السلام عليكم
أشحالكم أخواتي...؟؟
حبيت اخبركم بأخر أحداث حملي الاول
طبعا انا متزوجه من خمس سنوات واول مره احمل وحملي كان في الشهر الخامس رحت للمستشفى كان عندي موعد وانا حملي في بداية الشهر الخامس له اسبوع طبعا اول ما دخلت طلبت مني الممرضه عينة بول الله يعزكم دخلت الحمام وبعد ما حطيت عينة البول طلع صوت قوي مني واشوف نفس الحنفيه الي انفتحت بقوه ويطلع ماي مني كثيررررررر خفت يا اخواتي ما اعرف شو السالفه رحت للممرضه اقولها يطلع مني ماي كثير قالت طلع منج الماي بقوه قلت لها ايوا قالت اوكي الحين بدخلج عند الدكتورة الاستشاريه دخلت عليها قالت لي انتي متأكده انه ماي طلع منج مو بول قلت له ايوا انا متأكده انه ماي ويطلع مني كثير للحين نيمتني على السرير وقامت تكشفت علي وخذت عينه ما ادري عينة شو وبعدين قالت ايوا صح ماي الجنين الي طلع وجابت جهاز صغير تريد تسمع نبضات قلب الطفل ما سمعتها قالت خلاص برسلج لقسم التصوير اتروحين بيصورون لج بيشوفون ماي الجنين كله نزل ولا اشوي وبيسمعون نبضات قلبه المهم رحت وسولي الصورة سمعت نبضات قلبه كانت اوكي بس الماي حولينه كانت نسبة قليله اول ما رجعت للدكتورة قالت لي لازم اتنامين في المستشفى مدة ثلاث ايام اتكونين تحت المراقبه انشوف الوضع قلت لها اوكي كان الساعه 12 ونص الظهر اول ما دخلت غرفتي اتصلت في زوجي وقلت له انهم الدكتورة بتنومني في المستشفى لانه نزل مني ماي وبعدين امي اجت بتنام عندي على الساعه 4 العصر بدأت احس ببروده واحس اني بسخن وكل ما تيجي الممرضه اقولها احس ببروده وفيني حراره داخليه اتحط لي مقياس الحراره اتقولي لا مافيج حراره وانا ميته برد اخرتها طلعت حرارتي 39.7 راحت الممرضه وعطتني بندول واجت دكتورة المسؤوله عند القسم كامل وحطت لي ابره كبيره في ايدي وعطوني مضاد حيوي ومغذي وفالليل الساعه 10 راحت مني الحراره بس كنت اعرق كثير وكل ساعتين اروح الحمام الله يعزكم ابول واحس ببروده ونمت وانا نايمه ما ارتحت في نومي كنت كل ما اتقلب على اي جهه كنت احس بألم في بطني وفجاة تحرك شيء بقوه حسبت بألم فضيع وكان الم ماسك ظهري وماغص في بطني رحت للحمام الله يعزكم طلع مني دم خفيف مثل العلامه عرفت اني بجهض الطفل رحت للسرير وصحيت امي وقلت لها انه طلع لي دم وبدأ الالم يستلمني كل اربع دقايق يزيد فيني الساعه 8 ونص ولدت وطلع الولد بس كان ميت معه اني سمعت دقات قلبه فالليل قبل لا انام الساعه 11 ونص الدكتورة سمعتني يوم كنت مسخنه الحمدلله على كل حال وشفته يا اخواتي كامل ايده ورجوله واذونه سبحان الله عيونه مغمضه وصغير مره وحطوه في سلة صغيره وكان زوجي موجود قلت له تعال شووفه شافه طبعا قبلي انا بعدين قلت للممرضه اريد اشوفه روتني ياه بس انا كنت مره تعبانه كنت اشوفه مستغربه انه كامل سبحان الله اتوقعت انه بيطلع متشوه او فيه شيء الحمدلله كان شكله طبيعي بس سبب سقوطه حكمة من رب العالمين يمكن بيكون فيه شيء انا ما اشوفه ولا احد يعرفه المهم يا اخواتي تعبت كثير في المشيمه تميت للساعه 12 ونص الظهر والالم يروح ويجي تعبت مره واخرتها نزلت المشيمه خلاص حسيت براحه اشوي بس الم كان في بطني احس بماغص اجت الدكتورة اتشيك علي لو انا احتاج تنظيف او لا قالت لازم تحتاجين تنظيف سولي عملية تنظيف بعدها حسيت براحه كثير طبعا يا اخواتي زوجي خذه ولدنا وسماه عبدالله وراح دفنه هو والاهل الله يجعله لنا شفيع يارب يوم القيامه
اول ما طلعت من المستشفى قالت الدكتورة لزوجي زوجتك اول ما تحمل لها شهرين على طول جيبها عندنا بنسويها لها ربط هي تحتاج ربط معه اني كنت عندهم قبل اسبوعيين متنومه وقلت لهم الدكتورة الي في المستشفى الخاص قالت لي احتاج ربط قالوا لي لا ما تحتاجين ربط راس الطفل فوق وعنق الرحم مسكر مو مفتوح سبحان الله المهم لا اعتراض على حكمة رب العالمين والحمدلله على كل حال والله يعوض كل محرومه يارب
والله يعوضني ويعوض كل اخواتي يارب بالذريه الصالحه
دعواتكم لي
عيون_الإمارات @aayon_alamarat_7
محررة ماسية
يلزم عليك تسجيل الدخول أولًا لكتابة تعليق.
درياق
•
الله يعوضك خير ان شاء الله
الصفحة الأخيرة