مساء الفل عليكو كلكم .. حبيبتى enn اسم اسماعيل حلو قوى ربنا يخليهولك يا رب
ماما زوزو .. الله يسلمك يا روح قلبي
كل البنات وحشتونى جدا .. يا ترى فين مدام وائل وليه مختفيه كده
احنا قاعدين فى البيت وفشلت انى اقنع هشام يروح للكتور رغم انه تعبان جدا .. اخد فلورست وقال هاتفرج على ماتش ايطاليا واسبانيا وانا نايم ومريح وبكره هابقى تمام ان شاء الله .. اصل انا وهو مشتركين مع بعض فى خوفنا من الدكاترة .. احمد مزهقنى زن زن زن لما دماغى خلاااص .. كل ده عشان ماخرجش النهارده .. ما سكتش غير لما عملتله البطاطس المحمرة حبيبته وبياكلها بالكاتشب اهه ..
بمناسبة البطاطس .. واحده صاحبتى بتحمرها بطريقه جديده .. بتحط الزيت في رشاشه زى الميه وتقطع البطاطس عادى وتحطها فى صينيه وترشها بالزيت وعالفرن وبتقول بتبقى تحفه بس الصراحه ما جربتش انتو ايه رايكم ؟
غير كده كمان بتقولى لو عايزة طعمها يبقى زى الشيبسي بالفراخ رشيها بعد ما تطلع من الفرن بكيس مرقة دجاج فوريه اللي بتبقي زى البودره دى .. بس الصراحه انا باخاف منها .. انتم بتستعملوها ؟

اذيكم يا بنات

وحشتونى جداااااااااااااااا كلكم والله العظيم


بس انا زعلانة منكم محدش بيسأل ابدا لا نانا ومادو ربنا يخليهم ليا ويخليكم طبعا كلكم ليا يارب بجد والله يعلم ربنا بحبكم كلم فى الله

انا طبعا كل يوم او يومين بالكثير بقرأ الردود بس مبينكش فية اى وقت نهائى والله انى اكتب بس قلت هاكتب ولو كل يوم كلمة علشان احس انى موجوده بينكم فعلا

عطر

وحشتينى والله وان كنت حاسة من بين سطور كلامك او حتى من الكلام اللى مكتبتهوش انك واخدة على خاطرك منى او حاجة مش عارفاها بس حاسة حاجة كدا ولا اية؟!!!!

ربنا يخليك يوسف يارب ويكون ابن صالح بأذن الله ويبارك فيه اللهم آمين

على فكرة فية معرض بيبقى حلو اوى فى اسكندرية فى شهر 7 و8 تقريبا على الكورنيش جنب المكتبة بس رايح عن بالى اسمة اسعاره بتبقى حلوة وحاجتة كلها تحفة

ماما ميزو

ماشاء الله عليكى كل كلامك حلو جداااااااااااااااااااا وتعليقاتك ذى السكر واللازمة اللى فى الكلام (حبوبة) حلوة اوى بجد بتعطى لكلامك مذاق خاص

وبالنسبة للخلطات بجد تحفة وبأذن الله هاجربها

آه وعلى فكرة موضوع الايشاربات هااااااااااايل لاء فوق الممتاز ومستنية باقى الأفكار لان عندى كمية ايشاربات كبيرة اوى وفعلا موضتها راحت

ومستنية افكار كمان فى تدوير الاغراض الموضوع دا شددنى جدااااا

نانا

انا حابة اسميك رومانسية الموضوع وعلى فكرة كل اهل الشقية طيبين جدااااااااااااااااا

يمكن معرفتش منهم ناس كثير بس عرفت منهم واحد كان زميلى فى الكلية وفى السكشن كمان كان والله طيبببببببببببببببب وقمة فى الطيبة والاحترام ومثال كدا للناس بتوع زمان فى الادب فى معاملة كل الناس

اما الرومانسية فهى فعلا ممكن تكونى انتى عنونها ربنا يارب يخليلك حبيبك وابنك يارب

الا صحيح فية سؤال عايزة اسألة ليكى انتى عندك احمد ربنا يخلية يارب ولد واحد وعندة خمس سنين مفكرتيش تخلفى تانى ؟؟ وتفتكرى حاسة بأى مشكلة علشان مش فية اخوات لية؟؟

