مرحبااا يالغاليات .. جاهزين نكمل موضوعنا ؟
يالله كلها ٤٠ يوم اهتمي بنفسج فيهم و شدي حيلج .
شوفي اهم شي الرضاعة الطبيعية لان اهي اللي تنظف الرحم و ترده مكانه تركي عنج الردادة و الكلام الفاضي و الدليل ان دكتورة الولادة تعرف اذا كنتي ترضعين او لا من السونار اللي تسويه لك بعد الولادة اذا شافت الرحم نظيف و راد مكانه يعني رضاعتج كاملة و صحيحة .
🔺استغلي فترة النفاس بالتدهن قد ما تقدرين حطي على جسمج الصبح زيت اللوز المر خلطيه مع الجليسرين و بعدين اخذي شور بالليل و حطي كريماتج المرطبة و للتقشير تقدرين تستخدمين سيكنورين مناسب للمرضع على الوجه و الاكواع و الركبة و المناطق الحساسة "اقري التعليمات" 🔺غطسي ريولج يوميا بماي حار و خلي يمج الفوطة و الفكس و الكريم و الدلاغات "الجوارب" نشفي بسرعة و حطي الكريم خلطيه مع شووية فكس و لبسي بسرعة دلاغاتج ما يمنع يكونون دبل اذا وايد بردانة .. الجو بارد تدفوا الله يعين نفساوات الشتا 🌷 🔺لا تجوووعيين .. خلي عندك دايم صحن فواكه و مكسرات و فواكه مجففة .. مع البيبي تنسين نفسك فخلي يكون عندك شي للطوارئ .. 🔺الشوفان خليه من اساسيات وجباتك اليومية .. سواء شوربة شوفان بالدجاج او اللحم و الخضار .. او حليب تغلين معه شوفان و قرفة .
🔺في شي افضل من لبس الكورسيه _و ما يمنع انك تلبسينه_ و هو انك تشدين عضلات بطنك تظلين طول الوقت بحركات ارادية تشدينه من داخل تقوين عضلات البطن و تمنع الترهل خليها عادة يومية .. و طبعااا الغنية عن التعريف "رياضة كيجل" و هي: شد عضلات المهبل مثل حركة وقف التبول _اجلكم الله_ ، مهمة جدا لاعادة المهبل لوضعه الطبيعي و تقوية عضلته 🔺الرشاد و الحلبة مهمين اول عشرة ايام في طرق لتناولهم ابحثي عنها و اختاري الانسب لك .
🔺التمر من افضل المأكولات او السناكات سواء تمرية ، تمر سادة او بالمكسرات ممكن تغلين حليب مع التمر و الدارسين الي تحبين 👌🏻
🔺و بقول لكم شي عن نفسي مستحيل كنت اطبقه في اول بيبي و ثاني بيبي بس اكتشفت ان حريم اول يسوونه و ان العديد من شعوب العالم يسوونه سألت فلبينيات و صينيات اكدوا لي هالمعلومة اللي بتصدمكم .. لا تغسلون شعركم اول ١٠ ايام على الاقل اذا تقدرون تحملوا اسبوعين 😄 بنفاسي الاخير قلت بجرب و اشوف شكثر باستحمل ! قعدت اسبوع والله يا بنات ان راسي يطلع عرق مو طبيعي و كنت احس براحة بس تسبحت جاني عوار براسي مو طبيعي حسيت دخل هوا و قلت يا ليتني مكملة هالثلاث ايام بعد و سامعة الكلام فما نستهين بخبرات الشعوب كلامهم ما يا من فراغ طيب و شالحل مع الشعر المدهن ؟

