من كنت بالابتدائي وكان المشهد هذا يتكرر امامي يوميا الا وهو حرمه صغيرونه قصدي ورعه من البنات
تصيح وتبكي والطالبات عاملين حواليها دائره وش فيك وايش فيك وليه تبكين؟
الى درجة اني مره برابع قعدت اصيح وانا ماعند امي سالفه لحد ماسووا علي الدائره
بس بشوف وش المتعه ولكن مالبثوا ان رحلوا الى بنت اخرى لاني ببساطه ضحكت تقل خبله عقب الصيحه وسمعت بنت بسادس تقول ذي مجنونه قوه نروح لعواطف تصيح ولما رحت المتوسط كانت معي قريبتي بنفس المدرسه بس الشي المستغرب ان باليوم تسألني الف وحده عنها
حتى اللي ماعرفهم ويقولولي ليه ابوك مايتصرف ليه ماتساعدونها
بس انا ماكنت اعطيهم وجه لاني مسرعه بشتري فلافل وبيبسي وهمي على كرشي كنت قصيره والفسحه تخلص
وانا ماده الريالين ماشريت
الا في ذات يوم جوني عصابة بنات وقالولي انتي ياحرمه نبيك بالحصه الاخيره بموضوع
انا تروعت والصراحه الحصه الاخيره سويت عمري احل واجباتي مابي اشوفهم تحت
الا لقيتهم طالعين لي الفصل فوق ويقولي ليه انتي كذا ليه ماتساعدين قريبتك ولا كنك تعرفينها
ومرمطوني وانا مدري وش السالفه اتاري الخانوم قريبتي كل يوم تبكي ومجمعه البنات حواليها
قال امها امريكيه وتطلقت وراحت امريكا وهي بعذاب عند مرت ابوها
ظل بؤي مفتوح
قرابة الساعه من الاندهاش ثم ضحكت وقلت امها عندها منين امريكيه وش هالخرابيطانتم شوفوا الفيس بالله هذا وجه وحده امها امريكيه
قامت رئيستهم اللي مجمعتهم يوم حست بالاحراج تقول أي انا كنت شاكه انه مو حقيقه لانها مره جابت صورة وحده امريكيه مقصوصه من مجله وقالت هذه امي اللي ابوي حرمني منها
يحووووول وش هالفلم وكل يوم مجمعه البنات وصياح من قلب هالتسذوب وانا مدري عنها بس هي درت اني كشفتها بس ماقلتلها بالصريح خفت امخش مشاعرها
تفشلت منها ورحت علمت امي وابوي وقعدوا يضحكون على الغداء بعدين قالولي قومي انقلعي شيلي الصحون
لما رحت الثانوي بعد كان في وحده مطلقه هي حدث المدرسه ماعندها غير كان يكفخني وكان ينتفني
امس عجزت اذاكر تذكرت السنه اللي فاتت يوم شق كتاب التاريخ << علينا ماذاكرتي حنيتي للايام الخواليالمهم ورحت الجامعه وتوظفت وانا كل يوم اشوف عينات هم ضحايا ظلم واستبداد حتى لو حياتها عاديه
لازم تشكى وتشكى اخوي هاوشني ابوي صفقني امي خلتني اسوي جريش ووو
زهقت من هالنماذج الصبح اول مادخل قبل اصفط عباتي الا اللي معي بالمكتب اووووووووووووف طيرتني
طفش نكد زهق كارهه دنيتي
الحمدلله ياحرمه انتي بنعمه يكفي انك بصحتك وش تبين
هذا غير أي وحده لو عندها انفلونزا عاديه وداومت يالهوي على اللي يصير
تقولون تباشر العمل من غرفة العنايه المركزه
والمغذي مشبوك بيد وهي تشتغل بالثانيه وتنوح وتشكي ودخت وطحت وحرارتي وظهري تعبااااااااانهوبعدين ياحرريم اللي ابي اعرفه وش المتعه في تقمص شخصية الضحيه واني المسكينه المظلومه الصراحه عمري ماحبيت هالدور بس شفت كثير عاجبهم لو الموضوع عادي لازم تقوله لك بحزن واسى يعني تراي ضحيه
انا ماتكلم عن الناس اللي واقعهم مرير اتكلم عن العادين اللي تكون تشوف التلفزيون تجي اختها تعطيها شلوت
تقوم هي مجمعتنا ثاني يوم وتحكيلنا عن الاضطهاد اللي تعانيه بيتهم وتطلبنا رقم حقوق الانسان
حررمه هل مره عشتي دور الضحيه أي اكيد عشتيه بس قوليلي مالمتعه اللي لقيتها بهالدور
محسوبتكم مخرجه وبتشوف امكانيات الحريم الفنيه
