التحوير .. حقق حلمي بفضل الله

السلام عليكم

بنات ما احب اسوي مقدمات

انا بفضل الله تمكنت من عمل عملية التحوير عند الدكتور الراااااااااااااااااااااائع الفاااااااااااااضل
الله يسعده .. د/سلطان بن فهيد التمياط

ان جلست اوصف اخلاقه ما بخلص
وان جلست اوصف احترامه ومهنيته العاليه برضو ما بخلص

والاهم انه طبيب ماهر سعودي متمكن من شغله.. وكونه سعودي يخليني ادعمه وارتاح له

ما شاء الله تبارك الله

رحت له قبل شهرين وكان وزني 95

قابلت الدكاتره اللي معه وبكل تبلد اضحك على وزني
وقلت لهم ابي اسوي تحوير

حاولوا يثقفوني عن العمليات.. رديت عليهم بسرد سريع اني فاهمه و كذا وخلصوني بس

قابلت الدكتور سلطان وكان بشوش جدا ومتفهم ان رغم كتلتي 35 فقط الا اني بحاجه للعمليه
بكره مع العمل واسلوب الاكل بسمن واصير مفرطه السمنه

قال لي طيب

وحددها في 4 مارس

سويت التحاليل في المواساه وكل شي

وانتظرت اليوم الموعود بكل حمااااااااااااااااس

طلعت خلال هالفتره 3 مرات وسمنت 3.5 كيلو وصرت 98.5

باقي اكلي صحي جدا بس بدون حساب سعرات حراريه

تكلمت مع الوالد بخصوص المبلغ و دعمني ماديا و انا اصلا داخله جمعيه و ماخذه سلفه على الراتب ومقصره على نفسي الى اقصى درجه و بلغت مديري اني يمكن احتاج مبلغ اعلى من السلفه وصارحته بموضوع العمليه وقال لي مادام بتسوين شي لصحتك انا بساعدك (( برفع خطاب استثنائي للمدير العام))

الحمدلله ما احتجت مساعدته لان المبالغ اللي جمعتها كفتني

رحت يوم الاحد بالليل عالساعه 7 وصلت حسب ما طلبوا مني مع ماما واختي وعيالها
ودلال شاي وقهوه و جابوا لنا العشا في الجناح الملكي اللي يجنن
وخذوا قياساتي وكذا وعطوني الروب و العده كامله على جنب عالتسريحه

وسهروا عندي وكذا والساعه 11 مشوا

قمت اتحممت وحطيت مكياج ومناكير قلت خل اكشخ عشان لا صحيت اصير حلوه مو لوعه

جات الممرضه ومسحت مناكيري و مكياجي ههههههههههههه و خلتني افصخ لبسي والبس الروب حق المستشفى

الساعه 10 الصبح افتح عيوني والقى ورد من اختي حبيبتي
10 ونص لقيت الوالد عندي يسولف معي حسبالهم اني سويت العمليه ههههههههههههههه

كان قبلي واحد و وحده سمان حيل و طولوا بالعمليات .. اخذوا كل واحد ساعتين ونص
جا دوري
الساعه 2 جاني الدكتور سلطان بلبس العمليات
كنت ميته خوف انه ما اتغدى والا ما اتقهوى و يذبحني واروح ملح :icon8:

ضحك علي طبعا وقال لي وضعك بسيط لان حجمك صغير

وقال لي ما في الم

وكان على دخلة الوالده .. ودعتها ودخلت الغرفه حقت الافاقه الساعه 3 و جهزوني بابره المغذي و البنت اللي جنبي ما قامت من الافاقه .. خفت شوي عليها

شوي الا حطوا ابره البنج و شوي الا ما حسيت بنفسي الا بغرفه الافاقه مره ثانيه
وين غرفة العمليات؟؟؟؟؟ يوم في بروكير اسوي الشد خدروني في العمليات!!