كله نعمه الحمد لله ❤️😍المهم الصحةوالعافية ونقوم بالسلامة يارب 🤕😓

طيب و الحل مع الشعر ؟ كيف نستحمل ؟
تلاقون ببعض الصيدليات شامبو جاف عبارة عن بخاخ يزيل الدهون الزايدة من الشعر و يخليه يلمع و نظيف .
🔺حاربي الامساك و شربي سوائل ، و شوربة الدجاج خليها شبه يومية تقوي المناعة و وايد مفيدة و لو كانت مع الخضار افضل .
🔺التزمي بتعليمات الدكتورة و بمراجعاتك بعد الولادة و خصوصا اول مراجعة و كملي فيتامينات الحمل و اذا خلصت اخذي فيتامينات الرضاعة اذا كنتي ترضعين 💕
🔺حاربي الامساك اللي ممكن يأثر على جرح الولادة و يفتحه..عن طريق تناول طعام صحي فيه الياف خصوصا على الريق و شرب سوائل والحركة اليومية البسيطة خصوصا بعد اول عشر ايام .
🔺لا تفكرين بالريجيم اكلي اذا انتي يوعانة .. بس الاكل يكون صحي قد ما تقدرين ..يعني ممكن شاورما و كباب او شيش طاووق مع شوربة و سلطةو ساندويش تونة او بيض او ستيك، بس يكون نوع الخبز فيه الياف مثلا.
🔺قللي الاضاءات بغرفتك و اعتذري بلباقة عن الضيوف اذا ما تقدرين تستقبلين و أجلي مواعيد الزيارة الى بعد الاربعين اما اذا ما عندك مشاكل فهذا شي ثاني .. انا بنفاسي الاخير وايد ارتحت لان كنت في نفاساتي السابقة احس بثقل الزيارات لي بسبب عدم انتظام مواعيد نوم البيبي و و لكونه ما يعرف يرضع عدل بعده، غير الغازات و البكي لذلك أجلت أغلب الزيارات لمدة فوق الشهرين بصراحة خصوصا اني شايلة مسئولية البيبي بروحي.. و عندي صغار الله يحفظهم.. كنت احتاج لتركيز .. و كل وحدة و ظروفها ، في حريم ممكن يستمتعوون بالنفاس ان الناس تدش و تطلع عليهم و في حريم يحبون يخلون يوم بالاسبوع للزيارات كنت اسوي جذي اول .. اخر نفاس كان مختلف تماما 🤩 عرفت اللي ابيه و اللي ما ابيه و الصح من الغلط بكثير من الاشياء .. فضلت راحتي و راحة طفلي على كل شي ثاني 👸🏼 لان النفاس مو وقت مجاملة 🙄 هذي قناعة شخصية توصلت لها .. كانوا يجوني ضيوف و انا بنام تعبانة 😩او البيبي بس يبكي .. و كل واحد يدلي بدلوه جزاهم الله خير🤕 بس ادركت ان كل اللي احتاجه وقت لنفسي !
من هذا المنطلق .. منعت الزيارات الا من اقرب الاقربين .. و طبقت ما سبق و ذكرته لكم 🔺لا تطلعون بالذات اول ثلاثين يوم الا لمراجعات الطبيب، خلوا التسوق عقب و الافضل انك تتسوقين اون لاين و انتي بنفاسج او تجهزين من قبل الولادة اذا تقدرين لا تقارنون نفسكم بالاجانب ما يعرفون يهتمون بنفسهم حتى في الجنسيات الثانية ما يطلعون و الام تهتم في بنتها النفسا .. 😉 مو مرجع الاجانب بالذات بهالامور و الا انتو شرايكم ؟

خلي نفاسك اسهل و أجمل قد ما تقدرين على جميع الاصعدة .. اذا ما عندك احد يطبخ لك اشتركي بنظام وجبات غذائية و اذا كنتي ترضعين ضروري تقولين لهم هالمعلومة .. جهزي امورك كلها قبل الولادة ملابسك و سرير و درج او خزانة البيبي و ملابسه و غسلي كل شي قبل الولادة و خلي كل شي واضح و مكانه معروف لك .. و لمن يساعدك .. حتى سشوار الشعر اذا شعرك طويل استخدمي السشوار اللي يكون بروش " يمشط الشعر و ينشفه بنفس الوقت بخمس دقايق " ما اقصد المشط الحراري لا _ تلاقونه بفيليبس و بيبي ليس _.. انا جربت فيليبس ممتاز .
اخذي لك ملابس مريحة و مو شرط فساتين النفاس انا شخصيا مو مقتنعة فيهم لان خامهم بارد حيل و النفساء لازم تتدفى .. 🤔 و منا الى تاجرات انستقرام يعني لو يتوفر مثلهم خام شوي دافي افضل .. و الا بعد حولي على بجامات دافية ذربة و ارواب حلوة و تريننقات على الاقل ينلبسون عقب بأي وقت 👌🏻
من الامور اللي الغالبية يسوونها بالنفاس صبغ الشعر او قصه .. اذا تبين فكري لج بنيولوك بسيط ما يأذي الشعر و لا يحتاج وقت وايد للتصفيف ..
على طاري الوقت .. جميل لو زوجك يتعلم يمسك البيبي .. خلي البيبي نظيف و بدلي ملابسه و عطيه لابوه وقت اللعب و المناغاة_بعد ما يرضع و تغيرين حفاظته _ ساعديهم لبناء علاقة جميلة .. مو كل الاباء عندهم استعداد ذاتي البعض يحتاج منك مجهود علشان تبنين بينه و بين الطفل علاقة .. طفلك نما بأحشائك اما هو فمو نفس الوضع .. فعلشان جذي اختاري الوقت الصحيح وقت لعب البيبي..
و اخيرا كثري الدعاء "ربنا هب لنا من ازواجنا و ذرياتنا قرة أعين و اجعلنا للمتقين اماما "
اسأل الله ان يجعل ذرياتنا و ذرياتكم قرة اعين و ان يبارك فيهم و يحفظهم و يقرب لهم كل خير و يبعد عنهم كل شر و يقينا و اياهم الفتن ما ظهر منها و ما بطن .. اميين

بنات امس مدحتو وحده سودانيه تخيط وينها فيه ؟؟؟