الحريم بعد العرس,,,,؟؟

السلام عليكم ورحمة الله وبركاته
هذا مايحدث عند كثير من النساء بعدخروجهن من قاعة الافراح متوجهين للبيت,,,,,,,


ركبوا السيارة وكل وحدة تنتبه على العبايه لايصك عليها الباب
وبدا الاستديو التحليلي

الاولى: ايش فيك تأخرتي ؟

الثانيه: ساعه ادور عبايتي .....انتي ماشفت الحريم يتضاربون عند العبايات ,العبايات تلخبطت!

الثالثه:ياليتنا مارحنا زواجهم

ليش

الثالثه: اف زحمه والبزران يتضاربون بقشر البرتقال ويلعبون بالمويه

الاولى: ماشفت ذيك اللي كبت القهوة على الحرمه اللي كانت نايمه ....؟

الثالثه: لا والله ماشفتها..ماشفت ولا شي بالزواج..طول الوقت قاعدة ادور جزمة بنتي مها!!

الثانيه: وش رايكم بالفستان اللي لابسته خلود؟

الاولى:مو حلو...محنقط عليها والسحاب باين...

الاولى: انا اعجبني مكياج امل .. تقول ان زوجة خالها جابته لها هديه من باريس ..

الثالثه:ههههههه..من باريس تضحك عليك يا هبلا... تلقينه من محلات ابو عشرة....

وقفــــــــــــــــــــه ..فاصل اعلاني .. الجوالات ادهرت شوي ....

الغريب والعجيب انهم اثناء حديثهم في السيارة يقولون لبعضهم...خلاص يابنات بس..ترى مايجوز نتكلم عن الناس

تـــــــــــــــــــــــــــــــــــــــــــــــــــــــــــكمله

الثانيه:صح كلامك ياختي,, مايجوز نتكلم عنهم... بس شفتي الحرمه اللي كانت قاعده جنبي على العشاء
وتقطع لي لحم؟؟

الاولى: ايه شفتها....هههههه متوصيه فيك ...شكلها بتخطبك لولدها...

الثانيه: وجع في شكلها هي وولدها...تقطع لي من اللحم الكبار اللي ماينوكل وطايحت لي في اللحم الزين,,,,,

ايش رايكم بالعشاء؟؟؟
الاولى: بارد

الثانيه: كله دسم وشحم

الثالثه: كله فلفل حرق بلاعيمي


الثانيه:وفي حريم ماتعشوا...قاعدين على الكراسي اللي بالكوشه... مالت ..شايفين انفسهم

الاولى: حتى ام العروسه... ماتعشت مسكينه...طول الوقت قاعدة تبكي ...

الثالثه:هههههه تبكي من الفرحه ياهبلا...ماشفتي صدرها منتفخ من الفلوس

بس..خلاص...مايجوز.....صح والله...مايجوز.. بس ..شفتي ..وشفتي...


واخيرا وصلنا المزل ..... شوفي لي حبتين باندول اكسترا


قال الرسول صلى الله عليه وسلم_لاصحابه"الا اخبركم بشراركم ؟قالوا: بلى يارسول الله قال:المشاؤون بالنميمه المفسدون بين الاحبه الباغون للبراء العيب"

وقال عليه الصلاة والسلام:"مررت ليلة اسري بي على اقوام يخمشون وجوههم باظافرهم قلت ياجبريل: من هؤلاء؟قال: اللذين يغتابون الناس ويقعون في اعراضهم"

اللهم انا نسألك العفو والعافيه في الدنيا والاخرة
منقوول