غلسة صح؟؟ بس انا فعلا بافك جديا انى مخلفش تانى وبجد كاهرهه اوى الموضوع دا و وائل متفهم لحد دلوقتى الحمد لله اما ماما وبابا فالزن شغال على ودنى هتظلمى ابنك هيحصله ويجرالوا وانا بصراحة حاسة بضغط نفسى من كلامهم بس برضو والله مش قادرة احس بأى رغبة ان يكون عندى اطفال تانى يمكن مش هاحبهم ذى عبد الرحمن يمكن اى حاجة بس مش عايزة الحمد لله على كدة ربنا يكرمنى فية يارب

يالا فضفضت معاكى شوية استحملينى بقى

مادو

اذيك يا قمر والله بتوحشينى وبادور على اسمك اول ما ادخل الموضوع بس عايزة اقولك بما ان موضوع النت انها وحشة مش داخل دماغك شككتينى فى الجهاز عندى فسألت وائل النت عندك حلوة قال آه قلت بس هو بكرة يروح الشغل وانا ادخل نت من البروفيل بتاعه اصلة قاسم الكمبيوتر اتنين علشان شغلة ومذاكرتة وكدا والله اعلم بقى ...ههههههههههههههههههه
المهم هو هيبقى يصلح لى بتاعى وربنا يسهل يارب

فية حاجتين عايزة اكلمك فيهم

بالنسبة للثلاجة انا عندى توشيبا وكان عندى نفس المشكلة وكنت برضو بحط بلاستيك فيلم بس ذى ماقلتى ممل ومرة اعملة ومره اكسل خصوصا لو كانت البواقى فى العشا والواحد هلكان بقلت طيب وانا احطهم فى اطباق غويطة صغيرة مقاس بتوع الجاتو او اى طبق غويط واغطيهم بغطاء علبة حلاوة او سمنة أميرة اللى بيكون بلاستيك وسهل تحطى الغطا ويحافظ على الأكل على طول خلاص عل كدا حلوة الفكرة دى ولا لسة ؟؟

آه تانى حاجة فكرة الجدول دى تحفة وانا تقريبا حاسة حياتى كلها جداول والتنظيم ممتع وبيخلى الحياة سهلة

هاقولك جدولى للأسبوع

الجمعة عملت محشى ورق عنب
السبت فراخ بروستيد وبطاطس محمرة ورز بالكارى وثومية
الأحد كشرى
الأثنين طاجن بامية باللحمة
الثلاثاء لازانيا (على فكرة باعمل المكرونة نفسها يعنى من الألف للياء)
الأربعاء صينية سمك بالخضار ورز بنى وسلطة طحينة وباذنجان مخلل
الخميس مش هاطبخ وائل نبطشى
الجمعة حوواشى وبطاطس محمرة
السبت صينية المكرونة بالفراخ
الأحد كباب حلة وكسبة لحمة
على فكرة انا باعمله لشهر مش بس اسبوع وكمان باعمل العشا والفطار

هأقولك مثلا العشا لاسبوع
فول +كفتة بطاطس +عيش + سلطة
صينية بطاطس بالبيض
جلاش بالجنبة
فطائر جبنة
سندويتشات طعمية
فول+بيض وجبنة
تارت جنبة
والفطار
باعمل كيكة تكون فى الثلاجة لما تخلص بعدها بيتفور لما يخلص نعمل بتون سالية لما يخلص نعمل مافن شيكولاتة وهكذا كل صنف يفضل بتاع 3 او 4 ايام نرجع من الاول تانى

حلو الجدول ولا اقول افكار كمان
شيمو

وحشانى وحشانى جداااااااااااااااااااااااا

أولا سبحان الله انتى على بالى على طول وبادعيلك والله العظيم دايما دايما

وحلو اوى اوى انك بتكتبلنا على الدرس اللى بتسمعية فى نقاط للتذكير ربنا يجعلة فى ميزان حسناتك يارب وعارفة علشان بس تفتكرى وانتى بتسمعى خلى فى شنطتك نوتة صغيرة بس اكتبى عنوان فرعى على جنب ولما ترجعى وتجى تحكيلنا او تقولى لمامتك هتفتكرى كدا أسرع وبتركيز كمان