وكل شوي دايخه مع البنج ويجون الممرضات يصرخون علي بالانجليزي ويك ااااااااااااااااااااااااااااااااااااااااب

عشان اتنفس

عمليتي خسب الدكتور كانت بسيطه اخذت 45 دقيقه
و الافاقه ساعتين ونص
لان البنج ثقيل علي

رحت الغرفه عالساعه 8 الا ربع

لقيت ماما واختي وعيال اختي و صديقة عمري

و اطل عليهم وانا معصبه
شتقولون
شتقولون
وهم يتريقون علي :ohwe:

نومي مقطع
الاكسجين ينزل تحت ال 94%
القلب نبضاته اذا نزلت عن 60 يرن الجهاز و اقوم من النوم احرك رجولي عشان ترتفع نبضات قلبي

و اتمرن على جهاز الاكسجين علشان ترتفع نسبته الى 98%

ثااني يوم الصبح الساعه 7
قوموني الممرضات .. تحممت و غسلت اسناني
و حطيت ميكب
و الالم خفيف
الم غازات
و غيروا لي الروب

و مر علي الدكتور سلطان
وقال لي وضعك سهل الحمدلله و عمليتك ممتازه وانتي من اسهل الحالات الحمدلله
عصبت عليه شوي ومديت بوزي لان بطني يعورني من الغاز و من قبلها بيوم عطشانه

الساعه 10 نزلوني اشرب الصبغه
خلطتها الممرضه مع عصير وشربتها و الحمدلله ما في تسريب
نزلت مع الدكتور محمد .. شاب مصري لطيف ولبق و قال لي وضعك اوكي

جاتني اخصائية التغذيه لينا وشرحت لي وش اكل و وش ما اكل
جابوا لي مويه و 6 علب دوا مقاس 30 ملل
اعبيها واشرب كل 10 دقايق وحده
و كاس عصير تفاح اشربه بالملعقه

الشوربه ريحتها ملفوف وما اشتهيتها

جاوا جدتي وعماتي وبنات اعمامي وعمي بالليل
حبايبي فرحت فيهم الله لايخليني من اهلي

و احلى شي الهدايا توننننننننننننننننننننننس هههههههههههههههههه

لما مشوا قمت امشي شوي بالممر حق المستشفى
ثالث يوم العمليه اللي هو الاربعاء
صحيت الصبح وجاني الدكتور
قال لي لازم تقومين تمشين
لبست عباتي ومشيت ابو ربع ساعه

و بعدين سووا لي اخلاء عالظهر

الخدمه: ممتازه
المرافق: مشمول سرير و وجبات وسناك
الطبيب: ممتاز
المبلغ: 41000 ممع الفيتامينات


الاسبوع الاول: حليب مع بودرة بروتين من جي ان سي-عصير تفاح-لبن كول اب
الاسبوع الثاني: شوربات خضار مطحونه
الاسبوع الثالث والرابع: الاكل بقوام المهلبيه
الاسبوع الخامس وفوق: اكل لين و مطبوخ جيدا
فتره الاكل اللين حتى تشعرين انك بامكانك تاكلين كويس
بالتدريج يعني

الكاربوهيدرات تؤلم اثناء الاكل وبتكرهينها
كميات الاكل : ربع اكلك او اقل
الجوع: لايوجد مجرد تقلصات في البطن وليست جوع
الماء: تتعودين على نوع واحد وترتاحين له و كل شخص غير
انا ارتحت للهدا

الرياضه: مشي من اول يوم وحتى الاسبوع السادس ثم نضيف رياضات بالتدريج كالسباحه والاجهزه


والان انا اكتب لكم وانا في الاسبوع السابع

احاول اكل كل شي مفيد
جح-حليب-زبادي مع لحوم مفرومه-احيانا بسكوت دايت بس كثرته تدوخني يعني فقط حبتين .. وبتشبعين!!


اجمالي النزول 12 كيلو

والدكتور يقول ما نبي نحف سريع عشان الترهل

الان وزني 86.5

و اطمح اني اصير 70 او اقل


الحمدلله

ماشاء الله لا حول ولا قوة الا بالله


شكرا لفريق بدانه كلينك وشكرا للوالد على الدعم النفسي والمادي

و شكرا لكم على القراءه