.. الحمدلله طلع معي حق في شرطي في عقد النكاح ..

السلام عليكم

انا الله يسلمكم كنت متزوجه واحد واربع وعشرين ساعه يكفخ فيني

واهانات وضرب وشتايم وسب في اهلي ولعن وياخذ راتبي كله وحقوقي مهضوومه عنده للاسف ويوم اشتكي قالوا اصبري هذا ابوا عيالك من بيتحملهم بعده سكت والله العالم باللي عانيته معاه

وصلت فيه انه يحبسني بالايام بغرفه مظلمه لااكل ولا شرب والله مايفكني الين يشوفني خلاص قربت انهار او يغمى علي يرحمني ويفكني الله يسامحه اشتكيته للشرطه وطلع بواسطه واشتكيته بالمحكمه ورفعت عليه قضيه وطلع القاضي قريبهم وطلعوه مثل الشعره من العجين واشتكيته لاهلي ولاهله ولااحد نصفني

المهم اني انظلمت معاه الله يسامحه ويغفرله وهو توفى الحين الله يرحمه
و معي منه ولدين الله يحفظهم ويرزقني برهم .. يوم مات ابوهم
تحرووا وصاروا يلعبون قبل لايموت كانوا دايم ماسكين فيني ويخافون
يفكوني ويجي يضربهم فكان يحتمون فيني

بعد ماخلصت العده خطبوني كثير بس رفضت وكنت كارهه الزواج
وعشت عند اهلي والله يسامحهم كانوا اخس من زوجي الله يرحمه
بس الفرق بينهم ان زوجي تعذيب جسدي ونفسي مع بعض
وهم تعذيب نفسي والله اني تعذبت ونفسيتي صارت في النازل صعب لما اقرب الناس لك يكونون ضدك لكن الحمدلله على كل حال
(وان ظلم ذوي القربى لاشد مضاضة على المرء من وقع الحسام المهند )

بعد كذا خطبني اخو زوجي الصغير وهو يصغرني بتقريبا 8 او 9سنوات
وهو مازال طالب بالجامعه وانا في الثلاثين .. رفضت وبشده بسبب فارق السن بيننا .. ولا هو مافي شي يعيبه وكان احسن شي فيه انه طيب
واحسن واحد باخوان زوجي الله يرحمه وكان حنون على عيال اخوه ويحبهم ولو كان اكبرشوي كان تزوجته من اول ماخطبني بس عمره كان عائق .. قعد فتره وهو رايح وجاي ويحاول اني اوافق وجاب ناس كبار من قبيلتهم وناس من عندنا وابدا مااقتنعت بالموضوع ولا دخل مخي

قام الولد قال لابوي خلني اكلمها وهاذي اخر محاوله اذا مارضت خلاص براحتها .. ورفضت اكلمه وابوي قعد على راسي .. يابوك تزوجيه عشان عيالك ..ومن هالكلام اللي يصدع .. وبعدين كلمني على تلفون البيت
طبعا وقعد يتكلم ويقول انه محد غاصبه وانه متقدم على هالخطوه باقتناع منه وقلتله اني فارق العمر بيننا كبير واخاف بكره تكبر وتتزوج علي وانا مو ناقصه ذقت من اخوك الويل ماابيك تجي وتكمل الناقص

وقال خلاص اشرطي علي اني مااتزوج وانا وعد مني انا مااتزوج وانتي على ذمتي ولااجمعك مع وحده ثانيه قلت خلاص افكر ونشوف

ووافقت ويوم جا الماذون شرطت انه مايتزوج علي والماذون استغرب :eek:
بس ماقال شي وماعلق على شرطي (يعني لو حرام كان تكلم )

يوم الناس دروا اكلوني بقشوري انا مدري مين علمهم الله يسامحه

وكل وحده تتفلسف من عندها حرااام انتي اعترضتي على شرع الله

وقلت انا ماعترضت ولا شي انا شرطت عليه شرط وهو وافق وش حاشركم انتوا ..
المهم انا تزوجته ومرتاحه معه جداااااااااااااااااااا ولله الحمد ربي عوضني عن القهر والضيم اللي عشته ..
بس طبعا تعليقات الناس ماخلتني التعليقات اللي عن اعمارنا اطنشهم
لان ماهمتني بصراحه انا من ذوات الاحجام الصغيره يعني قصيره وجسمي صغير ومايبين علي عمري وهو طويل وباين اكبر مني
عشان كذاا ماني مهتمه بهالسالفه

بس اللي يقهرني الي يقولون ان اعترضت على شرع ربي والبعض منهم
تجرا انه يكفرني استغفر الله :blink:

المهم اليوم قريت موضوع برد حرتي وطلعت ان معي حق ويجوز لي ان اشرط على زوجي هالشرط وهذا مقطع من موضوع الاخت دوت نت الله يجزاها خير

إذا شرطت عليه أن لا يتسرى أو لا يتزوج عليها فإن وفى ، وإلا فلها الفسخ ، لحديث : إن أحق ما وفيتم به من الشروط ما استحللتم به الفروج



يعني يابنات يجوووز لكم تشرطووون على الرجال انه مايتزوووج عليكم <<< تراني قبل فكرت في هالشرط بس امي الله يهديها تقول لاتسبقين الاحداث ومايجوز لك تحكمين الرجال <<طلع معي حق ..




انا اجزم ان اغلبكم تمنى انه يعرف ان هذا من حقوقنا الضايعه للاسف

ولو دريتوا من قبل كان كلكم شرطتوه .. عادي حريم ونفهم بعض :icon30:

الحين مرتاحه ومحد يقدر يجي يتفلسف علي بكره تكبرين ويتزوج عليك
ومن هالكلام اللي يضيق الصدر

اشتريت راحتيxxxx بالناس .. والله محد فكر فيني يوم انذليت ويوم طالبت براحتي قالوا انانيه وماتخاف الله

مجتمعنا غريب ودايم واقف بصف الرجل .. والله ماحسيت اني عايشه الا لما قويت وصرت اخذ حقي بايدي وطز بالناس اللي يبي يتكلم يتكلم