وعايزة اقولك انى باغبطك مش باحسدك حسد وحش ولاحاجة ههههههههه على المقرأة والقعدات الحوة دى بقالى فترة محرمة منها بسبب بودى ربنا يهدية بس فعلا كانت حلوة الايام دى والصحبة بتفرق كثير

سبحان الله هو القائل
"وأصبر نفسك مع الذين يدعون ربهم بالغداة والعشى يريدون وجهه ولا تعدوا عيناك عنهم تريد زينة الحياة الدنيا"

فتمسكى بالناس دى وبالصحبة دى على اد ما تقدرى ربنا يارب يزيدك من كمة اللهم آمين

نجى بقى للصلصة
انتى خدتى منى دعا بسببها ربنا يتقبل يارب

والله يابنات الفرق رهيب

السنة اللى فاتت عملت صلصة وكانت فعلا اول مرة اعملها وعلمتها بالطريقة التقليدية اشيل العنق واضرب فى الخلاط واصفى وبعدين احطها على النار

بس السنة دى قلت اجرب طريقة شيماء شكلها اسرع وجربت اول مرة فى 5 كيلو والنتيجة كانت تحفة اولا لون حلو جدا لانها خدتة فى الاول من القشروكمان سمك ثقيل وحلو مغبتش على النار لحد متخنت يعنى قولى بتاع ساعة ونصف لساعتين كدا
ورجعت جبت 5كيلو تانى وكمان 5 كيلو كمان طلعولى 9 برطانات حجم برطمنات الصلصة اللى فى السووق مش عارفة حلو يا شيمو ولا قليل النتيجة كدااا

وبكرة بأذن الله هاجيب 5 كمان اعمل كاتشب وعلى فكرة طريقتة سهلة ماما بتعملة كل سنة وبيكون احلى من الجاهز واعمل كمان تسبيكة تكفى شهر واريح شوية من الطماطم بقى
تسلميلنا يا شيمو

عروس النيل

أول مرة اكتب لك
يعنى مش عارفة اقولك اية بس انتى ماشاء اللع عليكى كل كلامك رائع وبيفدنى جدااااااااا فوق ما تتخيلى

وبرغم من انة مميز فى ردك انك مبتعمليش انترهههههههههههههههههههه
الا انه بيكون ثرى جداا ويجبر الواحد انه يقرأه للآخر حتى لو عنية وجعته فداكى

وانتى مع اهلك بوجودك معانا

ومنتظرين دايما تجاربك ونصايحك

توتة البطوطة

انتى اللى كنتى سألتنى عن الكبة صح؟؟ لو مش انتى اعذورنى العتب على الذاكرة

بس شوفى يا ستى المفرومة الللى بقولك عليها ساشو التركى دى ممتازة فى شغل البيت اليومى يعنى تفرم بصل طاطم جزر ماما بتعمل البصل والجزر بتاع السلطة بيها وكمان كل الشغل عصير حتى اختى بتعمل فيها كيك ماعدا مرحلة الدقيق لانها اصلا صغيرة ودى ميزة فيها يعنى ممكن تفرم حتى بصلة واحدة
واختى عندها ذيها بالضبط مولينكس وبنفس الكفاءة بتاعة دى خالص والله بس قولوا ماشاء الله لهى بتاع ماما مش بتاعتى ههههههههههههههههههههههههه

وكنتى عايزانى اكملك باقى الافتكاسات

مش شرط يكون علشان تعملى الحاجات اللى قلت لك عليها يكون مسافر ولا جاى من حتة ممكن يكون يوم عادى راجع من الشغل وتتنشعتشى بقا فى التجربة

وعلى فكرة نتايجها حلوة جدااااااااااا حتى لو العيال صحيوا ذى ما حصل عندى مجرد المفاجأة وهم أصلا

