الحل السريع للرؤس السوداء

اكيد معظمنا بيعانى من الرؤس السوداء اللى فى البشرة .. وبنضطر نلجأ للكريمات ونحاول نداريها ..
أول حاجة تعالى مع بعض نعرف ليه بتعانى من الرؤس سوداء ؟؟؟!!
أغلب اللى بيعانوا من الرؤس السوداء بشرتهم دهنية ..
بتحصل ازاى : لما يحصل إفراز للدهون فى البشرة ومش نهتم بتنظيفها أول بأول .. تجف الدهون دى وتختلط مع الأتربة والجلد الميت والبكتريا وتقتل الخلايا اللى حواليها وتتحول للون أسود .
سببها ايه بقى :
أول حاجة البشرة الدهنية لأنها بتفرز زيوت طبيعية كتيرة فتتسبب فى ظهور البثور وحب الشباب وكمان الرؤس السوداء .
تانى حاجة : شرب الكافيين بكميات كبيرة بتكون سبب فى ظهور الرؤس السوداء .
تالت حاجة معانا : مستحضرات التجميل خصوصا المقلدة ودى بتسبب مشاكل كتيرة منها الرؤس السوداء .. وكمان النوم بدون ما نغسل بشرتنا .
دى كلها أسباب بتساعد على ظهور الرؤس السوداء ..
الحل :
أول حاجة تتعودى تشربى ماء كتير لأن الماء بيساعد على اذابة الدهون ده غير إن الماء هيحافظ على نضارة بشرتك ورطوبتها .
فى بقى معانا بعد كده أدوية وكريمات وفى وصفات طبيعية ..
نشوف الوصفة الطبيعية السحرية اللى هتبان نتيجتها من أول مرة :
هنجيب علبة جيلاتين بودرة بدون نكهات : وده يعتبر من أهم مصادر الكولاجين وبيحافظ على مرونة الجلد .
وهنجيب كمان حليب : وطبعا ده بيحتوى على فيتامين د اللى بيساعد على تحفيز إنتاج الكولاجين وهيساعد على شد البشرة وترطيب البشرة والتخلص من الجلد الميت لأنه كمان بيحتوى على فيتامين أ وبيوتين
وفيتامين ب ..
هنخلط الجيلاتين مع الحليب فيتكون عندنا عجينة .. نسخنهم على النار مجرد تسخين فقط .. بعد كده ناخد الماسك ونحطه على المنطقة اللى بنعانى من وجود الرؤس السوداء فيها ونسيبه لغاية ما ينشف حوالى تلت ساعة تقريبا .. بعد كده هنبتدى نقشر الماسك وهتشوفى النتيجة بنفسك من أول مرة .. هتشوفى الرؤس السوداء وبقايا الجلد الميت اللى هتطلع مع الماسك .
بعد كده هتغسلى بشرتك بالماء الدافى .. واى استفسار تحت امرك يا قمر .. وكل واحدة تبقى تبلغنى بالنتيجة ..