السلام عليكم ورحمه الله

كيفكم ان شاء الله تمام انا الليوم جايبه لكم خبر ما ادري حلو ولا لا ولا ادري هل هو صحيح او لا المفروض اني اعلمكم بعد سته شهور من استخدام الادويه بس صراحه ما قدرت اصبر

المهم انا عندي ارتفاع fsh'lh ورحت لاطباء كثير اخرهم الحبيب توفيق جعفر الله لايسامحه سكرها في وجهي وبعده زينب ابو طالب كانت رح تعطيني منشط وهرموني مرتفع ولاني سبق وعانيت من المنشطات رفضت بشده وطلعت دلتني بعدها جارتي على دكتوره اسمها كفاح في ركن المئويه الاستشاري المهم رحت مع اني مو متحمسه وقبل اروح كلمتها وشرحت لها حالتي وقلت لها لو بتقولين مافيه امل قدام زوجي ولا لازم انابيب انا طفشت من هذا الكلام وتعبت قالت جيبي تحاليلك وتعالي ورحت وكتب الله لي ذلك المهم
شلت كل شي ورحت وطبعا فيها تحاليل الدرقيه tsh't3't4 والحليب والذكوره وطلبت اسوي تحليل اسمه thyroperoxidase antibodies وطبعا اول مره اسويه وهو من الدرقيه وانا هرمونات الغده الدرقيه كلها عندي سليمه وكانت متاكده ان فيه مشكله وفعلا طلع عندي فيه قصور شديد وقالت انه هو سبب كل اللخبطه وان المبيض والنخاميه في حالتنا مالها علاقه لان هذا الهرمون مسؤل عن النخاميه وبسبب تعطل هذا الهرمون النخاميه قامت تتصرف من نفسها وكلام كثير مافهمت نصه وقالت ان سبب هذا الهرمون نقص اليود وقالت انتي كنتي عايشه في منطقه مافيها بحر ولا اسماك وفعلا كلامها صحيح ماكنت اكل سمك ولا كنت عايشه قريب من بحر وكنت لما اسافر اجازه الدمام ولا جده كانت تجيني الدوره سبحان الله شكله عشان اليود بس في الاخير صرت اروح ماتجي شكل الغده قاومت سنين بعدين فشلت وصرفت لي ادويه وقالت لاتنتظرين نتيجه قبل سته شهور وكنت بخبي عنكم لين اتااكد من النتيجه بس قلت حرام يمكن وحده تلحق عمرها قبل تفشل او وحده تلحق عمرها قبل سن الياس الحقيقي والله وحده اعلم واجل ولكن ما انزل الله من داء الا انزل له دواء علمه من علمه وجهله من جهله ابحثو يابنات عن انفسكم تذكرو بدايات المشكله عندكم تذكروا الادويه اللي كنتوا تاخذون قبل تخرب الدوره عندكم وتذكرو ادق التفاصيل ةروحوا لاطباء يخافون الله وعلى فكره قالت لي انه تحليل ahm اتوقع اسمه كذا تحليل فاشل وماله علاقه في حالتنا وهوتحليل يتسوى للبنات اللي مشكوك فيها انها بنت اولا وماعندها مظاهر الانوثه وبس استنزاف فلوس وقت هذي الدكتوره ممتازه وكان ودي اقوم اضمها من حلاوه اسلوبها وكلامها ودقت شغلها مركزه في شغلها وفاهمه وش تبغى ومو ماديه ابدا

طبعا الاعراض اللي كانت عندي غير انقطاع الدوره سنه او اكثر بعدين تجي مره

زياده وزن اسمرار يزيد كل شوي احس ببرد وتخليلوا اني ما فتح المكيف ابدا في بيتي مع اني عايشه في الرياض ودرجه الحراره توصل 50 بس انا اكون حاسه ببرد موطبيعي عندي حساسيه ومناعتي ضعيفه ومهما اسوي رجيم ما انحف وكل تحاليل الغده كانت سليمه وطبيعيه بس الظاهر لو ماكنت غلطانه ان هذي مضادات للغده الدرقيه

وباذن الله اوافيكم باخباري اول باول واقولكم وش صاير معي بس طبعا بعد ما اكمل كورس العلاج

دعواتكم لي ولدكتوره كفاح والله انها تستاهل

الله يجزاك خير ويرزقك ماتتمنين


بناات هل فيه ضرر من استعمال الدهيا اكثر من ثلاث شهور ؟؟

ياليت اللي تعرف تفيدنا صراحه متردده استمر عليها وكذلك المنظم البرجلتون كم شهر وهل فيها ضرر من الاستمرار اكثر من ثلاث اشهر حتى يحصل حمل باذن الله ؟؟؟؟؟؟؟


الله يرزقها ماتتمنى اللي عندها معلومه او تجربه وتفيدنا


{ رَبِّ لا تَذَرْنِي فَرْدًا وَأَنتَ خَيْرُ الْوَارِثِينَ }

{ رَبِّ هَبْ لِي مِن لَّدُنْكَ ذُرِّيَّةً طَيِّبَةً إِنَّكَ سَمِيعُ الدُّعَاء }

حبيبتي انا استعملته كثير يمكن سته شهور وقطعته ورجعت عليه ثلاث شهور ولا ضرني الحمدلله كان ينزل هرموني والحين خلتني الدكتوره اوقفه تشوف استجابتي للعلاج الجديد