كمان فية افكار لليدور بتكون تحفة فية وحدة اضاءة كدا بتكون فيها شكل قلوب وبيكون لونها احمر لما بتنورى النور الخافت بتعمل قلوب على الحيطة بتتباع فى ثرى برازر بس مش فاكرة سعرها حاليا
كمان ممكن تحطى برواز شكلة جديد ومختلف على كل كمود جنبك يبقى صورة جوزك والعكس والتل الأحمر ممكن تخدى منة جزء طويل وتضيفية كنزالة جديدة للستارة وكتغير شامل للاوضة لازم اشوف صور واساعدك احسن

فطوم

ربنا يارب يقومك بالسلامة ويخليك طومى يارب

ماشاء الله على النشاط اللى انتى فية
هههههههههههههههه

مقضيها دلع فى دلع ياعم طيب اجرب احمل واقوله كل شوية اروح لماما بقى كلام من دا ولا اية اصل الواحد مهما عمل مبيشبعش من بيت اهله ابدااااااااااااااااااااا

انا عن نفسى مبحسش للاسف انى ليا بيت الا فى بيت بابا ودا بيضايق وائل جدااااااا
لانى عايشة هنا كأنى ضيفة باستنى اخر الاسبوع علشان اروح بيتى وراتاح بقى وللاسف هو حاسس بدا اوى لما بيلاقينى تعبانة يقولى خيكى يومين بس مربضاش كل مرة يعنى لانى فعلا بحبة ومقدرش ابعد عنه برضو
اما بودى بدأ يقتنع ان اوضتة هى اللى فى بيت جدة واللى هنا دى اى كلام وكل يوم يصحى يعيط اروح لجدى و أميرة اللى هى اختى
يالا مسيرى اتغير

ومتحرمناش من يومياتك كلها تحفة والله

ايجيبتى

وحشتينى

ربنا يطمنا عليكى

وهو دا الحمل يا عبلة .... مش عايزين عيال اتحملوا بقى هههههههههههههههههههههههههههههههههههههههه

الجاى طبعا اسهل مش كداا هههههههههه
باهرج معاكى والله ربنا يارب يعينك ويطمنا عليكى


ارحموا حالى

انتى فينك ولية لما تروقى هتكتبى طمنننيى عليكى والله يعلم ربنا انى قلقانة عليكى من يوم ما قرأت موضوعك وكل لما بادخل لازم ابص على الموضوع
بأذن الله خير

فين بقا هيوشا ونوشا ودعاء الكروان وكل البنات اللى كانوا معانا

سما

وحشتينى جدااااااااااااااا

فينك يا بنتى السمك يناديكى وياريتك تلحقى تكلى سمك اصل شكلنا كدا بعد موضوع مصنع اجرنيوم دا خلاص لا هناكل سمك ولا هنجى ناحية البحر من اصلة ربنا يعننا

الف سلامة على ابنك ربنا يشفية يارب

وطمنيننى عليكى وقوليلى امتى هتيجى مصر

Enn
انتى منورة الموضوع جدااااااااااا

وتواجدك مميز معانا


فية كمان سلسبيل

منورة والله جدااااا


ومين كمان قالت عندهم واحد صاحب جوزها علشان المتشات انا عندى كل يوم اخوا جوزى علشان المتشات برضو
وباحتاس اقدم لهم اية مرة فيشار ومرة مكسرات ومرة كيك ولازم طبعا شاى وعصير وافلام بس الميزة ان بسيب لهم بودى واستجم شوية فى ركن لوحدى او انجز اى شغل
وطبعا حالة الطوارىء بعلنها قبل صلاة العشا اكنس البيت وانضف على اد ما اقدر علشان بيصلوا ويجوا على طول بس مين الم لعب بودى من هنا ولا كأنى عملت حاجة بس اهه عمة مش غريب عارف عاميلة


اوعوا اكون نسيت اكتب لحد بس انا باكتب من الذاكرة الخاينة دايما لان مش قدامى الموضوع

اما يويماتى فربنا الحمد لله نجا بودى النهاردة3 مرات ربنا يستر يارب

اولها دخلت الحمام الصبح بعد ما دخل سعته وقضينا ساعة كالعادة فى الحمام فتحتلة التلفزيون على طيور الجنة ودخلت الحمام وقافلة طبعا كل الابواب بس المطبخ ملوش مفتاح هو بترباس من جوا البية فتح الباب ودخل فتح عيون البوتجاز وضغط على الاشعال سبحان الله بافتح باب الحمام لقيت المنظر وابتدا اليوم بالصريخ وانهرت والله ومبقتش عارفة اعمل اية

