بنت خالتي قد قالت لي اذا تعبت اسنانك وانتي حامل روحي المستشفى وخبريهم انك حامل يعطونك بنج خاص بالحوامل .. تقول انا تعبت اسناني مره في حملي ولما رحت المستوصف قالو بنعطيك بنج حوامل وتقول الحمد لله مشت اموري تمام وما جاني ضرر لا انا ولا الجنين

بنات على طاري الخشم المنتفخ


وحده من قريبباتي معي بالقروب قد قالت قالت مره بنات تحسون خشم نوال منتفخ والا نفس ماهو .... انا انصدمت لما جيت اقرا كانو يحشون فيني اثاريهم هههههههههه
جتني ضحكة وصدمة فنفس الوقت .. الحين وش دخل خشمي تقولون عنه كذا
شوي قالت لان قريت معلومة ان الوحده اذا حامل ببنت يتغير خشمها ويكبر لان البنت تاخذ حلا امها ونفس الكلام الي قلتوه
كلهم قالو لا مالاحظنــا .. قالو خلاص اذا جا العيد خل نركز عليها ونشوف .. .
ولما جا العيد وصرت بعيد معهم احد الايام حطيت مكياج وكنتور عشان لاحد يتكشف شي جديد بعد .. والحمد لله وقتها ماحد قال شي


بعدهــا اجتمعت انا وجاراتي وانبسطنــا مع بعض وكذا .. وبعدهـا باسبوع زرت وحده فيهــم .. قالت لي عرفتي وش ببطنك .. قلت لسا ما تأكدت
قالت انا وفلانه كنــا نسولف عنك يوم نجتمع احنا والجيران وقلنا شكلها حامل بولد قلت وش خلاكم تقولون كذا .. قالوو واضح من خشمك لانه كبر عن قبل وتغير
انا انصدددمت أكثر


قعد اقول بيني وبين نفسي الحين كل الناس ملاحظة خشمي متغير وانا كل يوم قدام المراية مالاحظت .؟؟
قلت ترى حيرتوني من الي يكبر الخشم البنت والا الولد لان فيه ناس قالو لي نفس الكلام ويقولون اني حامل ببنت .. قالت لا معروف انه الي حامل بولد ينتفخ خشمها ويكبر .!!
قلت طيب


بعدهـــا بكم يوم كنت اسولف انا وزوجي .. وقال لي لاحظت عليك جسمك متغير ومحلوو مع الحمل والكرشــة ..
قلت كويس انك لاحظت اني سمنانة .. << لان انا طبيعة جسمي نحيفة شوي
قال ايه ملاحظ من فترة خصوصــا طالع لك زغيدات وأرنبة خشمك كبرانه >> فيس يصييييييييييح


انهبلت يوم قال كذا .. قلت انت بعد تقول كذا
قال وشهوو .. قلت ليه تتكلم على خشمي ورحت المراية اطالع خشمي وبديت اوسوس وأسأله من وين كبر خشمي
وهو يأشر يقول شوي من هنـا وشوي من هنـا ..
قال ليه يضيق صدرك ترى عادي انا خواتي كلهم لما يحملون يسمرون وتتغير اشكالهم وخشومهم تنتفخ ترى عادي


قلت طيب خلاص :(


وبيني وبين نفسي قلت بلاك ماتدري الناس كلها تتكلم فخشمي وانت معهم وانا مو ملاحظه ولا أشوف اللي تشوفونه

نوال انا عكسك تمااااامًا
أنا اللي ملاحظة واللي حولي ساكتين
أمس كنت عند اهلي وجات جارتنا وخواتي كلهم موجودين ومحد علق
لاهم ولا أخواني
والله اعلم شكلهم ملاحظين بس يحشون فيني من وراي 😂
ههههههههههههههههه

روحي ياقمر وماعليك الا العافية ان شاء الله
فيه بنج خاص للحوامل ولمرضى الضغط يجي بدون أدرينالين
البنج العادي هو اللي يضر لأن فيه أدرينالين يسبب إنقباضات الرحم ويخافون من هذا الشيء حتى لايصيب الحامل ولادة مبكرة

أنتِ توكلي على ربنا وروحي وبإذن الله مايجيك شيء

الله يبارك فيكم يابنات
مشكورين لكل اللي باركوا لي
ربي لاتحرمني دعواتكم الطيبة
عقبال مانفرح ونبارك لبعض في ولاداتنا


نجمة .. إيش سويتي في الأشعة اليوم طمنينا عليك ؟