الجنين متوفي في بطني ..قصة ولادتي

السلام عليكم ورحمة الله وبركاته
اخباركم يااخوات ؟
الحمد لله على قضائه وقدره
الحمد لله له ماخذ وله مااعطى وكل شي عنده بمقدار
بدون مقدمات بتحكي لكم تجربتي لاني لما كنت حامل بحثت كثير ومالقيت شي واضح
كنت حامل بالشهر الخامس وحسب السونار بعمر 18 اسبوع
كان آخر سونار سويته قبل أيام بسيطه وكان كل شي طبيعي ..
في يوم الوفاه حلمت حلم بشع جدا خوفني مره
من صحيت ماحسيت بالراحه اصريت ع زوجي يوديني المركز عشان تكشف علي بالسونار ومع زوجي يقول تعوذي من ابليس بس ماكنت مرتاحه
المهم وداني لما كشفت علي بالسونار قالت النبض ضعيف
روحي الطوارئ وهذا كان الظهر وبعد العصر رحت عيادة دكتورة نساء ولما سوت السونار كانت الفاجعة قالت الاجنه متوفين لاني كنت حامل بتوأم بكيت كثير بس حمدت الله
وقالت لي لاتروحين الطوارئ انتظري تجيك ولادة طبيعيه لأن الرحم بشكل طبيعي راح يطردهم وتولدين بشكل طبيعي
طلعت من عندها ورحت للطوارئ اتأكد ولما شافني الأخصائي وأكد لي توقف النبض وان السبب مجهول لازم انتظر لحتى اولد عشان اعرف السبب
المهم نصحني الدكتور قال بما اننا عارفين موعد الوفاه راح نعطيه مهله 3 أسابيع وكل اسبوع تجين نسوي تحليل للدم عشان سلامتك. .
وقال لي اذا تعرفين أعشاب تنزل البيبي استخدميها مافي ضرر
طلعت واكلت رشاد بس ربي ماأذن لهم ينزلون
مشيت كثير ورقيت نفود ونزلت ماكتب ربي
بعد وفاتهم بأسبوعين طلعنا البر وقال زوجي اطلعي النفود وانزلي وفعلا صرت انزل وانا اركض لأن المشي ع التراب يسبب إجهاض
ورجعت لبيتي ونمت ولما صحيت من بكرى من النوم انفجر معي ماء البيبي هذا كان الظهر وضليت ع هالحال لحد الساعه 10 بالليل على أمل يجيني طلق لكن سبحان الله مافي اي شي .
لما صارت 10 ونص رحت المستشفى ..
ولما كشفت علي قالت مفتوح 1 سانتي والماء ماء الجنين لازم نكتب لك تنويم عشان مايصير في تسمم لأن الاجنه متوفين. .
رضيت على مضض وانا ابكي. .
لكن لجأت لله انه يسهل علي ويرزقني الصبر
تنومت وبدأو يعطوني مضاد حيوي عشان يتجنبون التسمم في انتظار لعل الطلق يبدأ بشكل طبيعي لكن مافي اي بوادر
وبعد يوم من الانتظار بدأو بالطلق الصناعي وبعد اول جرعه بدين اشرب من ترمس قرفه وزنجبيل وكمون كنت احس بماغص خفيف لكن كنت ملازمة الاستغفار والدعاء ولما جت الجرعه الثانيه سألتها كم مفتوح قالت مسكر الرحم
بكيت ودعيت الله إنه يسهل علي لايخافكم كانت نفسيتي عدم.
قالت الدكتوره ولادتك راح تكون في غرفه الترقيد مايحتاج ننزلك الكشك ارتحت شوي لاني اكره الكشك..
المهم كانت جربتي الثانيه الساعه 9بالليل لازم الاستغفار والدعاء ..
ونمت وانا ابكي الحمد لله
انتبهت ع الممرضة تصحيني الساعه الفجر تقول يلا راح نعطيكون جرعه ثالثه قلت اوكي فوضت أمري إلى الله ..
