الحمدلله ان لنا رب يقول لشيء كن فيكون♡

السلام عليكم ورحمة الله وبركاته
كيفكم اخواتي في الله؟؟
انا جديدة في المنتدى وهذي اول مشاركه لي..
وحبيت افيدكم بقصة حملي ومعاناتي حتى حملت والحمدلله 😍 وعقبال كل وحده تتمنى انها تحمل ضناها بين يديها ..
فالبداية انا كان عندي تكيس وزوجي عنده ضعف عدد وحركة الحيوانات المنويه
كان وزني 75 وقالت لي الدكتورة من الافضل اني انزل وزني تحت ال70 وعطاتني حبوب جلوكوفاج 500مج مرتين فاليوم لمدة 3 شهور بالاضافه الى فوليك اسد وزوجي حبوب سبي مان
وبعد شهرين زوجي عمل مزرعة سائل المنوي وصار عنده تحسن فالعدد بس الحركه لا .. وانا صار وزني ينزل والحمدلله .. علما انه كان عندي الم في الجانب الايمن من المبيض بسبب التكيس وكانت الدورة عندي شوي متلخبطه وكنت استخدم خلطة ام لجين للحمل والحمدلله صارت دورتي منتظمه ..
وبعدها قطعة العلاج وجلست فترة مارحت الدكتوره حوالي شهرين وبعد شهرين رجعت للدكتورة وقالتلي استمر ع الجلوكوفاج .. والتكيس سبب لي ضعف التبويض لان البويضه ماكانت تكبر ولما تكبر تكون عبار عن كيس .. ساعتها قررت اشرب منقوع المريميه والبردقوش من بعد الدورة وحتى اليوم 14 ثم اتوقف وبعدها رحت للدكتورة عشان اشوف التبويض وتعجبت ماشاءالله كانت حجم البويضه 21 ماشاءالله وعطاتني ابره تفجيريه ولكنماحصل حمل والحمدلله والشهر اللي بعده شربت المنقوع من بعد الدوره الى قبل الدورة الثانيه واستدعتني الدكتورة في اليوم ال9 وكان حجم البويضه 12 فقررت ان تعطيني ابرتين تنشيطيه ورجعتلها اليوم ال12 وكانت حجم البويضه 15 وعطاتني ابره تنشيطيه ثالثه فاصبحت فاليوم ال16 حجم البويضه 19 وعطاتني ابره تفجيريه وبعدها اشرب دفستون لمدة 5 ايام وماحصل حمل .. وجاتني الدورة بس كانت غريبه وبدون وجع ولونها داكن وبدون تخثر
قررت الدكتورة انها تعملي الشهر اللي بعده صبغة الانابيب وفاليوم المحدد صار جماع وتاجل موضوع الصبغه وكنت ساعتها اشتكي من ريحة في المنطقه ولما كشفت علي قالت مافي شي بس احتياط عطاتني حبوب zomax بالاضافه الى تحاميل بيتادين استخدمها 7 ايام ولكن انا استخدمتها 3 ايام لاني عارفه بعدها بيكون عندي تبويض وماينفع اكمل .. يعني انتو بعد لازم تكونو فاهمين طبيعة اجسامكم اكثر من الدكتورة وتحسبو لكل صغيره وكبيره لان ممكن الدكتورة تسهي او تنسي بس انتي حكمي نفسك وانتبهو😊
المهم بكمل..
هذاك اليوم كان الثامن من الدورة وكان حجم البويضه 12 وقالت الدكتورة ممكن تكون كيس ومانزل من الدورة الماضيه
بعدها رجعت البيت وصرت اشرب منقوع المريميه والبردقوش حتى اليوم ال12 ورجعت للدكتورة وشافت حجم البويضه وصار 19 ماشاءالله وقالت انه الكيس جداره سميك وسالتني اذا اريد ابره تفجيريه وانا رفضت لاني مقرره اوقف هالشهر الابر واجلس عالطبيعي
رجعت البيت وصرت اشرب بدل المريميه والبردقوش منقوع الزنجبيل لمدة 3 ايام مرتين فاليوم
وبعد اسبوع رجعت للدكتورة عشان اشوف اذا البويضه موجوده ولا نزلت والحمدلله بفضل الله حصلتها نازله وكنت فرحانه حسيت بامل كبير
وقبل لا اعرف اذا كانت نازله او لا جاتني دوخه شديده اول مره تحصلي وبعدها باسبوع عملت فحص حمل والحمدلله بفضل الله طلعت حامل
ملاحظه انا بديت اتعالج بسبب الوجع وماكنت اعرف انه في تكيس وبديت علاج بعد زواجي ب3شهور وحملت بعد زواجي بسنه و10 شهور والحين الحمدلله عندي ولد سميته عبد الرحمن عمره 3 شهور ونص ربي يحفظه لي يارب
قصتي هذي كتبتها بعد تفكير كبير وان شاء الله تنتفعو وماتفقدو الامل بالله وتصبرو واهم شي تكثرو الاستغفار والله باتشوفو العجب وماشي بعيد عن الله واي استفسار انا جاهزه
والحمدلله ان لنا رب يقول لشيء كن فيكون ♡