التعامل بين البنات

السلام عليكم حبيباتي
مساء الخير ❤️❤️
وش اخباركم عساكم طيبين
اليوم عندي مشكله حبيت أشارككم الموضوع ممكن فيه وحده مرت بنفس المشكله او عندها رايي

بنت خالتي متضايقة من أمها كل ما صار أي شي بسيط بينها و بين اختها أمها تستغل الشي اللي تحبه وتدعي عليها بكلام
مثل : جعلك ما تنقبلين بالجامعة
أو جعلك ما تتوظفين
يعني اي مشكله بسيطه أمها تستغل الوضع بان تدعي عليها بشي الي تحبه او نفسها فيه ميته عليه
أنا الصراحه لاحظت من زمان فرق أسلوب أمها مع بناتها
لاحظت أمها تتعمل مع بنتها الكبيره بكل حب واحترام تعزز من شخصيتها ، إي شي تبيه بنتها الكبيره تلبيه لها بدون مناقشه
عكس بنتها الصغيره بس تتهاوش معها تحاول تنرفزها و تضحك عليها قدام خالتها ما عمري شفتها تعزز من شخصيتها دايم تحاول تقلل منها
طبعاً أنا لاحظت تصرفات أمها من زمان لكن ساكته قلت ممكن أنا مكبره الموضوع
لكن اكتشفت ان مو أنا بس ملاحظه اكتشفت بعد خالتي ملاحظه من زمان و واجهات خالتي قالت لها انك تمييزين بين بناتك أنك ما تحبينها كثر ما تحبين اختها الكبيره
طبعاً هي حاولت تنكر قالت أنا ما أميز احد أعمالهم كلهم نفس بعض
وبنت خالتي حاولت أكثر من مره تواجه أمها وتقول لها:
“يمه الكلام يضايقني… لا تربطين أي شي بالجامعة أو التوظيف.”
بس أمها ما تاخذ الموضوع بمحمل الجد، وتضحك كأنه شي بسيط
المشكلة إن بنت خالتي صارت تحس بضيق وكسرة داخلية لأنها تشوف الفرق الواضح بين معاملتها ومعاملة أختها الكبيرة… وتحس ما لها نفس المكانة

وبصراحة هي خايفة تكبر المشكلة أو تجرح أمها بس بنفس الوقت ما تبي تعيش بهالشعور أكثر

فودي أعرف:
هل أحد مرّ بشي مشابه؟
وكيف تتعامل بنت خالتي مع أمها بدون ما تزيد المشاكل