أختى جلنار هل تتوقعين بناتنا الصغيرات اى الجيل الجاى يحظى باحترام وتقدير أفضل منا؟

ما رأيك؟

السلام عليكم ورحمة الله

أنا اختلف شوي مع خواتي الكريمات .. في ناس ممكن تتحامل على المرأة بس مب الكل

الحمدلله المرأة حاصلة على الاحترام والتقدير وأكيد التنشئة والوسط اللي هي عايشة فيه يلعب دور كبير

أنا الحمدلله نشأت في بيت ما يفرق بين الولد والبنت لما يجي الموضوع لمن اللي غلط .. اللي يغلط يغلط سواء ولد أو بنت .. الولد ما يصير يمد يده على إخته .. لو سواها يعاقب على هالشيئ .. ممكن البنت تكون صح والولد غلط .. إذا فيه شيئ الاهل يشاورونا وياخذون راي البنات ويعملون به لو كان مناسب وصحيح .. يعني نعامل مثل بعض من حيث الاحترام والتقدير .. وتشذا تنشأ الوحدة واثقة من نفسها وعارفه قدرها وتقدر تفرض احترامها وين ما كانت وفي بيت زوجها خاصة لو طلع من بيئة تماثل بيئتها

وكثير مرات أحس المجتمع يتعاطف مع المرأة أكثر من الرجل .. إذا زعلت مع زوجها .. يكون الريال هو الغلطان .. وإذا طلق زوجته وهي زينة عندنا يقولون مسكينة زينة بس هو اللي ما يستاهلها بس يرجع هذا الشئ لعقلية الناس بعد ... وفي ناس ما تنظر للطلاق كفضيحة ولكنه هدم لبيوت وفراق وألم وعذاب في أحيان كثيرة ومحد يحب بنته تتطلق لأن الريال لو طلق ممكن يتزوج أي وحدة لو من الفلبين .. بس البنت مثل الجوهرة الأهل يبولها الستر ومب كل من يقدرها وما يبون لبيتها ينهدم

اضطهاد المرأة ممكن تلغونه .. لو كل أم خافت الله في بنتها وعاملتها باحترام حالها حال أخوها وسمعت لها وعلمت أخوها كيف يحترمها ويراعي مشاعرها لأن أخو اليوم بيكون زوج لبنت ناس بكرة ولو تربى طفل اليوم على احترام المرأة بيصير رجل يحترم المرأة سواء كانت زوجته أو اخته

أما إن النساء هن السبب في اضطهاد النساء .. فماعرف عن هالشيئ . لأني أحس إن الوحدة منا قلبها يكون على إختها وايد .. لكن وقت الغلط لازم يكون فيه موضوعية .. يعني الموضوع ليس موضوع رجل ومرأة موضوع إذا أحد غلط فهو الملام بغض النظر من كونه رجل أو مرأة .. ومثل ما فيه نساء مظلومات فيه رجال يعانون

تحياتي :26:

خواتي احب اوضح موضوع ... انا لما قلت التربيه .. انا لا اقصد التفرقه في المعامله فقط .... يعني انا كنت عايشه بين اولاد . و لا احس انهم مدلعين اكثر مني بالعكس ... انا المدللة جدا ... و كانو الاولاد يضربون علشاني ... لكن .. مين الي يدلعني ,,,,, الوالد الله يرحمه .. بس امي ... لازم بعد نهايه المشكله ما تهمس بأذني و تقول ترى عيب انت بنت ! .. و اذا قلت بس هو قال او سوا ... قالت ايه ولو ... هو ولد ! امي ما كانت تعاقبني ... لانها ما تبي تتناقض مع الوالد الله يرحمه ... لكن في نفسها هذا التفكير ....
و الوالد كان كلش ولا احد من اخواني يتحكم فيني ... لادرجة اني لو اطلب شي .. هو رافضه بس رد واحد من اخواني قبل ابوي و قال لي ... لا ..... كان الوالد يوافق على الي اطلبه من دون تردد ... و بعدين يناظر اخوي و يقوله .. اختك ما يحكمها الا انا و امك ! لكن احس ان امي تتضايق اذا سويت الي ابي او احد اخواني رافض .. و تحاول دائما تذكيري اني بنت .. !!! و كانه هذا الشي شتيمه لي ! بأختصار ... حتى لو لم يؤثر الظلم على حياتك داذما تلقين صوت يقولك انت بنت .. عيب ... هو ولد
اما التفرقه في المعامله فا رأيتها في كثيييييير من الحالات ... من زميلات و قريبات ... عادي جدا ان اخوها يمد ايده عليها ! و الاهل يناظرون و يقولون ايه عادي يربيها !!!! و هي احيانا تكون البنت اكبر منه !!!!! و اكيد هو ما سوى كذا الا و الاهل مشجعينه !
للاسف في حياتي عامه ارى ان نسبة البنات المضطهدات من الاهل و بالذات الاخوه .. اكثر من المرتاحات ... يعني ايش السبب ؟ لانها تربة على التنازل ! و ان تحني رأسها للرجل اين كان و مهما قال سوا خطأ او صح ... و يمكن هذا سبب التحامل عليها ... و الي يلقى شماعه ... راح يعلق عليها الي يبي !

يا رب ما نكون عدنا لزمن الجاهلية قبل الاسلام

يا عااالم احتكموا للشرع تجدوا كل خير فى احترام المرأة