شحالكم خواتي وشواخباركم اشتقت لكم حيل يابنات
اليوم يبتلكم
الجزء الثالث من طريقتي في الاي شدو
الطرق هذي تتبع الطرق اللي في الاجزاء السابقة مع شوية تغييرات
واتمنى انها تعجبكم وتكون سهلة عليكم
انا مش خبيرة مكياج ولاشي بعدني اعتبر نفسي مبتدئة ولا لي خص في الماركات
حتى مكياجي على قد الحال
اللي يعيبني اخذه واللي احس يليق علي مش كل شي اسمع عنه آخذه وصيحة وآخر موضة
لان يابنات وايد منكم من يسمعون عن شي ياخذونه يليق عليهم ولا لا يناسب بشرتهم ولا لا
حتى يمكن اللون يكون عندها وتروح تشتريه مرة ثانية
ياخواتي استفيدو ا من المكياج اللي عندكم مش تفتحون محل ثاني عندكم بعد
ولحد يسألني اي ماركة ومن آخذها
انا بقولكم عن شيء بس لان بدونه احس المكياج يكون ناقص وبخبركم عنه
ومن اي ماركة هذا فقط
بخبركم بعد شي انا تأخرت عن الجزء هذا او مابغيت اسويه والسبب
اني حاطة عيون حرمة واشرح عليها وفي رياييل يدخلون المنتدى
وبعد في بنات الله يهديهم يعني احنا نشرح هذي الاشياء حق الحريم
عشان الوحدة تتعدل جدام زوجها وجدام البنات او في عرس
البعض منهم يطلعون ويتمكيجون برع بدون غطا واللي تتمكيج عشان ( ....) الله يهديها يعني انسان مش محرم لها
يعني لاتخلونا نحصل اثم على اللي نسويه عشانكم
استخدموا هذا الشيء في الحلال
اذا تبون الصور تطلع عدل لاتحطون تواقيع
اول شي
يمكن الاغلب عنده البودرة اللي يكون فيها لمعة مش جليتر
بودرة لماعية تستخدم كاي شدو وللجسم وعلى الخد كلمة بودرة حرة
عندي انا لؤلؤي من ميك آب
وعندي أبيض من مكياجي صراحة لمعة ماعليها كلام توفي بالغرض ويكفي يكون هذا عندج بديل عن كل الالوان الامعة مع دمج الوان ثانية معاه
طبعا الشرح سويته على برنامج الفوتو شوب
والله تعبت لان الماوس عندي تعبان مرة وانا للحين مش لين اهناك في البرنامج يعني على قدي
وترا هذي كله على الكمبيوتر يعني مش شي حقيقي
طبعا لمن انت بايدج الحلوة راح تحطين مكياجج راح يطلع احلى والوان حقيقية
نبدأ بسم الله
تغسلين ويهج ورقبتج
ولو عندج مكعب ثلج مرريه على ويهج واحسن لو يكون ماي ورد
حطي كريم مرطب اي كريم عندج ويكون ويهج مبلل بالماي
وبعد ماينشف ويهج بروحه
حطي كريم الاساس ووزعيه عدل ويهج ورقبتج وتحت عيونج وفوق عيونج وعلى الشفايف وقريب من منطقة
الاذن والرقبة والانف يعني لطخي ويهج بالكامل لاتخلين لون البشرة يبين
وهذا كله با صابعج
بعد ماحسيتي اللون توزع تمام
حطي البودرة عشان تثبيت الاساس ووزعي نفس الشي وكثري تحت العين
عشان الاي شدو لمن ينزل بعدين راح تمسحينه بالفرشاة
ادري تأخرت عليكم بالدرس
نبدا حاولي وانتِ تحطين المكياج انج تذكرين الله بالاستغفار
الطريقة الاولى
1- خذي اللمعة البيضا ووزعيها على العين بالكامل الين الحاجب
وتحت العين بعد وحاولي ان تحت الحاجب اللون يكون مركز اكثر
2- 2- نحط لون ازرق على الجفن المتحرك وتحت العين بهذي الطريقة
3- بعدين نحط اللون الاخضر في الوسط يعني بين الحاجب
والعين بشكل قوس وندمج بيطلع عندنا لون تركوازي تقريبا
ونحط بالزاوية الخارجية لون كحلي
4 – اللون الكحلي يتوزع فوق العين الين منتصف الجفن
وشوي تحت العين
5- تحطين الكحل او الاي لاينر او القلم الاسود حول العين
وداخل العين اما كحل اسود او كحلي او ازرق او تركوازي
