الحل ياالذربات

شوفي مبيد للحشرات سايل عليه صورت صراصير علبه كبيره شوي تلقينه في هايبر او سوبر ماركت كبير
تخلطينه في مويه في طرنبه وترشين البيت كله طبعا الحواف وتقريبا اول شي كل شهر وبعدين كل سته شهور ولا راح تشوفين شي حتى لو نمله

مشكورة اختي الحلوة
بس انا عندي صغار والمبيد الي قلتي علية خطير على عيالي يشمونة
ابي حل امن

السلام عليكم ... إن شاء الله افيدك الصراصير الصغيره ماينفع معها إلا شركات لأبادة مثل هذه الحشرات لأن عندهم مواد خاصه تنفع معاها بأذن الله .... وتقبلي مروري

بصراحه لا شركات ولا مبيدات انا جربت كل شي اول ماسكنت الشقه والحمد لله مانفع معي غير العجينه وهي بودره تشترينها من الصيدليه وتعجنينها بمويه وشوي حليب نيدو وتشكلينها دوائر وتوزعينها بكل مكان بالبيت انا حطيتها بالزوايا وضغطت عليها تصير مثل الجبس ماتبان مع الصبغ واول الايام يطلعون وبعد 3 ايام تقريبا ماتشوفين شي لاميت ولا حي
والله ييسر لك

الصراصير الصغار يا الغلا لها عدة مصادر إما تجيك من الجيران أو الحديقة
أو إنك تشترين خضار وفواكه خاصة التمر والعنب والطماطم اللي من عتيقة تجي مليانة لأن السوق نفسه مليان
والله إني شايفتها تتمشى على ثياب البياعين وتدخل في جيبه وتطلع عااااااادي عنده
المهم هذي تجي وتتخبى عندك إذا فيه شقوق في الجدران أو فتحات في الدواليب خاااااااااصة الخشب والفايبر أفضل مكان لها
وإذا دولابك من جوى فيه جرايد
يعني لازم تشوفين يوم طلعين الصغار من البيت وترشين البيت كامل بمبيد قوي ثم تتركون البيت يوم كامل
ثم ترجعين تهوين البيت تهوية جيدة وتنفضينه نفض من إلى يعني طلعي كل اللي بدواليب المطبخ ونظفيه ورجعيه وتأكدي أنه مافيه أي فتحة تحت المجلى أو رطوبة
أو من مراوح الشفط ممكن تدخل منها الصراصير
وتأكدي من الأبواب الخارجية لايكون فيه مسافة بينها وبين البلاط ممكن تدخل منها الصراصير فيه حاجز للأبواب من الربل أو الكاوتش
يلصق أسفل الباب يمنع الحشرات والغبار
وتأكدي من الزوايا خلف الأبواب خاااااااااااصة الحمامات لايكون فيها جحور وفتحتات سديها كلها بسيلكون أفضل من الجبس والإسمنت
حتى براويز الأبواب خاصة الحمامات يفضل وضع السيلكون عليها داير مندار بعد رشها بالمبيد
نفشي الغرف عن الأشياء الملفوزة من غير حاجة أو غير تنظيم وترتيب
ترى كثر الخمام والتلفيز يعطيهم مكان مناسب للأختباء
لا تجمعين فوط التمسيح وغيرها من أدوات تتنظيف البيت زي المساحات والإسفنج كلها حطي لها مكان مناسب بعد تنظيفها وتجفيفها
ويفضل يكون برى البيت في السور أو مكان تجيه الشمس