الحمدلله رب العالمين

المهم انا ببداء بمشكلتي وانتم خبروني هل هو مرض وحي او مجرد وساوس نفس مايقولو

المهم انا في رمضان سرت ديرتنا لان كان فيها مناسبة المهم كنت انا واختي نسولف فجاة حسيت شي تلبسني وحسيت زادت نبضات قلبي وخلاص حسيت كاني بتجنن
قلت لاختي شكلي بنصرع لان امي يجيها صرع قالت لا مافيك الا العافية المهم سرت اركض ماعرف احس باطير
ماكاني امشي على الارض وسرت بسرعة على الحوش واهلي ركضو معي حليلهم

وتمو يقولون وايش فيج اقولهم بتجنن خلاص وجلسو يسمو علي وامي وخالتي يقولو شو فيج وانا اقولهم خلاص بتجنن المهم دخلوني وشغلو القران وانا احسني طايرة من دقات قلبي ومن الخوف المهم عقب شوي ارتحت
وخفت عني الخوف بس مازالت دقات قلبي مستمرة وخلاص من ذاك اليوم عفت الاكل النوم عافني وصارت حياتي بلا طعم ولا لون احسني دوم في حلم وجات المناسبة وانا مع الناس وموب معاهم كله احسني كاني حلم

صرت كله احس بياس وافكر في حياتي الماضية ولاكان شي فيها يونس كاني كله ضايقة وكرهت عيالي وكله اقول انا اصلا ماعمري حبيتهم احبهم بس قدام الناس واقول كله حياتي مرت احس اني بس امثل على الناس
واني عايشة بغير شخصيتي وكله يوم تجيني الفزع يرجع يتكرر الشريط خوف وعقب كاني في حلم وعقب احس وشوشة وكانه طنين في اذني وكله احس بالعصبية واسمع الناس وكاني موب معهم ومافيني حتى ارد

صرت اق ل ليش انا امشي كذا وليش اجلس كذا وليش اتكلم كذا المهم افسر كل حركاتي وكله وكاني في حلم
والخوف والفزع الي فيني مايعلم فيه غير ربي

المهم رديت البلاد واهلي ودوني عند شيخ وقال عندي عين طبعا بوصفي للي حصلي المهم اعطاني علاج وتقربت من ربي وارتحت الحمدلله حسيت اني ارجع للحياة شوي شوي

بس مازالت الحالة ترد بس بشكل اقل بين فترة وفترة

مثلا اليوم خواتي ردو من الكلية كانو يسولفو ويضحكو جيت بضحك حسيت شي غريب فيني كسل وخمول حتى مالي خاطر ارد عليهم المهم جلست اسمعهم وانا موب معهم اقول ليش يستوي فيني كذا
المهم خليتهم ورقدت وعقب قمت لا باس افضل ولله الحمد
مرة كنت عند حريم وبعد استولي نفس الشي جيت بسولف حسيت كسل وضيق وماعرف شو فيني ماقدرت اسولف صرت اجاملهم وابتسم وانا احسني في عالم اخر

حكيتلكم بالتفصيل عشان حد يدلني شو الي فيني وليش احيانا اكون تمام شهر او اسابيع وترد الحالة وينعاد الشريط مع العلم احسه يخف شوي بالليل

المهم اعراضي كسل وماريد اسوي شيي واذا عصبت نفسي اعصب واحس بالضيق
واحسني كاني في حلم
واحس بالياس وكان حياتي مرت مايوم ضحكت فيها
كره لعيالي وعصبية عليهم مرررة
عتاب لنفسي على كل شي
تحليل لكل حركة اسويها وكاني اراقب نفسي من بعيد
عدم تركيز

المهم سرت عند طبيبة نفسية كل ساعة تقول شي ساعة توتر وساعة نوبة هلع وساعة قلق
ويوم روحت لشيخ وقراء علي ماتاثرت ولا حسيت بشي

زين شو الي فيني اريد افهم وليش يوم تجيني الحالة افصل واصير وحدة غير انا استغرب نفسي

اتمنى حد يريحني ويقول شو فيني وادعولي جزاكم الله كل خير