الحمدلله حملت بعد ثمان سنوات ...

السلام عليكم بنات كيفكم ؟!
الحمدلله حملت بعد ثمان سنوات حملي الأول كانت دورتي منتظمة بعدها سبحان الله صارت مشاكل عندي بالدورة تتأخر كثير وتنزل غزيرة مرة ومرات ماينزل شي بديت علاج بعد ماقرب عمر بنتي ثمان سنوات لان شفت نفسيتها متأثرة ودايم تبكي تقول ماعندي اخوان وخوات مثل عيال خالي وعيال عماتي وعمامي سويت أ شعة الصبغة في شهر شعبان وبعدها وقفت المواعيد عشان كورونا سلمت امري لربي .... ويوم من الأيام جا زوجي وكنت نايمة صحاني من عز نومي قالي قومي تبخري بالشبه عند باب الغرفة قريب من باب الحمام الله يعزكم لأني دايم إذًا زعلت أدخل الحمام الله يكرمكم واجلس ابكي يقولي يمكن جاتك غلقه وزعل في الحمام وانا مستغربه منه 😮 وأ تبخر وأنا أقرأ المعوذات وآية الكرسي ورجعت كملت نومي ، سبحان الله في نفس اليوم نزلت معي دورة عادية لا غزيرة ولا شي وجلست سبع أيام مثل دورتي يوم كانت منتظمة هالكلام في شهر ذي الحجة وشهر محرم تنزل معي الدورة قريبة من نفس تاريخ الدورة السابقة يمكن تقدمت أو تأخرت أربع أيام ما أذكر بالضبط وانا مو مصدقة لإني نسيت الدورة المنتظمة وجلست معي سبع أيام 🙏 وجاتني بعد شهر صفر نفس الشي منتظمة بس ماطولت ولا نزل دم كثير آنا عادي ماهتميت لانه متعودة على عدم انتظام الدورة يمكن جلست معي ثلاث أيام أو أربعة بعدها اغتسلت وصليت عادي ، شهر ربيع أول وربيع ثاني ماجاتني ولا شهر جمادى الأول صحيت من النوم معي مغص ببطني قوي وانا بالعادة تجيني الدورة بدون آلام وانا كنت شاريه تحليل حمل منزلي من فترة بس مااحب اسويه لاني مليت وتعقدت كل مره يطلع لي خط واحد وماجاني احساس او توقعت انه حمل وسبحان الله احلل ويطلع خطين زوجي كان نايم صحيته مو مصدقه وهو ماصدق من الفرحة قالي لازم نروح المستشفى نسوي تحليل دم أفضل ورحت الحمدلله طلع حمل صحيح وقلت لاهلي واهله فرحوا لنا بعدها بيوم صحيت من النوم الصباح حسيت برطوبه 😮وش ذا الا اشوف دم وتنزل مني قطع كبيرة صحيت زوجي وانا ابكي رااااح طااااح خلاص على طول رحت المستشفى الولادة وصوروني سونار وانا حزينه وقلبي منكسر الا اسمع الدكتورة تقول البيبي موجود فرحت وحمدت ربي وجلست ادعي لها إن الله يبشرها بالخير وجات دكتورة ثانية قالت تنويم ضروري لانك معرضة لاجهاض نمت عندهم 3 ايام تقريبا كتبت لي الدكتورة خروج كان تاريخ 7 - 5 من شهر جمادى الاول وقالت لي انتظم على المثبت وارتاح سألتها كم لي من حملت قالت لك 14 اسبوع سبحان الله طول هالاسابيع ماحسيت اني حامل ولا جاني وحام مثل حملي الأول اللهم كنت أنام كثير فكرته تعب ماجا في بالي اني انعس من الحمل ..
سؤال شاطح للي تعرف تعرف حسبة الحمل هل انا حامل من دورة محرم أو صفر ؟!
الحمدلله على مارزقني ربي الله يرزق كل وحدة تتمنى يارب العالمين دعواتكم اخواتي الله يثبت حملي ويسهل ولادتي خايفة من الولادة لانه معي ربو في حملي الاول سبحان الله ماجاني طلق ولدوني قيصري بس هالمره مدري وش بيصير الله يسهل يارب 🙏