الحقوني بنت جابت لي الكآبة واهوجس فيها

السلام عليكم ورحمة الله وبركاته





مرحبا حوائيات
انا اول مرةاطرح مشكلة لي في المنتدى وارجوا من الله ثم منكم ان ترشدوني لما فيه الخير ولكم مني جزيل الدعاء





انا عندي بنت عمرها 5 سنوات وولد عمره 4 سنوات
بنتي طبعها هادي وحركتها قليلة لكن في البيت تلعب مع اخوها بالالعاب ويتضاربون احيانا زيهم زي اي اطفال في سنهم
والولد فيه اشوية شقاوة وحركة بحكم انه ولد
حبيت اعطيكم فكرة عامة عشان تكون عندكم خلفية
عموما بنتي سجلتها على الترم الثاني في الروضة
طبعا البنت في البداية ماشاء الله لاحول ولا قوة الا بالله كانت مبسوطة بحكم انها حاجة جديدة
وبعدين سارت تقول ياماما انا ما ابغى اروح الروضة ولا ياماما تعالي معاية الروضة وزي كذا بالعافية تروح
وكنت دايما اسالها مين الي يلعب معاك من البنات تقولي ولا احد ولا تتجي تقولي فلانة خاصمتني وقالتلي انتي عجوزة او فلانة تقول انها ما تحبني او فلانة اخذت حلوياتي وشبسي اقولها ياماما ليش ماقلتي للابله تقول لا اخاف تضحك عليه!!
انا سار وجهي كذا
طبعا اغلب الايام بهذا الروتين لما رحت الروضة اسال عنها قالت لي الابلة انها شاطرة وتستجيب ومستواها ممتاز بس مرة هادية حتى لما تبغى تقولي شي تجي توشوش لي في اذني فقلتلها عن مشكلتها وان ما عندها صحبات وكذا قالت لي راح احاول احل الموضوع وشكرتها وطلعت
جيت اليوم للروضة ابي اسال عنها و كانوا منزلينهم يسون لهم انشطة ويلعبونهم
تخيلوا يا بنات البنات والاولا د اللي قاعد يلعب واللي قاعدين جمب بعض يضحكون ويسولفون الله يحفظهم جميع
وبنتي قاعدة وحدها بعييييييييييد
انا خنقتني العبرة يوم شفتها كذا بالذات ان لها فترة طويلة في الروضة يعني الحين قربوا يخلصون الدراسة وهي باقي ما عندها صاحبات
قولوا لي يا بنات اش اسوي والله ضاق صدري حتى العاملة يوم شافتها معي قالت بنتك غريبة لما الابلة تنزل الفصل يلعب في الالعاب كلهم يجرون ويلعبون الا هي تقعد تتفرج عليهم من بعيد وهي حاطة يدها في فمها مرة هادية بنتك انا خايفة تكبر وتكبر الصفة هذي معاها
قولوا بالله عليكم ارشدوني اش اسوي معاها كيف اغير من شخصيتها
والله يجزى كل وحدة ترد علي بالجنة