الحكيماااااات ادخلو أرشدوني لأَنِّي من جد تعببببت😔

اسعد الله مساؤكم بالمسرات 
ماادري إِيش اللي صار كتبت مشكلتي بالتفصيل بعدين طار الموضوع روحت عدت الكتابة ومدري فين راح عموما بكتب لكم مشكلتي وياريت ألقى حل




بنات انا تعبت من خيانة زوجي لي 
ماتصدقو لو قلتلكم ان زوجي يحبني ..يخاف على زعلي ويشيل همي.. في البداية اتزوجنا وطلع ولله الحمد إنسان طيب مثقف له شخصيه بين الناس يحب اطفالو جدا وحنوووون جدا معانا إنسان رومنسي ويقدر المرأة جداا يحترم المرأة وياخذ رايها بكل شي
بصراحة كنت افتخر فيه قدام اهلي وهم برضو يحبوه جدا وله معزه عندهم 
انا ليا تقريبا خمس سنوات متزوجة وعندي بنت وولد والحمدلله مبسوطين مع بعض وزوجي مو مقصر معانا بشي ، دائماً يخرجنا ويسفرنا لاوروبا وآسيا ودبي .. طبعا أكيد تحصل بعض المشاكل البسيطه اللي تسير باي بيت لمن على طول نرجع
المهم يابنات مرة كان عندنا اجازه وروحنا فرنسا وسويسرا ولما رجعت سافرت لاهلي لأنهم بعيدين عني واشتقت لهم .. ولما روحت عندهم كلمني زوجي قالي انا حسافر مع أصحابي برا طبعا زوجي مايستاذن مني عشان تعرفو يعني بس حاب يبلغني ونا ماكان عندي مانع قولت اوك جلس عشرة ايام وبعدين لما رجع حجزلنا انا واطفالي واستقبلنا بالمطار احلى استقبال جايب لنا ورد ولما دخلنا البيت جلس يحضني ويحضن عيالو المهم وقتها لاحظت ان جوالو عليه باسوورد واستغربت لأنو اول كان عادي مفتوح بس قولت يمكن لما سافر خاف احد يفتح جوالي خصوصا ان صوري فيه وبعد أسبوع تقريبا دفعني الفضول ان افتح الجوال وهنا الصاااااعقه اكتشفت ان زوجي مسافر ومتعرف على بنات ورايح معاهم كفيهات ومطاعم وأسواق وقتها جسمي يرجف من الصدممممة مو معقوله زوجي يسويها على طول قفلت الجوال ودخلت نمت ونا دموعي اربعه اربعه من قوة الصدمة .. قررت أني اهدا وأفكر كويس وماتستعجل بردة فعلي عشان لااندم.. جا ثاني يوم وكنت أتظاهر أني تعبانة من شغل البيت وإرهاق وجلست أفكر قولت لو فتحت الموضوع دحين ماحينفع الكلام خصوصا أني مالقيت اي تغيير بزوجي وماحيفيد طالما راح ورجع.. حاولت أنسى وعدت الأيام والشهور والحمدلله زوجي يهتم فينا ويلبي رغباتنا
بعدها بفترة طويلة قالي انا حسافر مع أصحابي  وقتها مارتحت واسالوا فين بتروحو يقولي لِسَّه ماحددنا ونا عارفه آنو يكذب عليا .. طبعا كنت عند اهلي باين عليا الحزن والهم ورجع زوجي واشوفو زي المره مشتااااق ومتلهف عليا لكن انا ماكنت مبسوطة ودخلنا الغرفة وبعد مانمنا فتحت جوالو وزي ماتوقعت لقيتو مسافر نفس الدولة ومقضيها مع البنات واكتشفت إنّو مسافر لوحدو لأنو اصحابو جدا محترمين وماعندهم هذي الخرابيط يعني يضحك عليا وقتها يابنات ماتحمللللت من القههههر اللي فيا دخلت عليه الغرفة وهو نايم وأخبط الباب بكل قوة واسحب اللحاف وهاتك شي وشتم لأول مررره يصير بينا كده