حبيباتي بنات أحلى عالم ... :26:
هذا الموضوع يحكي معاناتي مع سكر الحمل .. اللي اكتشفت اني مصابه فيه في الشهر السادس من حملي :44:
باحكيلكم بالتفصيل كل شي سار معاي يمكن يكون في التفاصيل اللي باذكرها فائدة .. لأني بحثت وبحثت ولم أجد اجابة عن كثير من تساؤلاتي في اكثر المواقع ..
البداية ... انا فبداية الثلاثينات وحامل الآن في منتصف الشهر السادس .. لم يسبق لي الإصابة بالسكر في حملي باطفالي .. بالرغم من أن السكر وراثي في عائلتي الأم والأب واحد أخواني واحدى أخواتي ...
ذكر لي الطبيب في حملي السابق اني معرضة وبشدة لسكر الحمل لأسباب ورراثية .. ولأن نتائج التحاليل قريبة من الحد الأعلى للسكري الطبيعي في الدم... وكنت حريصة على عدم الإكثار من تناول السكريات ..
في هذا الحمل .. وكالمعتاد اجريت تحاليل للإطمئنان بشكل عام .. وسألتني الطبيبة ( الله لا يسامحها :mad: )
تحسين بدوخة أحياناً .. وارهاق .. قلتلها ايوه << بالفعل كنت اعاني من خمول ودوخه خاصة بعد الأكل
قالت .. اذا جاتك دوخة كلي شي فيه سكر او اشربي عصير لان السكر عندك نازل ..
قلتلها .. غريبة انا العاده يحذروني من ارتفاع السكر ..
قالت لا خذي راحتك لا عندك سكر ولا شي
وانا ما صدقت .. واخذت راحتي بزيادة افطر كندر واتقهوى على كنافة والثلاجه لازم فيها جاتوه او تشيز كيك للسهرة .. وفحالة ما فيه شي جاهز .. تمر أو معمول يعني طحت فالحلا ..
هذا الكلام على نهاية الشهر الرابع ...
فبداية الخامس بدأت اراجع فالمدينة الطبية .. لأني كنت انتظر افتح ملف .. وبالفعل فتحت الملف وبدات المواعيد وسوو لي تحاليل شامله منها تحليل منحنى السكر
طريقته .. يأخذون عينه من الدم وانتي صايمة ... يعطونك محلول جلوكوز تشربينه وبعد ساعتين يسحبون عينه اخرى ..
وكانت الصدمة .. لما رحت للدكتورة بعد التحليل ب 3 ايام ..
قالت عندك سكر حمل مرتفع .. الطبيعي 7.5 وانتي عندك 9.5 تقريبا :icon33: :icon33:
انا انصدمت وجلست اتذكر التخبيص اللي خبصته الشهرين اللي راحت وخفت بصراحة من تأثير الموضوع على الجنين ..تذكرت موعد الأشعه الصوتية وكيف قالولي ان حجم البيبي اكبر بأسبوعين من المفروض ..
تذكرت صورة بيبي كان فالحضانة مع بنتي زمااان وكيف كان شكله مرررررررره مخيف ويقطع القلب كان مرررره متضخم ووجهه كبير ومتنفخ وعنده صفار وقالتلي أمه انها كانت تعاني من سكر الحمل ...
وجلست ابكي عند الدكتورة خوفا على البيبي :icon33:
طمنتني الطبيبة وقالت عندك اسبوعين للحمية إذا ما نزل السكر نضطر نعطيك انسولين .. وسوت لي موعد مع اخصائية تغذية .. بعد 4 ايام ..
رجعت البيت محطمه وخايفة .. بس كنت مره مصرة وعندي عزيمة قوية اني ما ألجأ للإنسولين .. وبحثت فكذا موقع عن حمية مناسبة ما لقيت شي .. وسرت اجتهد فالتخفيف من السكريات والنشويات لحد ما جا موعد اخصائية التغذية اللي اعطتني حمية (الصورة) أمشي عليها ونصائح عامة باذكرها لكم في طيات الموضوع الأيام القادمة ..
وهنا جدول البدائل يعني اللي مالك نفس فيه فالحمية أو غير متوفر تستبدلينه من جدول البدائل
وطلبت مني اشتري جهاز لتحليل السكر المنزلي .. سعره 300 ريال وعلبتين الشرائح للتحليل ب 100 ريال .. وهذي صورة الجهاز ..
واعطتني جدول اسجل فيه مستوى السكر 7 مرات يوميا .. يعني اسوي تحليل 7 مرات فاليوم :44:
أنا بدات لي يومين .. ولعيونكم بانزل في هذا الموضوع معلومات كاملة عن هذا المرض .. وجدول الحمية .. وصور للوجبات اللي باعتمدها .. وباتابع معاكم كل شي يخص معاناتي مع السكر حتى الولادة إذا ربي اعطاني عمر..
لأني بصراحه كنت اتوقع الموضوع سهل .. لحد ما بدات احتمي واحرم نفسي من الأشياء اللي احبها .. غير تنظيم وقت الوجبات .. يعني معاناة ..
باتابع معاكم في وقت لاحق .. واتمنى يكون هذا الموضوع فيه الفائدة لأي وحده تبحث عن معلومات عن سكري الحمل .. ولأي حامل أتمنى تأخذ الحيطة والحذر وتتابع فمكان ثقه وعند طبيبة ممتازة.. والله يسهل لكل حامل ولادتها ويرزقها بالطفل الكامل الخلقة والسليم المعافى يارب ..
حبيباتي بنات أحلى عالم ... :26:
هذا الموضوع يحكي معاناتي مع سكر الحمل .. اللي اكتشفت اني...
ان شاء الله مو صعب إذا التزمنا بالحمية أكيد السكر بيسير ضمن الحد الطبيعي .. اهم شي الالتزام
واياك اختي
روحي لدكتورة شاطرة وسوي تحليل منحنىى السكر وتأكدي .. وان شاء الله ما عليك إلا العافية
والله موضوعي ما اقصد فيه أخوفكم بس الحذر واجب ...
مو خطأ بس ما يوضح سكر الحمل إلا بالتحليل اللي قلت عليه يعني تحليل صايم بعدين تحليل آخر بعد ساعتين من شرب المحلول
آآآآمين يا رب الله يفرحك بشوفت أحلى بيبي فاتم الصحه والعافية
نفس الكلام قالولي توزيع الوجبات مهمممممممم جدا .. وعدم اهمال اي وجبة وخاصة الخفيفة عشان ما يسير هبوط فالسكر ..
الله يجزاك خير على المعلومات
يا حبي لك مشكووووووووورة عالدعوات الحلوة