السلام عليكم
الحمدالله على كل حال كنت معاكم بالتجمع والله اراد ان ياخذ امانته والحمدالله على كل شيء. ولدت الجمعة اللي فاتت بعد ما كنت حامل ب٢٤ اسبوع بنص السادس تقريبا والله ما كتب للبنت انها تعيش.. ما ادري لي يومين ابي اكتب لكم ولا قادرة واشوفكم مبسوطين اني اكدر عليكم تجهيزاتكم الله يسهلكم.. بس شفت ردك هنو عماد الله يسهلك ويتمم لك على خييير ان شاء الله انتي بالشهر الثامن فرصتك اكبر وافضل بكثييير .. اثناء ما كنت ابحث عن الولادات المبكرة صادفت قصص لاطفال عاشوا بعد ما ولدوا بالشهر السادس .. صحيح جلسوا في الحضانة بحدود شهرين لشهر ونص بس سبحان الله قدروا يعيشوا .. سوي اللي عليك والباقي على ربنا.
انا صادفني افرازات وردية لمدة عشرة ايام وكنت مستغربتها .. ابغاها تكثر او تنقطع لما صارت حمراء زيادة رحت للدكتورة .. وسبحان الله اكشف عند الدكتورة وتسوي لي مسحة للمهبل وما تشوف اي دم(كنت شاكة يكون عندي التهاب) وسويت تحليل بول(مع اني لسع دوبي مخلصة من اسبوع مضاد لالتهاب البول) بس عشان نتاكد .. بس كنت كل مرة اروح عند الدكتورة ينقطع الدم (لاني كنت اشوفه ينزل بشكل متقطع مو متواصل) المهم هالكلام كان الاربعاء سويت التحاليل وقالت لي النتيجة بعد ٣ ايام ،واعطتني مثبتات وتحاميل تطهير احتياطا لما السبت اجيها،،
والخميس بديت احس التحجر يصاحبه الم شديد وبدا يزيد علي ،على اي حركة اسويها احس تتحجر بطني .. بس الالم كان مخوفني(والدم بدا ينزل معاه قطع متجلطة صغيرة) ورجعت رحت المستشفى بس قسم التوليد(وكانت هذه نصيحة دكتورتي على اساس انه الطوارئ ممكن مليان حالات كورونا) وما قدرت تشوف بالالتراساوند قالت لي الدكتورة الموجودة اشوف نسبة الدم ( واللي يصادف للمرة الثانية انه لحظتها كان قليل) قالت لي لا شكله قليل انتي بس ارتاحي تمااااما وزيدي نسبة المثبت بدل ٣ مرات باليوم خذيها ٤ مرات على دفعتين باليوم .. وبالفعل التزمت بنصيحتها.
ليلة الجمعة بدا الدم يقل وحسيت باطمئنان لما الفجر، الالم زاد والدم رجع.. ودخلت الحمام الله يكرمكم واحس فيه شي معلق في المهبل ويبغى يخرج مع اي دفع اسويه . وبسرعة صحيت الوالدة ورحت الطواريء وسويت اشعة وتحاليل بس شكله الموضوع كان خرج عن السيطرة ، الدكتورة قالت لي عنق الرحم عندك متسع ممكن يقفل وممكن تكون ولادة ونصحتني اخرج لمستشفى ثاني اقدر اتحمل فيه تكاليف الحضانة اذا صار وممكن ولدت . وبالفعل رحت لمستشفى حكومي وكشفت علي في الطوارئ وفجاتني قالت لي العتق فاتح ٣ ونص وكشفت من تحت وقالت خلاص الطفل نزل وانتي بولادة.. وبالفعل قبل مغرب الجمعة ولدت البنوته وخرجت حية سبحان الله حاولوا يسوون لها انعاش بس امر الله اتوفت.
والحمدالله على كل شي .. اللي ولدتني قالت لي اذا طفلتك وزنها اقل من ٥٠٠ جرام ماراح نسوي اي حاجة واذا اكثر راح نحاول، وسبحان الله كان وزنها ٦٠٠ جرام وسووا لها انعاش بس بس ماقدرت تعيش ..
ونصيحة يا بنات اذا وحدة شكت او حاجة وراحت للدكتورة تصور حتى عالاقل الشي اللي شافته اذا ما قدرت توريها ،، زوجي يقولي صوري وانا اقوله عيب اش اوري الدكتورة اكيد هي فاهمة وبتفهمني ،، واعتقد من التوتر اذا غيرت ملابس قبل ما اروح بساعتين مثلا خلال هالساعتين ما ينزل شي مني وامي وزوجي يحسبوني ابالغ او اعيش دور..
اليوم رجعت عندها قالت لي كل فحوصاتك سليمة ( مع اني كنت شاكه في الالتهابات) بس قالت مافي شي وعنق الرحم عندك طول كويس ممكن ضعيف وتحتاجي المرة الثاني ربط من بدري..
الله يسهلكم بنات وتشوفوا اطفالكم قدامكم وانتو وهما بخيييير يااارب وشكرا جدا بتجمعكم مع اني ما ارد عليكم كثير بس حبيتكم وحدة وحدة وانبسط بسواليفكم .. وهنو عماد لا تخافي سوي اللي عليك والباقي على ربنا ولو تبغي خذي ابرة الرئة قرات انها تؤخذ من الاسبوع ٢٧ ل ٣٤ .
والحمدالله على كل شيء🌸☁️
السلام عليكم
الحمدالله على كل حال كنت معاكم بالتجمع والله اراد ان ياخذ امانته والحمدالله على كل...
اشوف تولدون وتخلوني بجركم مع شوشتكم🤣