وهو لتفجع وقال انتي فاهمهً غلط قولت انت حقير وااااطي وصخ ولاتخاف الله وطلعت وروحت غرفه عيالي كأنو نايمين وانفجعو وجلسو يبكو من الخرعه قام أخذهم وقعد معاهم في الصالة ونا جوا وبعدها بساعه حسّيت إنّو خرج من البيت قومت  اتوضيت وصليت ركعتين ونا ابكي وطلبت من الله ان يرشدني للصواب .. وحسيت أني هديت شويه قررت اادب زوجي روحت أخذت أغراضي كلها وملابسي وحطيتها بغرفه عيالي وصرت انام معاهم وارسلت له ثاني يوم رساله ( كل اللي بينا انتهى عيش حياتك زي ماتبغى ورجاااء لاتتدخل فيا أبدا ) 
طبعا انا مستحيل أقول لاهلي لأَنِّي زي ماقلتلكم اهلي يحترموه جدا ويقدروه ومستحيل يتخيلو إنّو ممكن يسوي حاجة زي كذه
طبعا صرت عايشه لنفسي واعيالي أقوم الصباح بدري والبسهم عشان أنزلهم الحصانه والروضة هو جايبلنا سواق وبعدين اروح للجامعه لأَنِّي اشتغل معيده وأول ماخلص من محاضراتي ارجع اخذهم وأروح للبيت ارتاح شويه بعدين أسوي الغدا ولااسالت فيه أبدا صرت أكل مع عيالي 
وإذا شوفتو بمكان على طول اروح لغرفة عيالي ماكنت أعطيه فرصه إنّو يشوفني 
تخيلو يابنات جلسنا على هذا الوضع شهر كاااامل صحيح وقتها كنت احس بالوحده والحزن عاللي انا فيه لكن قررت أني اكمل واخليه يتأدب .. صرت اخرج مع صحباتي وأضيع وقتي شويه
أما طلبات البيت اكتبها برساله والاقيه جايبها وحاطها بالمطبخ 
المهم بعد شهر كامل دخل زوجي علينا بعد المغرب ومعاه بوكيه ورد كبييير وجاتوه وجاي يحضني من ورا وفتها كنت اغسل المواعين اول ماحسيت فيه دفيتو وامتنعت وشويه ألاقيه يبكي قالي انا أأسف والله انها نزوة وانتي عندي بالدنيا ومن هالكلام سيبتو ورحت الغرفة جلس يبكي ويترجاني ويبوس فوق راسي وايدي ورجولي حتى قالي أوعدك أني ماعيدها قولتلو لاتظن أني حنسى بسهولة انت طعنتني وجرحتني المهم جلس يعتذر الين رضيت وبعدين طلب مني نطلع نقطع الجاتوه برا مع عيالي ورجعت المياه لمجاريها.. 
بعدها بكم أسبوع اخذنا على دبي ومره انبسطنا انا وعيالي ولما رجعت البيت تعبت من شغل البيت قالي إِيش رأيك أجيلك غسالة الصحون تريحك شويه وقتها فرحت وجابها ليا والحمدلله عدت الأيام والشهور والوضع تمام  وقبل شهر جابلي أيفون سكس هدية عيد ميلادي
دحين طلبت منو نسافر بتجاره الربيع إيطاليا اول شي قالي يبغالها فيزا وحوسه خلينا نروح شرق اسيا بس بعدها قالي خلاص جهزي طلبات الفيزا ونروح نسويها وبالفعل روحنا سويناها وطلعت لكن فرحتي ماتمت أمس يقولي انا بسافر أسبوع وراجع اللي هو الأسبوع الجاي 
حسّيت بالحزن وان حليمة رجعت لعادتها القديمة طبعا جوالو جديد وحاط فيه بصمة لكن عرفت بطريقتي ان زوجي رجع يخوني  بالله إِيش أسوي دحين يابنااااااات

انا ماابغى بصراحه اتطلق وأخرب بيتي لان زوجي فيه ايجابيات كثيييييرة 
لكن خيانتو تعبتني 
اللي عندها حل ترشدني والله أني متضاااايقه وبهم 😔😔