الحقوني..الهيئة طاحت بزوجي وهومتواعد مع وحدة!!!!!!

السلام عليكم جميعا..
بصراحة يابنات مدري شلون ابدا بس اكيد بعضكم يذكر موضوعي اللي كتبته قبل وكنت اشكي من خيانة زوجي الفظيعه وحيرتي شلون اتصرف..من عقبها صرت ادعي بالليل والنهار مره له ومره عليه.. وقبل تسع ايام تقريبا كنت رايحه انا وامي نزور اهله وهو اللي مودينا ودخل معنا شوي وحنا جالسين جاه اتصال ونط فجأة وطلع ..المهم انا طنشت لحد ماجا وقت رجعتنا وادق عليه يجي ياخذنا..قالي انا بالبر دبري احد يرجعك..المشكله باين من صوته انه بغرفه وانا اعرفه زين مو راعي بر ابد..انا قلبي نغزني قعدت شوي ودقيت مره ثانيه والقى جواله مقفل والثاني بعد.. وتولع النار بقلبي مدري ليش حاسه انه مسوي بلا..رجعت البيت بالليل وطول الوقت ادق عليه مقفل جوالاته..عاد انا وصلت معاي قمت ارسل رسايل هواش لاني قلت اكيد انه محول الجوال ولاهي بشي ثاني..انتظرت لحد وقت رجعته اخر الليل ومارجع ودقيت على الهندي حق استراحته وقالي ماجا ولاشفناه طول اليوم..هنا لعبت بي الوساوس بديت احس انه فيه شي موطبيعي ..والله يابنات طول الليل ماغمضت عيوني..عندي احساس غريب بانه صاير له شي..وقعدت على اعصابي طول الليل واول مابدا الصبح الساعه ست ونص دقيت على عامل مصري يشتغل عنده بالمحل..واحمد ربي انه رد علي..المهم سالته عن زوجي قال ماشفته من قبل امس ..ترجيته يسال عنه وقلت له انه غايب عن البيت واخاف فيه شي قالي انشالله بشوف واردلك.. مرت ساعات وانااحترق لحد مادق المصري علي وزف لي الخبر اللي طاح مثل الصاعقه فوق راسي..قالي:زوجك بايت البارحه بقسم الهيئة لانهم ماسكينه متلبس بمشكله..وعلمني انه جاب هالخبر من صديق زوجي ...انا حاولت اعرف وش السالفه بالضبط وحلفت المصري انه يقولي الحقيقة بعد مااقنعته اني متماسكه ومافيني خلاف..ويالله عقب ترجي واقناع قالي القصه: زوجك مسكوه رجال الهيئة وهو رايح يودي هدايا وعشا لوحدة من خوياته وضبطوه قدام باب بيتها لانهم من فترة مراقبينه بعد ماشافوه كم مره يدور بالاسواق وشكو فيه وانه البارح كان بقسم الهيئة والحين هو بالشرطه بعد ماحولو القضية لهم..والشرطه بدورها حولت القضيه على الشيخ..وطبعا تعرفون معنى انه القضيه تحول للشيخ..يعني الحكم يا الجلد او السجن على اقل تقدير...سالته ومن عنده الحين قالي ابوه واخوانه وانهم بيطلعونه بكفاله وهذا اللي صار...دخل زوجي علي عقب صلاة الظهر والله يابنات ماتخيلون شلون كان شكله كابر عشر سنين وذقنه طالع كان له شهر ماحلق وهو ماله يوم وكان مرتبك وخايف وحاله مبهذله..المهم انا سويت نفسي عادي وسالته وينك ووش صاير لك؟؟ قالي بالشرطه عشاني متهاوش مع اثنين وصار اطلاق نار..انا اكلتها وسكت..حطيت له لقمه ياكلها ومااكل قالي انا بنام تعبان..دخلت وراه الغرفه..وسالته ليش تكذب علي؟؟ وعلمته بكل شي وقلت ان هالمعلومات جبتها من بنت خالتي لان زوجها بالشرطه وعرف بقضيتك وهي دقت تطمن علي وعلمتني.. يالله كيف صار شكله..منهار بالمره وحالته حاله..مادريت فيه الا وهو قاعد يبكي ..والله اول مره بحياته يسويها قدامي..انا رحمته وطلعت وخليته..يوم قام العصر تفاجات فيه يعطيني شرايح جواله امسكها معي وطلع..انا ماصدقت خبر اخذتها ومسحت كل شي فيها من ارقام ورسايل..واول ماجا قلت له:شف يافلان انا من زمان ادري عنك وساكته موضعف مني ولا رضا ولكن ابي اعطيك فرصه انك تبطل هالحركات من نفسك خصوصا انه مابقى الا كم اسبوع انشالله وتصير اب..وانا كنت اتحسب عليك وشف شلون ربي عاقبك وفضحك..ابوك بنفسه جاي يكفلك ياليت بقضية دين ولا هواش الا جاي يكفلك بقضية الواحد يتفشل انه يقولها وعلى اخر الزمن تسحب هالشايب المسكين معك بالاقسام يالمتزوج ياللي بتصير ابوعيال..وشلون بتصير نظره ابوك واخوانك لك بعد ماطحت من عيونهم وخسرت ثقتهم وكله عشان مين؟؟ عشان وحدة منحطه باعت ثقة اهلها وانت بعت سمعتك عشانها بالله قل لي وش استفدت..طبعا ولاشي الا خسرت واجد واحمد ربك انهم مامسكوك وانت نايم معها ولا كان رجموك وصارت قصتك روايه الكل يحكي فيها وبعدين خاف الله باخوانك وخواتك لانك بتشوه سمعتهم لابغو يتزوجون والناس سالت عنهم ..وفوق كل هذا ترى كل اللي تسويه حرام بحرام ومصير ربي يعاقبك عليه عاجل او آجل..وبعدين انا وش ذنبي طالعه من بيت اهلي معززه مكرمه واجي لبيتك تهينني وتمسح بكرامتي الارض..........وماخليت شي بقلبي الا وقلته..وهو ساكت يسمعني ومارد ولا شي غير انه وعدني بيتغير..والحين يابنات لاحظت انه متغير وعاقل ويرجع البيت بدري لكن مدري هو مؤقت ولا انشالله ربي يجبر بخاطري ويخليه كذا على طول..والله يابنات هذا اللي صار معي واحمد ربي اني صبرت ومارحت بيت اهلي وهذاني ادعي ليل ونهار ان ربي يبعده عن طريق الحرام,,,واسفه على الاطاله واتمنى من كل من قرت موضوعي تدعي لزوجي بالصلاح وتدعيلي بان الله يهون علي بولادتي وجزاكم الله الف خير