ونسيت اقولك نيلوفر الحمدلله ان الفحص الوراثي طلع سليييييم يارب لك الحمد

فرحه حبيبتي
تأثرت كثير لما قريت كلامك وانك مانسيتيني ودعيتي لي
الله يتقبل ويرزقك ويرزقنا عاجلا غير اجل
الله يفرجها علينا

غيوم
الله يفرح قلوبكم ويكتب لكم اللي فيه الخير
يارب اشفي ازواجنا وارزقنا عاجلا غير اجل ..


ام جسار ...
ننتظرك 😙
__________
لقيت لي كم خلطه بسويهم ان شاءالله
اذا سويتهم بكتبهم هنا ❤❤

اكمل لكم ..
عشت ايام صعبه بعد فشل الحقن كان كل شي ممتاز وتمام بس فشلت ربي مااراد لي وقتها بس صدق جاني اكتئاب كرهت نفسي وزوجي وبيتي مو سهله اخذ الابر لحالها تجيب النفسيه كيف كمان لما فشلت جلست فتره بعدين بديت انسى واسترجع ثقتي واقول لازم نعيدها لازم تنجح بإذن الله ورجعت ازن على زوجي نعيدها هو بعد الفشل قال خلاص ماعاد بنعيدها بعدين جلست ازن عليه طفشته لين وافق بس هالمره غيرت جلست ابحث وابحث عن دكاتره في جده رسيت على اثنين فواز ادريس ومازن بشاره وكنت ابغى فواز ادريس اكثر واتصلت وحجزت موعد عند فواز ادريس بس كان بعد شهرين يمكن من عمليتي الاولى اقرب موعد بعدها بفتره اتصلت وحجزت موعد عند مازن كنت متردده بين الاثنين وبالصدفه طلع الموعدين في نفس اليوم قلت عادي رح اروح لهم الاثنين استشاره واللي ارتاح له بكمل معاه لان فواز كان موعده الظهر ومازن المغرب المهم قبل الموعد بيومين اتصلو علي منسقات فواز قالو لي موعدك تقدم يوم لان بعد بكره اللي هو يوم موعدك الدكتور عنده عمليات مره كثير ومارح يستقبل لما قلت لزوجي عصب وقال مو على كيفه انا مرتب وضعي على اليوم اللي حجزناه اول لان زوجي وقتها كان عند اهله وكان رح يجيني بنفس اليوم الصباح قلت في نفسي يالله خيره خلاص بروح لمازن رحنا لمازن وسبحان الله كلامه يريح يريح ارتحت مره يعطيك المختصر والمفيد مايحب يتكلم كثير ويسمع لأسئلتك قال رح اسوي لك اشعه عشان نطمن انو اوضاعك تمام بعد التنشيط اللي من العمليه الاولى لما سويت اشعه طلع عندي اكياس ع المبايض من التنشيط 😞 اعطاني ابره تحضيريه وقال اشوفك بعد ثلاث اسابيع ..

رحت بعد ثلاث اسابيع هالكلام كان شهر سبعه اللي فات سويت اشعه ودخلت ع الدكتور قال لسى في كيس وواحد راح ورجع اعطاني ابره تحضيريه وقال اشوفك بعد ثلاث اسابيع رجعت له نهاية شهر ثمانيه اعطاني حبوب بريمولوت ان وقال استخدميها خمس ايام ووقفيها رح تجيك الدوره ابدأي استخدمي ابر التنشيط وسويت نفس ماقال طبعا اول زياره رحنا له طلب تحليل لزوجي لما سواه وطلعت نتيجة التحليل كلمنا قال للأسف ماحنقدر نجمد الحيوانات عشان الفايروس اللي عندك ورح ناخذ منك عينه يوم العمليه ولو ماطلع رح ناخذ بالخزعه 😔 زي طريقة العمليه الاولى المهم عدى موعد التنشيط وجاء يوم تسعه رمضان اللي هو قبل السحب بيوم وقال الدكتور لزوجي يجي قبل العمليه بيوم ويعطيهم عينه يحفظوها لين العمليه عشان مايفطر لان كنا برمضان رحنا يوم تسعه بعد صلاة العشا نسلم العينه سلمناها وطلعنا رحنا نتقهوى بكوفي الا شوي الدكتور يتصل قال للأسف العينه مافيها حيوانات منويه 😭😞😔 تعال بكرا صايم عشان الخزعه قفل وبعد شوي رجع اتصل قال المختبر رجعو كلموني والحمدلله حصلو كم واحد كويسين بس برضو بكره رح تعطينا عينه كمان والله جالسين على اعصابنا من يوم كلم الدكتور اقول ياالله لو تتكنسل العمليه بعد التعب هذا كله قدني مجربه الفشل وعارفه مرارته ماابغاه يتكرر عقلي الباطن رافض ان العمليه تفشل مره ثانيه نفسيا خلاص مو متقبله المهم يوم عشره رمضان صحينا بدري اخذت دوش ورحنا ع المستشفى الطبي الدولي اخذو اسمي ودخلوني وحطولي مغذي وقالو خلاص شويه ح يجي الدكتور ولسى انا وزوجي على اعصابنا مو عارفين الوضع في حيوانات والا لا طلبو من زوجي يروح يعطيهم عينه راح اعطاهم وانا دخلوني العمليه ودخلو زوجي معايه وهذا احسن شي في المستشفى زوجك يدخل معاك عادي غرفة العمليات جاء الدكتور وانا خلاص جاهزه لابسه ومعقمين المنطقه وكل شي بس حطو لي الاكسجين وخلاص ماعاد ادري الا لما صحيت ف الافاقه وزوجي عندي سألت زوجي حصلو حيوانات قال لسى ماردو علي قال سحبو منك 18 بويضه اظن ماني متذكره بالزبط قعدت يمكن ساعتين بعدين قالو لي خروج كتبو لي المثبتات اللي الدكتور سجلها لي بس لما رحت الحمام حصلت دم وماصار معاي كذا بالعمليه الاولى سألتهم قالو عادي جات المنسقه قالت حصلنا حيوانات تقدرو تطلعو 😍😍😍 الحمدلله انبسطنا انا وزوجي وخرجنا وصار وقت ننتظر اتصالهم طوال الايام من بعد السحب طفشت زوجي ايش قاعدين يسوون اولادي في المختبر ههههه واقعد اطقطق عليه كذا لين جاء يوم 12 رمضان اتصلو على زوجي قالو الترجيع بكره ....