نجى لتانى حاجة برضو الحمام طيب اعمل اية ضرورة انسانية والله بيجيل مغص كثير من قلة دخولى الحمام خوفا علية
الا وطلعت لقيت هدوء رهيب فى البيت ببص لقيت باب الشقة مفتوح وهو مش فى البيت لسة هاجرى لقيت جدو مطلعة وطبعا عينكم ما تشوف الا النور قالى اربطية فى ايديك بعد كدااااااااااااااااااااا حتى لو نمتى ولا دخلتى الحمام بقيت اكره الحمام

قلت والله لقعدالك بقى جالى تليفون عادى برد وعينى علية يا حرام المسكين بيلعب فى العجلة ماشى اتارى البية فك صاملة العجلة وبيجرب يدوقها والاقى بقة بيحرك كدا استأنذت من اللى باكلمها ثوانى اشوف فية اية فى بقه وببص والاقى الصامولة

بقيت اصرخ بهبل ومش عارفه اعمل اية
فضلنا طبعا عن فيش الكهربا وتكسير اللعب علشان يجرب يحطها فى الكهربا والمصيبة ان كلها معدن
مش عارفه اشغلة اذاى

قال يقوللى خلفى تانى ربنا يعننى علية بس

وطبعا معملتش اى حاجة فى البيت واعصابى منهارة من عمايلة

فلما اتأخر عليكم تعرفوا ان مش بايدى المشكلة ان الولد بيتطور هو حاليا سنة و10 شهور على فكرة وكل يوم بيكون اصعب من التانى وابوه مصر انة معندوش فرط حركة وان دى شقاوة عادية
بأذن الله هارد كل يوم ولو كلمة وكل كام يوم د طويل ذى دا كدا

هاقوم اصلى الفجر بقا

يا مادو لقتيك بتسألى فى موضوع شيمو على الفول فى حلة الضغط

قلت اقولك كل ما اقول هاكتبها بانسى

المهم

تنقعى الفول حبة يعنى نقول ساعتين ثلاثة كداا
وبعدين تحطية فى حلة الضغظ بعد التصفية من المية طبعا وتضيفى علية طمطامية وسوية عدس اصفر وممكن فول مدشوش شوية برضو

اوى اى اضافة انتى بتحبى تحطيها على الفول

وتغطية بحوالى 5 سنمتر فوقة مية مغلية من البويلر وتقفى الحلة كويس اول ما تصفر تهدى النار نص نص وتسبية نصف ساعة بعد كدا تهديها على الاخر ربع ساعة كمان وبس اطفى النار وسبية نصف ساعة مقفول علية او لحد ما يبرد علشان لونة ميغمقش

بعد كدا انا باهرسة ف الخلاط واعينة سواء فى الثلاجة او فى الفريزر

وبيكون حلو اوى واسرع من الفوالة و يكون عندك عفريت ذى بودى يتجرأ ويعلى النار علية ذى ما عمل فى ماما يوم الخميس اللى فات وشيط لها الفول

بالهنا والشفا وقوليلى عجبك ولا لاء

السلام عليكم ورحمة الله وبركاته
سلامى للجميع
انا فرحانه جدا لان مدام وائل رجعت تانى وبتحكى بتفضفض زى زمان
ربنا يصلحلك الحال يارب ويهديلك ابنك
وعلى فكرة انا مع والدتك فى انك لازم تجيبى اطفال تانى
لانه صعب انه يتربى لوحدة كدة وهيحس بالوحدة ويمكن سبب شقاوته وانه يخربلك الحاجة لان مش عندة حد بيلعب معاه
فبيحاول يلفت نظرك او بيشغل وقته ويستهلك طاقته
اتمنى انك تفكرى فى موضوع الخلفه تانى حتى ولو طفل كمان

