اهلين بنات اخباركم والف مبروك لكل اللي ولدوا

ابكتب لكم قصة ولادتي قبل يتسكر التجمع

قصتي شبيهه جدا بقصة ولادة خمائل

طبعا انا كان موعد ولادتي 9 محرم ........ في يوم الجمعه 27 ذي الحجه صحيت الظهر الساعه وحده على الم الطلق يجي ويروح طعا على طول ميزته نفس طلقي ببكري ... الم يجي من المقعده واسفل الظهر .. انا فرحت وبنفس الوقت خفت قمت على طول تروشت واجفف شعري وولدي ياعمري مدري وش جاه بذاك اليوم تعلق بي بس يلاحقن عجزت اسوي شي يقول للشغاله ابي ماما ابي ماما شكله حاس ياقلبي هو .. المهم سويت لي كاس حليب فيه زنجبيل وشوي قرنقل واكلت 7 رطب والالم للحين خفيف ومحتمل المهم على العصر ارسلت لزوجي قلت اذا صليت تعال لانه من بعد صلاة الجمعه وهو عند اهله ... بعد الرساله جا يركض ركض فررررررح اني بولد .. خليت الشغاله تجهز ولدي عشان يروحون عند اهل زوجي .راحوا وانا للحين الالم عادي وبدل مايزيد بدا يتباعد ويخف وزجي يقول امشي للمستشفى وانا اقول اصبر روح خلص اشغالك وتعال بعد المغرب .. خلص وجل قال يالله وانا الالم عندي خفيف ومتباعد مره قلت يالله اروح لان المستشفى بعيد شوي يمكن ثلث ساعه الطريق .. مشينا وانا للحين الم خفيف اضحك واسولف مابي شي قلت لزوجي يمر الصيدليه اشتري حفاظات للنونو وقلت له جوعانه ابي شاورما ماكلت شي غير الحليب والتمر وهو يناظرني باستغراب يقول هذي وحده وراها ولاده ؟ والله انك رايقه دخلت المستشفى على اذان العشا كشفت قالت مفتوح 2 سم على نفس حاله من اول التاسع وتقول العنق بعيد مافي ولاده ركبوا تخطيط قالو فيه طلق بس متباعد .. قالت لي الدكتوره انصحك تطلعين لانك مارح تولدين اليوم يمكن بعد يومين يمكن بعد اسبوع مانبي ننومك وناخذ عليك فلوس على الفاضي .. انا قلت خلاص بطلع بس كنت متأكده اني راح اولد اليوم ..وقهر اخذوا فلوس على الكشف والتخطيط وانا راح اولد عندهم وبيلهفون خمس الاف المهم ركبت السياره وبدا يشتغل الطلق الصدقي بدينا نلفلف هنا وهناك وزوجي نزل يشتري له اغراض راااايقين .. وانا الصراحه بدت تجيني طلوق قويه شوي بس متصبره وبيتنا بعيد عن المستشفى قال زوجي وش رايك نرجع ولا ندور شوي ونرجع المستشفى ومشكله الجو بارد ماقدر امشي قريب من المستشفى قلت نرجع للبيت الشكوى لله .. وانا بالسياره بديت اصيييح من قلب واشاهق خاااايفه من الولاده موت واتذكر ولدي وهو يلاحقن اول ماقمت من النوم واصيح مدري وش العاطفه اللي جت ههههههه رجعت البيت الساعه 9 وقلت لزوجي رح لاهلك وانا بديت افرفر بالبيت وكل شوي تمسكني طلقه اقوى من الثانيه واروح للمطبخ اخبص مدري وش اشرب اكلت لي رطب وبديت امشي واذا جتني طلقه اجلس على ركبي وانحني على الكنب احس ظهري بينقص من الوجع واقالي باخذ نفس مع الطلقه مثل مايقولون عجززززت احس نفسي ينكتم من قوة الطلق ... والطلق صار يجي كل عشر دقايق ولا 12 دقيقه عجزت ابيه يتقارب عشن ارجع للمستشفى ماودي يردوني ... رحت حطيت كموت بمويه مغليه شربت شوي وحطيته تحتي ابيه يفتح الرحم مدري وش اسوي وخاااااايفه من الولاده اتنافض ومحتاره مدري اروح للمستشفى ولالا اخاف يرجعوني وانا ماقدر اتحمل الالم بديت اصيح وادعي ان ربي يفرج لي ويسرع بولادتي من الظهر وانا اطلق ..