الحب صار مشكله

السلام عليكم و رحمة الله و بركاته

هذي قصة واحده من صديقات طفولتي و احبها موووووووووووووت و لكن عندها قصة كل ما اسمعها يضيق صدري عليها و اتضايق للحاله اللي و صلت لها....... بس قلت بقولها لبنات حواء و بشوف شو رايهم بالموضوع

ربيعتي بنت الأولى ل 5 شباب و أخت واحده و ابوها وامها يحبوووووووووها مووووت لكن عندهم عادات و تقاليد صعبه شوي.....المهم ابوها و العياذ بالله يسكر ( يشرب خمر) و هم تعودوا على هالحال صار عندهم عادي على رغم بعض المشاكل اللي محد يدخل و يحلها غير البنت الكبيرة لأنها البكر و الأب ما يسمع غيرها... و تزوج اخوها الأصغر منها بسنه و زوجته جابت بنت و صار الأب ما يحب غير الولد و بنته و زوجته و لا يتكلم و يشوف غيرهم في البيت

صار انه البنت جا شخص لخطبتها من جنسه ثانيه من جنسيه البنت الأصليه (يعني البنت أصلها من جنسية الخطيب بس اخذوا جنسية البلاد الخليجية اللي هم فيها) ووافق الأب عليه و لأن ظروف الولد الماديه مرررررررررررره صعبه فطلب من والد البنت اعطائه مهلة وكانت لمدة سنه يعني هو خطبها شهر 9 و طلب لغاية شهر 9 القادم........

شهر 5 انسجن الأب لتعاطيه الكحول و الحيازه عليها لمدة شهر و في هالشهر الولد عرف بحالتهم و عرف بسجن ابوهم فأتصل بالبنت عشان يواسيها و هي حبت هالشي فيه و لقت فيه اهتمام فيها مالقته في اي شخص في الدنيا لا من اهلها و لا من امها و لا ابوها و بعدها صارت تتكلم معاه كل يوم كلام عادي ما يخدش الحياء ابدا..........و بعدها بشهر طلع الأب من السجن و اخوها عرف انها تكلم الولد وخبر ابوها والوالد سكت عن الموضوع في البدايه بس لما رجع للشرب قام يرمي كلام على البنت و امها و يقول اصلا انتوا اللي جبتوا الرجال ..بنتج تعرفه من زمان و اكيد سوت مصايب معاه و الأم و النت يوم يكون سكران ما يردوا عليه....

البنت حبت الرجال حب جنون و هو بعد صار يشوفها كل شي في دنيته و صار هو املها الوحيد للخروج من هالعائلة و لكن ظروفه الماليه ما كانت تسمح للتقدم للبنت و خاصه انه ابوها طالب مهر غالي بالنسبة لوافد و في شركة خاصه ....و البنت عارفه كل شي عنه و عن حياته و صارت ما تريد تشوف ولاتسمع غيره في هالدنيا و مره قام ابو البنت بضربها هي و امها لكن حالتها كانت اسوأ و نقولها على المستشفى و اكيد ما قالت لهم انه ابوها اللي ضربها و إلا كانوا سجنوه مره ثانيه و راح الولد يوم شاف ان البنت ما ترد عليه اتصل بأمها و سأل عنها قالت له انها في المستشفى و خبرته بالسالفه....

تصدقوا يا بنات انه امها تحلف باللي خلقها انه كان يبوس ارجيلها في المستشفى و يبكي عليها بكى تقول امها والله انه قطع قلوبنا من كثر ما بكى و انه كان في هذاك اليوم بيروح يذبح ابوها بس ربي ستر عليهم و كان كل يوم يزورها في المستشفى و يجلس عند باب غرفتها و يصلي لها انها تقوم بالسلامه حتى كل اللي بالمستشفى تقطعت قلوبهم عليه

بعد فتره البنت طلعت من المستشفى و خلصت المهله و دخلنا في شهر 2 تعرفوا ابوها شو قال .....قال انه الولد ما بيتقدم له إلا لغاية ما تشتغل و تحصل بيت يعني انه داخل على طمع يبغى جنسيتها و راتبها و السكن و هو يجي على الجاهز مع انه هو مايريدها تشتغل و تقعد في البيت بس ظروفه الماديه كل ما هي تصعب و موب راضيه تنحل ومحد يعرف بهالشي غير البنت حتى عشان تتأكد كانت تتصل على الشركة و يأكدوا لها صحة كلامه في كل مره......

يا بنات حواء ساعدوها شو تسوي مع هالأب و الله انه حالتها تعبانه مووووووووووت هي و الخطيب....و الولد يبغا يكلم ابوها عن حالته الماليه و انه ينتظره شوي بس خايف انه يقول له دامك موب قد الزواج ليش تتزوج خلاص انته في طريق و بنتي في طريق و مع هالكلام راح يموتوا الأثنين البنت و الولد

ف قولوا لي شتسوي ساعدوها والله انه نحن ربيعاتها عجزنا عن مساعدتها و سامحوني على الأطاله