الحمدلله .. حتى يبلغ الحمد منتهاه

يسعد لي مساكم جميلاتي :llove:
سبق وكتبت لكم قصة ولادتي ببنتي الأولى " ضي " والآن الحمدلله عمرها سنتين و عشر شهور
والآن جتني " في " نوري الثاني الحمدلله ويارب لك الحمد والشكر حقق لي ربي أمنيتي ف إني كنت أبيها بنت علشان تصير قريبه من اختها لما يكبرون

المهم قصتي يا حبيباتي إني صباح هذاك اليوم من صحيت الساعه ٩ وأنا أحس بآلام ظهري زايده تشد وترخي وعلى الظهر كل شوي الجنين يتحجر بأعلى بطني
طبعاً بما إني شكيت طلعت مع زوجي عز الظهر هههه و خلصت كل أغراض الصيدلية اللي أحتاجها لنفاسي ورجعنا
طبعاً زوجي كان في دوره و تخرجه كان هذاك اليوم و كنت مجهزة له حفلة صغنونه وجايبه الكيكه و الاغراض وكل شي بس كنت الظهر مع طلوقي البارده اصلح معجنات للحفله هههههههههه
المهم لما صار العصر كنت أحس ماأقدر أقعد الآلام تزيد ف كنت بس أتحرك أروح وأجي أدور أي شي أسويه بس ما أقعد ف كنت أجهز مكان الحفله " وقتها كنت ف بيت جد زوجي " وكلن يقول لي اقعدي و نسوي بدالك بس ما يدرون إني ماأبي أقعد محد يدري عن شي ههههههههه
لما جاء المغرب بديت بالحفله وفاجأته فيها وبعدين دخلوا معه خواله وأخوه و جلسوا ياكلون لما خلصوا كان مأذن العشاء وجاء دورنا يالله يالله صليت .. ولما حسيت إني خلاااص ما عدت أتحمل غصبت روحي على كم قطعة معجنات علشان تقويني بالطلق تبت عقب طلوقي ببنتي الأولى لما كنت جوعانه
وصعدت فوق وما قلت لأحد شي ، شوي كسرت خاطري بنتي تحت خفت تحتاج شي وأنا فوق ف ارسلت مسج لخالة زوجي " بعمري " ووصيتها عليها وقلت لها إن معي طلق وياقلبي عليها الله يفرج لها دنيا وآخره ما صبرت وكلت خواتها على بنتي وجت عندي وساعدتني و جابت لي طشت فيه ماء دافي لرجليني ودهنت بطني زيت زيتون و جلست ترتب أغراضي معي الله يجزاها الجنه يارب العالمين ويغفر لأم ربتها يارب
طبعاً بما إن أمي الله يخليها لي يابعد روحي برا السعوديه بسبب شغل أبوي ف ماحبيت اعلمها الا لما أولد اتصلت وأنا فيني الطلق استنيت لما بردت الطلقه وكلمتها على السريع وقفلت من دون ماأخليها تحس بشي حبيبتي
ولأني تعلمت من ولادتي الأولى بهذلوا بي بغرفة الكشف :hmh: قررت هالمره ماأروح إلا مستوووويه هههه
ف لما جت ٩ بالليل قلت بلبس فوطه صحيه أخاف ينفتح الرحم وفعلا بعدها بشوي شفت السدادة نزلت وكل ماله يزيد يزيد لين الساعه ١١ خلاص ما عدت أقدر أتحمل طلعت من غير ما تشوفني بنتي مع زوجي ورحت لمستشفى الحرس الوطني بالرياض كشفوا قالوا ٦ سم والحمدلله
ولا خلوني بغرفة الكشف على طول الولاده و شدت كربتي حيل يالله اجعلها بموازين حسناتي يوم القيامه و اقبل دعواتي بوقتها ياارب العالمين
شوي حسيت بألم آخر بطني شديد وضغطت لا إرادياً على أسفل بطني وانفجرت موية الراس
و وصل الطلق لأحمى شي خلااص وبديت أحس بالدفع و أنا أدفع كنت أحس إني أغييييب عن الدنيا وأرجع :(
طبعاً بما إن كل شي صار بسرعه ما أمدى زوجي يدخل وإلا أنا طلبته لأن مستشفى الحرس يخصصون لكل وحده غرفة ولاده كامله وتدخل اللي تبي معها
المهم دفعت بقووووه ولما بردت وقفت هاوشتني الدكتوره هههه قالت لا مو الحين مو الحين ادفعي وشديت حيلي بقوه ودفعت بأقوى ما عندي ودارت فيني الدنيا :( و فجأه حسيت ببعد روحي جنينتي بدفاها نزلت
وبدت أصيح و أردد الحمدلله الحمدلله الحمدلله :(
لأني صراحه شفت الموووت وشفت أشد بهوايل ببنتي الأولى ف توقعت مثلها
ويااارب لك الحمد والشكر من قبل و من بعد على جميع نعمه جبت أجمل " فيّ " عيون أمها وكانت الساعه ١ وشوي بالليل
و اتصلت على ماما وأنا بغرفة الولاده بعد الخياطه واستغربت إني اتصلت عليها بالليل سألتني وهي تمزح تقول هاه بالمستشفى؟ قلت إيه .. ضحكت هي وقالت إيه والله بالمستشفى برضو كانت تحسبني استهبل وتضحك علي لأنها من كم ساعه مكلمتني ما فيني شي هههه
ف ضحكت وقلت والله بالمستشفى يا ماما !
قالت : جتك الولاده؟
قلت : خلاص ولدت !
قالت : صدق ؟
قلت : والله ولدت
وسكتت بعد روحي أثرها تبكي يا حبيبة قلبي وبابا أخذ الجوال وكلمني عنها
واللهم لك الحمد حتى ترضى ولك الحمد إذا رضيت ولك الحمد بعد الرضى :baby2: