التشاؤم ومرضي النفسي اللي مو راضي يطيب

السلام عليكم
كل ما ارجوه بعد قراءة موضوعي ماتمرون ألا بالدعاء لي
انا قبل حول 15 سنه كنت طبيعيه جدا لكن كان عندي وسواس قهري داخلي يقول لي امي راح تموت
ماراح تواصل معنا الحياه ، كنت اتعوذ من ابليس وانفث على نفسي واحاول اطرد هالتفكير
الين فجأه وبدون اي سابق انذار مرضت امي مرض شديد ولما سووا لها فحوصات كامله أكدوا لنا انها مصابه بالخبيث وانتشر بأعضاء حساسه ولا يمكن علاجه وقضت سنتين مابين عمليات جراحيه وتنويم وتمريض ومهدئات الى ان توفت رحمة الله عليها
كنا في حالة صدمه نفسيه قويه ،، مو مستوعبين مرضها فما بالكم بوفاتها ..
هالشي خلف اثر نفسي عميق في داخلي غير نظرتي للحياه بشكل كبير ، صرت انسانه تشاؤميه ودايم تفكيري في المستقبل اسود
صرت احس ببرود من الحياه وصارت ردات فعلي عاديه وبارده
صارت نظرتي ان الناس اللي أحبهم راح افقدهم صرت خايفه على زوجي وعلى ولدي صرت اخاف عليهم من حبي اني افقدهم
صرت اتخيل ممكن افقدهم لاسمح الله .وصل فيني المرض اني صرت اتصرف ع حسب توقعي السيئ ،، اي مكان اروح له ما احس بأي متعه ماصرت افرح او اتحمس لأي شي بالحياه ،،
زوجي وعيالي صار وا يتضايقون مني ومن تفكيري التشاؤمي ،، زوجي يقول ان تفرزين بينا روح الأحباط
صاروا مايحبون يقعدون معاي كثير ، يتهربون من السوالف معي ، وزوجي صاير برا البيت كثير ، آخر مره سافرنا كانوا مبسوطين . وانا متضايقه قلت نبي نرجع !! قال زوجي حاجز لكم وتارك شغلي واخرتها تكدرين وناستنا !!!
اخواني وخواتي برغم حبهم لي لأني الكبيره لكن بينا فتور بسبب برودي حتى جوال ما ادق ع أحد اسئل عنه لو مجرد رسالة واتس !!
فعلا انا ما ألومهم لأني صرت كارهه نفسي واعرف اني اكبر محبطه في الحياه
ابغى راي الحكيمات كيف اغير نظرتي ، كيف اغير نفسي ، كيف احيي ارجع لحياة التفاؤل
واستحلفكم بالله من مرت هنا وقرأت وماعندها حل تدعي لي بس . لعل دعوه احداكن تصيب