الحريم حساسات .. !!

السلام عليكم ورحمة الله وبركاته


اول شي صلوا على النبي صلى الله عليه وسلم واكثروا فان صلواتكم معروضه عليه


في موضوع مهم جداً ، و محزن للاسف ..
وحده تقول زعلت من زوجي وبكيت ، شافني قالي : لاخلصتي بتساك سوي قهوه !
وكثير شكاوي زيها .. و تدندن حولها




المرأه محروقه والرجال ماعنده فيها ..!!
،




شي مهم اخواتي نفهم ان المرأه طبيعتها عاااطفيه جداً ..
الرجال لا ..


فلابد كل بنت وحرمه ، تعرف تتعامل مع كمية المشاعر اللي عندها تفريغاً و موازنه و ..الخ
لاتحملين زوجك عبئ تحملها ، الرجال مايفهمون ، ولا انجحدتي لاتلومين الا نفسك
طبيعتهم مختلفه عنك ..


انتي سايسي نفسك ، انتي واسيها ، انتي فريغها باحاديثك مع نفسك ،،حتى تتوازن ثم تشوفين الحياة بشكل افضل
معظم النساء اي موقف بينها وبين زوجها او اهله يصير فيه مشاعر ، تحمل زوجها عبئ اصلاحها ومواساتها و...الخ
بالزعل والتنكيد و..الخ


وهذا خطا فادح ، لانك بتصيرين مرض ونكد على قلبه ..هو موفاهمك
ووفق طبيعته مايفهمك من هذي النقطه ، انتي خلقتي من ضلع الصدر فانتي عاطفيه
هو خلق من الارض فهو عملي ويفكر بالحلول والامور غيرك بهالنقطه


لذلك نصيحه لكل الاخوات ، كل المواقف فيها مشاعر ..
باستمرار فرغي مشاعرك ، خلي لك اوقات خلوات مع نفسك ناقشي المشكله
وش زعلني ؟ ليش زعلت ؟ وش حسيت ؟ ليش حسيت كذا ؟ الموقف مقصود او لا ؟؟ونترفع عن الظن اكثره اثم
وممكن تستخدمين الدفاتر ، جيبي دفترك واكتبي فيه كل موقف تحسين فيك طاقة مشاعر


" اليوم تخانقت مع ابو فلان ، لانه صرخ بوجهي وانا ماارضى انه يصرخ بوجهي
كنت جايبه صينية القهوة متحمسة للسوالف معه وتوطيد العلاقه ، ومسوية حلا يحبه من المغرب
لكن طول ماانا اتكلم ماسمع لي ولااهتم ، عيونه بالكوره وهالشي فعلاً ازعجني ، حسيت اني مهمّشه
وكنت اظني اهمّ عنده من الكوره ، لكن جاني احباط ، وانا غاضبه الان ، قمت وتركته
احس انه مسّ كرامتي واهانني ، واحس بالحزن لاني مو الاهم بحياته ، واتمنى انه يراضيني حتى يكون موقفي افضل
وتنجبر شوي نفسي ، لاني احس موقفي بايخ ومو حلو "..






لاحظي كيف الرساله صريييحه جداً ، وكميه تعبير عن واقعه وتفاعلات مشاعرك فيها
بدون صيغ مبالغه وتهويل وبدون اهمال لبعضها ..
هالشي يساعدك باذن الله كثيرا في انك ، تفهمين نفسك وتتعاملين مع مشاعرك مستقبلا
وتحلين امورك بعقل


المهم بعد ماتكتبين صكي دفترك وروحي صلي ركعتين ،واقري وجهين بعد ماصفى بالك ولاتفكرين بالموضوع ابداً
بعد فترة ، بتفتحين الدفتر ، بنلاقين ان المشاكل عاديه ، وغالباً انتي الغلطانه كمان
لان عندك مفاهيم خطأ بتستفيدين منها ، بدون كبت وقلق وتضخيم يتحول الى ضرر نفسي عليك يعطلك عن واجباتك واستمتاعك بالحياة ويصعب عليك اداء حقوقك لزوجك لكمية التراكمات






هذا واسال العظيم الكريم ان ينفع به