انا بفتخ

بس زوجي جالس ع الاب توب وانا معكم من الجوال بس يتركه ادخل وافتخ لكن الله وعلم متى ...

هذا ياطويلات العمر حملي الثاني كان متعب جدا وتوحمت في الشتا وشوفوا انواع القرف وبنتي اللي قبل
كان نومها قليل واكلها اقل ماتاكل ولا ترضع الا بطلوع الروح وفي هالحمل اشتبهوا ان عندي سكر حمل وتنومت يومين
وكل ماجيتهم مراجعه يكون وزني نازل وحجم الجنين صغير ويسوون لي تخطيط انواع البهذله والثقل
وفوق هذا جا موعد ولادتي ولا ولدت وطوفت التاسع واخذت 10 ايام بعده وكان وزن الجنين صغير خافوا ان المشيمة فيها
مشكلة وعطوني موعد للطلق الصناعي كان باليوم ال11 وكان يوم احد وموعدي السبت يعني قالوا بكرا تجين تنويم
توكلت على الله ورحت جهزت شناطنا واغراضنا واستعديت ليوم الاحد
وجا صبح الاحد وقمت على الالم يجي ويروح بس كان زي كل يوم ماشكيت انه ولادة
زوجي قبل يروح للشغل قال تحسين بشيء وجهك متغير قلت لا قال بروح للشغل وبرجع الظهر اوديك للموعد
وطلع زوجي من هنا ورجعت ابي احاول انام مرة ثانية ماجاني النوم وخفت ارجع زوجي من الدوام ولاتجي ولادة
وش يفكني من هواشه
وكل مازاد الوقت زاد الالم قلت بس هذي ولادة وادق على زوجي مايرد هو كان قايل ان بيروح لمزرعة ومافيه ارسال
وشغل زوجي يبعد عن البيت اكثر من ساعة والمستشفى بعد يبعد ساعة عن بيتي حسيت نفسي في ورطة
وادق وادق مافيه فايده صارت الساعة 8 خفت قلت بس بروح لاهلي اخاف تجيني ولادة يدبروني عند امي
وادق على امي دبريني يا امي قالت يالهوي كل اخوانك بالدوامات بشوفهم الا وتلقى اخوي الكبير قريب ويمرني
وفجاءة وانا عند اهلي يدق رجلي الساعه يمكن 10 ويرد عليه اخوي ويلعب عليه قال مبروك ولدت وهو طارت عيونه ماصدق
واكلمه ويجي بسرعة وعلى بيت اهلي ياخذني ومعه الجيب حق الشغل وانواااع المطبات كل شوي احس كرشتي
بتطلع مع حلقي ووصلت يمكن على 11 ونص يوم وصلت برد الطلق يمكن من الروعة
وادخل على الكشف ويطلع 2 سانتي وفيه طلق بالتخطيط وكل شوي كشف والطلق حار والرحم ما انفتح وتجي الدكتورة
الساعة 4 وتفتح كيس المويه هنا انا بغيت انط من الوجع بس بعدها انفتح الرحم وولدت يمكن على الساعة 5 ليته فاتحه
الكيس من زمان ومريحتني وبعد ماولدت المشيمة مارضت تطلع يعصرون ويعصرون ولا طلعت ويدقوني ابرة للمشيمة
ويجلسون يمكن نص ساعة ويرجعون يحاولون وطلعت الحمدلله بطلق ثاني كانوا بيسوون لي تنظيف بس لطف ربي
وهالولادة عرفت فيها معنى الولادة ووجعها صدق مو زي بكري كانت سهلة وعلى طول خلصت
وخلصت من المشيمة وجا دور الخياطة والعذاب وبعدها جابوا بنتي وحطوها على صدري الا ترضعينها ويمسكونها
لي الين رضعت ومسكت الصدر وهم ماسكينها لي وبعدين خلوني ارتاح في غرفة الولادة
وجا وقت الزيارة وطبعا محد يدري اني ولدت لان زوجي لما نزلني المستشفى وخلص اوراقي راح ينام ودقوا عليه المستشفى وجواله طافي << انواع الحرص
وادق على بيت اهله و ابشره واستغربت انه كان فرحان فيها لما جاني مرررة وهو كان نفسه في ولد
الحمدلله اللي ربي رزقه الرضا
وتوته توته خلصت الحدوته

سبحان الله يالنافوره عانيتي كثير كل شي بأجره
الله يكتب لك الاجر
انا حملت بالاول والثاني وانا عمري 14 و15 سنه وعانيت وتعبت بس سبحان الله الثالثه جبتها وانا على 19 بس شفت فيها الموت كان حملها وثقلها وولادتها غير بكيت وصحت من يوم حملت لما ولدت وانا ابكي من الوجع والالم والوحام والطلق بدى معي من اخر السابع وماولدت لنهاية التاسع سبحان الله مع جبت بعدها ولد وكانت ولادته الحمدلله اهون ولاده واهون حمل الحمدلله
فعلا كل حمل وكل ولاده غير عن الاخرى
الله يكتب لنا الاجر يارب

السلام عليكم
كييف الحال جميعااااا
بنات وش فيها ام اكرم مافهمت ولا شي
اللي فاهمه تعلمني فيني تناحه بعيد عنكم
ياربيه نوفي تصدقين ماحب طاري افلام الولاده يقشعر جسمي
ههههههههههه

انا بـحكي لكم قصص ولاداتي بس اختارو الولادةالسهلة ولا الصعبة ؟؟؟