التفكير ذابحني على ولدي سنتين وسبع شهور ولا يستجيب لاسمه😢

ولدي البالغ من العمر سنتين وسبع اشهر توه بدا يتكلم كلامه وسواليفه الى الان غير مفهومه ماعدا بعض الكلمات مثل ماي اسيس(يعني عصير) حاييب (يعني حليب)وكم كلمه لكنه الى الان ماكون جمله من كلمتين مجرد كلمات..
الطفل اجتماعي اذا شاف اخوه يركض يركض وراه يحب المطارده ويقوم يضحك ولمن انشد له يطالع بوجهي وبدا يقلد حركات يدي بالانشوده ..يحب ابوه واخوانه الكبار ويلاحقهم..
بس اللي ذابحني انه مايلتفت لاسمه ولايعطيني وجه خصوصا لمن يكون مشغول بلعبه ولاغيره حاولت معه كثير مايتفت الا بحاله وحده اذا قلتله (بووو)يعني اني وحش وبلحقه ممكن يلتفت يظن اني بلعب معه..ولا يستجيب للاوامر مثلا لو اقوله جيب ماي او ارمي بالزباله وغيرها
فحصت سمعه وكان سليم اخذته اخصائيين نطق وقالوالي الولد بس محتاج جلسات نطق وتركيز (طبعا ومع ظروف الكورونا ماعاد وديته)سجلته برضو بحضانه لكن للاسف داوم شهر وجات الكورونا..
انا مانعته من طيور الجنه وغيرها لكن يحب مشاهدة الكرتون..
مدري اللي مع ولدي مشكله وتحتاج تدخل من اخصائيين نطق وتخاطب ولا هي مجرد (فهاوه)زي مانقولها بالعاميه ..
وطبعا كل مابحثت بالقوقل على طول يقولي انها من اعراض التوحد او سمات التوحد 😢