حياكم الله معاي ف اول موضوع لي معاكم حبيت افيدكم مثل ماستفدت منكم كثير
اول طبق لي هو طبق التشربيه طبق شعبي معروف هو يشبه للقرصان من حيث الطريقه لكن الخبز يختلف عشان كذا نسميه تشربيه وحبيت تشوفونه على طريقتي ومكوناتي الخاصه
وهو طبق سهل يابنات ويواجه بعد يعني لو كانت عندك ضيفه يصلح كطبق جانبي زي الجريش وهيك
نبدا بسم الله
المقادير
1- خبز عراقي يعني خبز من الخباز حنا نسميه كذا يصلح اي خبز حتى خبز الصاج العادي ينفع بس الذ العراقي
2- ايدام خضار تطبخينه حطي كل الخضار عندك وخلي القرع مثلثات كبار وافضل شي ايدام لحم طبعا لاتنسين ورق الغار والفلفل اليابس الاحمر والليمون الاسود والصلصله وانا ماحط ملح نهائي بس مكعب ماجي او اكثر حسب كميتك وطبعا البهارات اللي عندك انا بهاراتي ( فلفل احمر - كمون - كزبره مطحونه افضل طحن بوقتها - بزار )
3- بصل محموس بعلبة زبده كامله يعني تذوبين الزبده وتقطعين البصل وتحطين فوقه ليمون اسود مطحون وبهارات وشوية ملح وتخلينه ع النار لما يذوب البصل شوي اذا تحبين سمنه حطي سمن بس الزبده عندي الذ
هذي المقادير الاساسيه جهزيتها نبدا الان
هذا الايدام اول مافتحت النار عنه وهو يطبخ
الان صفيت الخضار واللحم وحطيتها على جنب
وهذي المرقه صافيه بعد ماصفيتها من الخضار
وهذا البصل بعد ماحمسته
الان كذا جاهز عندنا كل شي نبدا الشغل
اللحين في باديه مثل ماحنا نسميها وهي صحن تقديم معدن غميق نبدا نقطع الخبز بالحجم اللي تشوفونه الان بالصوره ونحط نصف كمية الخبز ونبدا نرش عليه من المرقه مثل كذا طبعا حسب رغبتك اذا تحبين التشربيه يعني الخبز تكون غرقانه بالمرقه وذايب الخبز كثري مرق واذا تحبينه متشرب مرق بدون تغريق لاتكثرين بس اهم شي لازم كل قطعه خبز ياصلها ايدام وتتشرب لان الطعم كله بالايدام
بعدها نحط من الخضار وفوقه البصل لاتحطين كل الكميه بس شوي بالنص
الان نحط فوقه باقي الخبز ونعيد رش المرق عليه ونصف الخضار واللحم وباقي البصل طبعا مع الزبده اللي فيه عشان تعطي نكهه ونحطه على نار خفيفه حول 10 دقايق بس لما يتشرب زين ثم يقدم
سووها بنات ترى الرجال يحبونها وحمولتك راح يعجبها هالنوعيات من الاكل واتمنى اشوفها بالاطباق المجربه عشان اتشجع وانزلكم باقي وصفاتي وبالتوفيق