وبعد ماجات الدكتوره وحطت لي الطلق الصناعي قلت لها كم مفتوح قالت مسكر. .
بكيت من القهر حسيت اني مطوله لكن كانت معي وحده بالغرفه الله يفرج همها صبرتني وقالت لي ادعي ربك انتي في كرب ودعيت الله لان الماغص زاد علي بشكل مفاجئ صار متتابع ورا بعض وصرت ادعي بإلحاح بعد مرور ساعه من بعد ماخذت لي الطلق حسيت اني بحاجة للحمام لما رحت تفاجأت بدفع قوي مو بول ولا غيره تكرمون. .
حسيت بشي ينزل معي لمسته شي غريب بكيت وبديت ادفع وانا ابكي الحمد لله نزل الجنين الأول مسكته ورحت بسريري جتني الممرضه وركبت لي مغذي وبعدها بربع ساعه ولدت الثاني جت الممرضة وقضت الحبل السري قبل تطلع المشيمه واتصلت ع الدكتوره تجي لأن المشيمه تأخرت مانزلت انا قلقت وقتها إذن الفجر قريت وردي واستودعت الله نفسي والحمد لله الي هداني لهذا ..
جت الدكتوره وحاولت تطلع المشيمه لكن ماقدرت وبديت ابكي واصيح لأن الألم لايحتمل استدعت الاستشارية ولما جت الاستشارية قالت من قطع الحبل السري من سمح له
قالت لي تسمعين لي احاول اطلع المشيمه قلت لها ايه بس شوي شوي
حاولت ومع محاولتها احسها تطلع روحي بديت احس بدوخه نزفت كثير ..
دقيقتين وقالت الدكتورة جهزوا غرفه العمليات بسرعه
بكيت حاولت اتصل بزوجي لكن مايرد استعجلت الدكتورة قالت بسرعه نزيف ..
لما وقفت عشان البس ثوب العمليات انفجعت بكمية الدم ومسكوني الممرضات ولبسوني وركض ع غرفه العمليات
دخلت ولا اول مره ادخل غرفه العمليات جاني دكتور التخدير وطمني قال كلها ربع ساعه ان شاء ونخلص.
قلت له استودعني الله قال لاتخافين سهله بإذن الله ركبوا لي أسلاك بصدري وبعدها غبت عن الوعي وصحيت بعدها وانا احس الدكتور ينزع روحي نزع صرخت صرخه احس فجرت الغرفه وحاولت امسك يد الدكتور بقوة مدري منين جت!!
بعدها رجعت غبت عن الوعي. .
صحيت الساعه 10 ونص الضحى بعد ماركبوا لي أكسجين بفمي والدكتور يصحيني. .
والظاهر انه شي يبطل مفعول البنج .
صحاني الدكتور وهو يقول الحمدلله يابنتي ربي نجاك من الموت انتي تعرضتي لمضاعافات. .
بعدها رجعت اغيب عن وعيي وانا احمد ربي ان رد علي روحي .
جلست بغرفة العمليات 5 ساعات تعرضت خلالها لنزيف شديد ومع انهم ركبوا لي وحدات دم إلا أني تأثرت كثير وصار التصاق وتمزيق للمشيمه استغرق ساعتين عشان يطلعونها .
وبما اني حامل بتوأم صار تمدد للرحم وتوقفت عنه الانقباضات التي ترده لحجمه الطبيعي ..
وانخفض الضغط انخفاض شديد والحمد لله على كل حال الي رد لي روحي واحفظني برحمته. .
وأسأل الله أن يجعل أبنائي لنا شفعاء ويرفعون يوم لاينفع مال ولا بنون.
ولازال السبب في وفاتهم مجهول ..
الدكتور يقول أرسلنا المشيمه لمستشفى المنطقه عشان يحللون ويعرفون السبب ..
وتحتاج وقت عشان تطلع النتيجه أقلها 14 يوم .
ان شاء الله في موعدي الجاي اعرف ..
دعواتكم لي بالصبر والسلوان وان يعوضني ربي خيرا عما فقدت ..