشرونا واحنا نفك صيامنا واحد الله يجزاه خير جابلهم تمر ومويه ..
والحمدلله كانت ولاده ميسره يارب لك الحمدلله والى الان اتحسب عالدكتور الاول لو عاندت وسمعت كلامه كان ولدت في البيت ولا السياره ..
مجلد الله وكيلكم مو سالفه 🌚
بقولكم اكشن ولادتي بولدي الثاني😁
من اول ماحملت وعرفنا ان ولادتي في رمضان وزوجي يتريق عليا يقول...
او انتظريه برا وقولي له يلا سوي الكيكه وبعد ما يخلص ادخلي غسلي له