رحت امس مستشفى اللي قريب من بيتي الساعة ٧المغرب
دخلت الاستقبال شافت الكرشة ناطة 🌚
سالتها ابي دكتورة نساء وولادةقالت بتولدين 🌚😭خرشتني قلت لا براجع بس قالت اللحين بس استدعاء ولادة
دوامها من ٨ص الى ٥ العصر


بروح اليوم والله ييسرها ❤️❤️

اقرا سواليفكم دايم واتحمس ارد بس يعلم الله اني طول الوقت مشغولة بالادوية وتحليل السكر والمراجعات وبنتي الصغيرة ..


الي تعبانين ربي يشفيكم ويعافيكم ويكتب اجركم
نورين
ربي يسهل لك ويقر عينك بشوفة جنينك هانت الحمدالله قربتي للتاسع ماعليكم خوف


وفيه
البواسير معروفة اخر الحمل وبالنفاس ربي يعينك بس اذا لها علاج الان سويه عشان ماتزيد عليك بالنفاس


والبنات الي معهم تحجر
انا من بداية السابع معي تحجر يمسكني باليوم مرتين وبشكل قوووي مره واذا وقتها بأصلي اضطر اصلي على كرسي لين يفك
رغم اني مااحس بمغص او بوادر طلق بس اعتقد الجنين يتجمع بمكان واحد او يتحرك بقوة او يضغط بأعضائه عشان كذا نتعب ..

بالنسبة لموضوع الاستقبال والتوزيعات


انا ببنتي سويت استقبال بالمستشفى واخذت جناح كبير وصبابة وصواني وعلب ماء مطبوعة ومفرش وتزيين للجناح كامل من احسن مايكون لاني جبتها بعد تأخير وعلاج بس بعذ الاستقبال بيومين جتني بكتيريا وجلست بالعزل ١٠ ايام وبنتي مع امي بالبيت قلبي تقططططع عليها كنت اصيح دم من شوقي لها ومن التعب بنفس الوقت لان الجرح انفتح من الطرف وصار يصب صديد بشكل مفجع تقولون بلونه انفجرت لين استدعوا لي دكتور امراض معدية مسك حالتي وتحسنت بعد ماكانوا ناوين يفتحون العملية من جديد وينظفونها بس مع تركيز المضادات والعزل التام تحسنت وقدرت اطلع بس بدون لا ارضع بنتي 💔 اخذت لي درس محترم لان وقت الاستقبال العالم رايحة وجاية وضيوف وريحة عطور وكل شوي ارفع نفسي أسلم لين تعبت


الحين مالي نيّه اخربط ابد 🤭 لا علب ماء ولا توزيعات .. استقبال الأولين .. صينيية تشوكلت وصينية موالح وعلب ماء عادية ومجلس مرتب وبسسسسس مدري وقتها كيف بتكون صحتي او صحة بنتي
غير موضوع الكورونا بحاول اعتذر ب رسالة محترمة عن الاستقبال بسبب الكورونا واخليها للصديقات
اما اهل زوجي وخالاتي اكيد بيجون حتى لو اعتذرت بس رسالة الاعتذار للصديقات والناس الرسمية عشان مااتعب واتعب امي باستقبالهم لين ارجع بيتي وانا بخير بعدها الي بيجي حياه الله

اما من ناحية التجهيزات مخبية ملابس بنتي الغالية والنظيفة بشنطة وتفاجأت اني حاطة ٢٤ بربتوز مابين مقاس ٠ الى مقاس ٦ شهور 😂 وكلها من نكست و سنتربوينت كنت مهووسة بالمقاضي من فرحتي فيها
الافرولات لقيت ٢ صغار و ٢ حقت عمر شهرين ف طلبت زيادة من ماماز اند باباز ٣ مجموعات كل مجموعة فيها ٣ افرولات
يعني ٩ ، اخذتها مع التخفيض ب ٢٨٠ بسسس 🤭♥️ من موقع نسناس والشكل يهبببببببل الوان محايدة لاني مليت من الوردي بمقاضي بنتي البكر
ولقيت كم قبعة على كم شراب و ٢ مهاد و ٤ بطانيات ثقيلة و شنطتين .. والله طلعت حرمتن سنعه 🤭😂 يعني باقي لها بس ربطات شعر لزوم الكشخة وطقم كامل حلو اذا جاني احد واغراض الصيدلية
والعربية اخذت لها وحده تهبببل من الانستقرام نفس موديل عربيات ماماز اند باباز الي على ألفين شوي بس لقيتها ب ٦٠٠ 👏🏻 بوريكم الصورة والحساب


وانا طلبت لي كم بجامة مع ارواب وسليبر وشرابات ملونة من شي أن بس احتاج زيادة بجايم وسيعة وكلوتات وسيعة عشان العملية وكم قميص يهفهف اذا حسيت بالحر

مالقيت خانة اضافة صورة 🤭 مدري معلق ولا وش السالفة


الزبدة هذريت عليكم واجد طلعت سوالف الثلاث الشهور الي اختفيت فيها 🏃🏻‍♀️
لو امسك خط بخلص تجمعين ورى بعض 🏃🏻‍♀️