يوم جت الساعه 12 وشوي قلت لزوجي خلاص تعال مقدر اتحمل ومشينا وسبحان الله بالسياره الالم يتضاااعف بديت اصااارخ وادعي كل ماجت طلقه واحاول اكتم صراخي مابي زوجي يرتبك بس غصب علي الالم يطير تطيير وصلنا للمستشفى وجابولي عربيه وانا اون وادعي الالم مايخليني اتنفس قوي مررررره موظفة الاستقبال تاخذ اسمي وتقول وش اسم جدك اقول مااادري مادري نسيته من الالم اخذوا مني تحليل بول ودم والله انهم رايقين وكشفت قالت 3 سم انا بديت اصيح اقول كل هذا 3 سم هذا الساعه 1 الليل شالوني فوق لغرفتي وركبوا تخطيط وبديت اصيح عليهم اقولهم ابي ابرة ظهر وانا قبل الولاده مستحيل افكر فيها وخاسريني ومحد معبرني وامسك الممرضه اقول تكفين ابي ابره ابي ابره ههههههه تقل مدمنه ولا كأني اتكلم تقول مايصلح قالو الحين مانقدر لو قلتي من قبل مافيه دكتوره احس انهم يصرفوني والالم سبحان الله قوي قوووي احس انه بيفجرني تفجير فكي يتنافض من قوة الطلق اقوى من طلقي بولادتي الاولى واطول منها المهم جلست ساعه ونص وقاسولي 6 سم فررررحت بالفرج سبحان لله انفتح بسرعه وقالو روحي لغرفة الولاده مشي على رجولك عشان بسرعه تولدين رحت امشي وامسك الجدران واتلوى وسدحوني على السرير واسمع وحده بالغرفه اللي قبالي تصيح وتقول لااله الا الله لااله الا الله وبديت ادعيلها وادعي لنفسي وعطوني كمامه اغيب شوي عن الوعي وادوخ بس الوجع مايروح احس صرت مثل المجنونه بديت احس بدفع واقولهم بيطلع يقولون لاتدفعين وانا ادفع غصب عني جت قاست تقول 8 سم وتفقع كيس المويه ويطش على رجولي خففففت قلت وشو ذا وبدا راسه ينزل ويقولون اصبري ولما شافو قالو يالله ادفعي شعره طالع وادفع بكل قوتي ولا طلع احسه ناشب والقابله مصريه والممرضه الفلبينيه يشجعوني ويحمسوني يلا شاطر حبيبتي ياحبيلهن بس احس ساعدوني بعد الله اما الدكتوره باكستانيه ساكته تقل صنم ومبوزه يالله ماعلينا هههه .. وادفع اذا جت طلقه اعصر نفسي لمين عروق وجهي بغت تنفقع ويافشيلتي تبرزت عليهم امساك بعد انا ووجهي هههههههههه واقول وشو اللي طلع احسبه البيبي قالت عادي عادي هذا براز من ضغط الجنين وادفع بقوه وطلع حبيب قلبي الساعه 3 بالليل تاريخ 28 ذي الحجه واناظره كنت شبه جالسه على السرير .. واخذوه ينظفونه ياقلبي هو .. عاد بدت تعصر بطني بتطلع المشيمه بصعوبه طلعت ... في بكري طلعت بسرعه ماحسيت فيها .. وبدت تخيط وانا حاطه الكمامه ومعطيتني ابره بنج عشان ماحس بالخياط واحس فيها شوي بس دايخه المهم طولت تخيط .. وحطولي ثلج مكان الخياط وغطوني ببطانيتين وانا اتنافض اقول شيلو الثلج مابيه مارضوا يقولون احسن عشان مايتورم مكان الخياط وفعلا كلامهم صحيح .. وفيني الم مثل الطلق بس خفيف وكل ماجا الم ينزل دم كثير .. قلت لهم عندي مثل الطلق قالت احنا حاطين ابره بالمغذي علشان تنظف رحمك ززجلست ساعه ونص ونظفوني وغيروا ملابسي وودوني لغرفتي ويااااسلالالالام ياربي لك الحمد والشكر

ماشاء الله الجنين والحمد لله على السلامه
ام ركووووني اخيراااا ماشاء الله وحمد لله على السلامه
وساس الحلى مبروك ماجبتوا عقباااال جود ولونيا
الله يبشرنا عنكم يارب بالسلامه

مبررروك أم ركوني
أنا ولدت ليلة الأربعاء. وجبت بنت. بعمليه. وان شاء الله اكتب قصتي بس ارتاح

الله يبارك فيكم حبيباتي خواتي


والله اني احبكم


الله يهون على الباقين

والله يعين ع النفاس اف منه اكره

السلام عليكم مازلت صامده
جود ابسالك اخر دوره للك متى انا 1/4وخلصت 6/4وكل مارحت المستشفى يقولوا انتي مطوفه لازم عمليه بس انا قلت باستنى لين يجي الطلق ماني مستعجله