طبعا انا ظروفى شبه ظروفك جدا عندى اللى مجننانى ومسمعه الجيران صوتى بالليل والنهار
لكن مفكرتش فى نفسى وخلاص انى بتعب وانها مسوليه وووووووو وكل الكلام دة
لا فكرت انها محتاجة اخوات تلعب معاهم تصاحبهم وتخاصمهم
يعنى تعيش زى ما احنا عشنا مع اخوتنا
ولو سالتى واحد اتربى لوحدة لايمكن هتلاقيه سعيد بكدة وكان يتمنى انه يكون له اخوات

وكمان ياستى علشان نكتر سواد المسلمين
وربنا يجعلهم ذريه صالحة
اللهم ارزق كل مشتاق الولد الصالح

يومياتى بقى
طبعا عظيمه عملت مكرونه وكبد وقوانص بالبصل
ومن الساعه واحدة كدة وانا بغسل فى مواعين وبغسل غسيل وبشيل ميه
ادعوالى ربنا يهدى جوزى ويصلحلى الخزان لحسن فعلا متعذبه من غيرة
وهو مش فاضى خالص يصلحة ومش راضى اجيب حد تانى يصلحة


على فكرة والله بستفيد جدا من افكاركم ونفسى اكون مشاركه زيكم كدة
بس حتى معنديش استعداد افكر ولا اعمل اى حاجة
يلا الله يعنكم على المتطفلين اللى زى كدة
باخد بس ومش باعطى

الله يهدينى واياكم

وانا باتصفح النت لقيت الكلام دة فقلت لازم افنقله لكم

مع انى مكنتش عايزة اتكلم فى اى حاجة تانى بس اعمل اية بحبكم اوى والله وبامانة من غير اى سبب غير اننا اتجمعنا بدون اى هدف وكلنا بنحب بعض

يالا اسيبكم مع الكلام

عند موت الانسان وأثناء إنشغال أقربائه بمناسكِه الجنائزيةِ, يقفُ رجلٌ وسيمُ جداً بجوار رأس الميت. وعند تكفين الجثّة, يَدْخلُ ذلك الرجلِ بين الكفنِ وصدرِ الميّتِ . وبعد الدفنِ, يَعُودَ الناس إلى بيوتهم , ويأتي القبرِ ملكان مُنكرٌ ونكير , ويُحاولانَ أَنْ يَفْصلاَ هذا الرجلِ الوسيم عن الميتِ لكي يَكُونوا قادرين على سؤال الرجلِ الميتِ في خصوصية حول إيمانِه .
لكن يَقُولُ الرجل الوسيم : 'هو رفيقُي, هو صديقُي. أنا لَنْ أَتْركَه بدون تدخّل في أيّ حالٍ منَ الأحوالِ .
إذا كنتم معينينَّن لسؤالهِ, فأعمَلوا بما تؤمرونَ. أما أنا فلا أَستطيعُ تَرْكه حتى أدخلهْ إلى الجنةِ '.
ويتحول الرجل الوسيم إلى رفيقه الميت ويَقُولُ له :
'أَنا القرآن الذيّ كُنْتَ تَقْرأُه, بصوتٍ عالي أحياناً وبصوت خفيض أحياناً أخرى. لا تقلق. فبعد سؤال مُنكرٍ ونكير لا حزن بعد اليوم .
وعندما ينتهى السؤال , يُرتّبُ الرجل الوسيم والملائكة فراش من الحرير مُلأَ بالمسكِ للميت في الجنة .
فلندعو الله أن يُنعم علينا بإحسانه من هذا الخير. آمين آمين آمين .
يقول رسول الله (صلى الله عليه واله وسلم) , فيما معناه , يأتي القرآن يوم القيامة شفيعاً لأصحابه لا يعادل شفاعتهُ أمام الله نبي أو ملاك .
رجاءً أنقل هذا المحتوى إلى كُل شخص تعرفه .
فالنبي (صلى الله عليه واله ِوسلم) يقول : ' بلغوا عني ولو آية '



أثبتت دراسة علمية

أن قراءة القرآن كل يوم تنشط جهاز المناعة وكذلك ملامسة الجبهة للأرض في وضع السجود يساعد على ضخ كمية أكبر من الدماء إلى المخ وتنشيطه

واجرى واجركم على الله ...ربنا يستر